Read lango Jo Pilipi 3 Bible Online

Jo Pilipi 3 - lango bible

Jo Pilipi 3

¹Me agikki mere omegona, lel wunu i Rwot. An me nwoyo coyiwu gin a rik koŋ acoyiwu, mom ola gira, dok daŋ twero geŋowu poto i kan arac.

²Yab waŋwu i kom gwogi-nu, ame gin otim tim areco, oŋol dul kom jo.

³Pien jo olirre me ateteni gire wan, wan ame oworo Obaŋa i Cuny Acil, dok owakere i Kricito Yecu, kun mom otye i gennoro i kom i oko.

⁴Kun kono an ikoma daŋ aromo bedo i gen, ka ŋattoro tamo ni eromo bedo i gen i kom i oko, an aloc gira.

⁵Olira a doŋ atyeko nino aboro me ditta, rokka jo Icrael me i atekere a Benjamin. An a dano me Eburania ikome, jo Eburania en onywala, i kop a dok i kom cik a Muca, an abedo Aparicayo.

⁶Kop a dok i kom keto cuny, rik awuno lwak oye Yecu awuna. Kop a dok i kom kite atira ame ocuŋ i kom gwoko cik, rik kopporo gire mom i koma.

⁷Ento ginnoro ducu a yam atamo ni konya, onyoni doŋ aterogi acalo gin a konnyere mom, pi Kricito.

⁸Ateteni, tye ginnoro aber ame okato meicel, en iŋeyo Rwotta Kricito Yecu, ame omio atero jami luŋ acalo gin a konygi mom. Pire an adoko acan jami luŋ, dok aterogi acalo gin obedo yugi, me aluny nwoŋo Kricito,

⁹me nwoŋa anotte karacel kede en. Mom atye i kite atira ame mega an ikoma, mom en a bino pi cik, ento kite atira ame onwoŋo pi ye Kricito, en ame oya i baŋ Obaŋa ikome dok ame omio pi iyee.

¹⁰Amito aŋe Kricito, kede teko ame ocere kede; amito nywako can a en okanyo, adok acalo en obedo kede i to mere,

¹¹me ka twerre atun naka i cer iyi akina a jo oto.

¹²Mom akobo ni atyeko nwoŋo, onyo ni doŋ awok oko, cite amedde wot anyim kun atemo mako pira kena gin ame Kricito Yecu doŋ omaka pire.

¹³Omegona, an mom atamo gira ni doŋ atyeko mako; tye ginnoro acel keken: wia bedo will i gin okato i ŋec, kun alaro gin a tye i nyim acalo dano ame obuto i ŋwec.

¹⁴Aŋweco anyim kun akemo tol, me anwoŋ mot, en lwoŋo ame Obaŋa tye alwoŋowa kede malo i Kricito Yecu.

¹⁵Wan jo luŋ ame ocwiny ber obed wunu i kodi tammono; dok daŋ ka tamwu opokere oko i kopporo, Obaŋa bino yabbiwu man daŋ.

¹⁶Gin a mitte keken, myero imedde lido wunu atek yo a doŋ ityeko tuno wunu iye.

¹⁷Omegona, notte wunu karacel i potto kitena. Wan doŋ omiowu anen me aluba; cik waŋwu i komjo ame wapo anennono.

¹⁸Abedo kobbiwu tyen apol ata, dok daŋ anwoyiwu tin kede pigwaŋa ni, tye jo apol ame kwogi omiogi obedo okwor me to a Kricito i kom yataria.

¹⁹I agikki mere, jo-nono bino rwenyo odoco, pien obaŋagi en yigi, gin onwoŋo kwogogi i gin a myero migi lewic, tamgi kwako ka gin me loba man.

²⁰Aco wan pacowa adwoŋ tye i polo; wan otye okuro Alarwa ame aya i kuno, en Rwotwa Yecu Kricito.

²¹En bino loko komwa, arecoreconi doko acalli kome me kwogo, kun tio kede teko mere ame mie twer me kela jami luŋ aluŋa i te loccere.