Read lango Jo Pilipi 2 Bible Online

Jo Pilipi 2 - lango bible

Jo Pilipi 2

¹Pi mannono, ka inwoŋo wunu tekcunnyoro pi bedo i Kricito, onyo marroro ame mio idio wunu cunywu, onyo notte moro i Cuny Acil, onyo cunnyoro me kica ame mio itimo wunu jo ocele ber,

²mi wunu doŋ yomcunya cobere aber kit man: bed wunu i tam acel kede mar acel, kun inotte wunu i cunywu, tamwu daŋ bed acel.

³Kur itim wun ginnoro pi laro dito onyo pi wakere awaka nono, ento bed wunu kede mwolo, kun ŋat acel acel tero awottere acalo en dano adit akato en oko.

⁴Kur itam pi gin ame konyo ka yin keken, cite tam pi gin a konyo jo ocele.

⁵Bed wunu kede cuny a rom i en a rik Kricito Yecu obedo kede.

⁶Iyi epone mere rik en Obaŋa ikome, cite mom olido bedo rom kede Obaŋa.

⁷Ojalo mano ducu, te tero kite ma opii, ote nywale acalo dano.

⁸Ka doŋ opello i cal dano, omwolle gire kene, obedo awiny naka i to, naka atot i to me yataria.

⁹Pi mannono, Obaŋa omie dit amalo meicel, dok daŋ omie nyiŋ a tye malo akato nyiŋ ocele luŋ,

¹⁰me wek gin ducu a tye i polo kede i lobo, anaka gin ducu a tye piny i te lobo, rum coŋgi piny me woro nyiŋ Yecu,

¹¹leb luŋ otuc daŋ ni, Yecu Kricito en Rwot, kun kelli Obaŋa Papo kwogo.

¹²Pi mannono, wun ame amaro, pien wun ibedo wunu rik iwinyo wunu doga i kare luŋ ka pwod abedo baŋwu, myero ibed wunu kede winy ame okato kare amanni ame doŋ atye bor kedwu. Cob wunu tic me larrewu kenwu i lworo kede myelkom,

¹³pien Obaŋa en ame tye atic i yiwu kun miowu mit kede teko me tic, me iyom wunu cunye.

¹⁴Ti wunu tic ducu aboŋo ŋuŋura moro onyo pyem,

¹⁵me ibed wunu aboŋo kopporo a loowu, ame balloro daŋ mom i yiwu, otino Obaŋa ame roccoro pe i komwu i akina Iwagi jo ogom ame oballe oko. Itye wunu ka ryeny i lobo iyi akina jo bala acer,

¹⁶pien imako wunu kop me kwo doŋ atek. Mano bino miyo awakere i nino a Kricito ni, mom rik aŋweco nono, dok daŋ mom alolle nono.

¹⁷Kadi bed oony remona, te bedo acalo gin ame oonyo i wi keno lam, kun iyeewu kede ticwu baŋe bedo acalo mot ame oŋolli Obaŋa, an gira yia yom, daŋ anywako yomyia kedwu luŋ.

¹⁸Amannono, wun daŋ myero yiwu bed yom, dok lel wunu karacel keda.

¹⁹Atye i gen i Rwot Yecu me cwalo Temoteo baŋwu oyot, me awiny kite itye wunu kede; mano bino cukoro cunya an daŋ.

²⁰Mom dok atye i ŋattoro ocele a tye i kite cuny a en tye kede, ame twero paro pirwu ateteni bala en.

²¹Jo ocele mere luŋ paro ka gin a makogi keken, mom oparo pi gin a mako Yecu Kricito.

²²Kite a Temoteo onyuto kede konnyere, mano iŋeo wunu aber. En kede an calo papo kede wode; wan onotte kede i tic karacel pi amut aber.

²³Pi manno, atye i gen me cwale baŋwu oyot, tekki aniaŋ kite a piny tye awot kede i tuŋ baŋa.

²⁴Dok daŋ atye i gen i Rwot ni an ikoma abino tuno baŋwu i kare a mom bor.

²⁵Aneno daŋ ni myero acwal baŋwu ominna Epaprodito, ame en atic wadwa ame olwenyo karacel keda, a rik iore wunu baŋa pi konya i pekona.

²⁶Pien wun ducu ibedo muye wunu, dok cunye obedo ka ton atek, pien rik iwinyo wunu ni kome lit.

²⁷Ateteni, kome rik obedo alit, ame daŋ obwot to oko. Ento Obaŋa otimme ber; mom en keken, anaka an daŋ, me kur medda cwercuny i kom en ocele ca.

²⁸En gin omio atye i mit adwoŋ me cwaye baŋwu me ilel wunu me nene doki, an daŋ mom doŋ abed i cwercuny adwoŋ,

²⁹jole wunu i Rwotwa kede yom a yiwu luŋ; ket wunu kwogo i kom jo a cal i en.

³⁰Pien rik en ojalo kwo mere te buco to oko pi tic a Kricito, me tyeko gin orem i kom kony ame imia wunu.