Read lango Jo Pilipi 4 Bible Online

Jo Pilipi 4 - lango bible

Jo Pilipi 4

¹Pi mannono, cuŋ wunu atek i Rwot amanno, omegona ame amaro dok ame aparo meicel, pien ibedo wunu yomcunya kede tokka me kwogo, owotena.

²Yin Eudia kede yin Cuntuke, akwaowu ba, bed wunu i cuny acel i Rwot.

³Yin atic wadwa me ateni daŋ, kony mon-ni ba, pien gin oromo karacel keda pi amut aber, karacel kede Kelementi daŋ kede otic wadwa ocele luŋ, ame nyiŋgi doŋ ocoo oko i buk me kwo.

⁴Lel wunu i Rwot kare luŋ. Dok anwoo ni, Lel wunu.

⁵Weku jo luŋ ŋe mwolowu. Rwot doŋ ceggi.

⁶Kur ipar wunu ginnoro, cite i kop ducu mi kwacwu ŋeye baŋ Obaŋa i lega kede i bako dog, karacel i pwoc daŋ.

⁷Mio kuc Obaŋa ame kato ŋec a jo luŋ bino gwoko cunywu kede tamwu aber i Kricito Yecu.

⁸Me agikki mere, omegona, ket wunu tamwu i kom kop acalo magi: gin ducu a tye ateni, gin ducu a romo awora, gin ducu a tye atira, gin ducu ame cil, gin ducu amwonya, gin ducu ame opwoo, ginnoro keken ame ber meicel, ame porre apaka.

⁹Ti wunu gin a nwaŋ ipwonyo wunu, igamo wunu, iwinyo wunu dok ineno wunu i baŋa: eka Obaŋa won kuc bino bedo kedwu.

¹⁰An alelo atek meicel i Rwot pien aman dok iparo wunu pira kit a yam con. Kono iyi ateni mere mom iweko wunu paro pira, ento kare me konya en obedo peyiwu.

¹¹Dok daŋ pe akoko can, pien an doŋ apwonyere ni, gin ame atye kede roma gire.

¹²Aŋeo bedo i gin anok kede bedo i gin abup. Adonyo i dul a jo a ŋeo bedo i ginnoro a binnigi i kare moro keken, yeŋ atek ateka onyo kanyo kec, bedo i lonyo abup onyo bedo kede can.

¹³Atwero jami luŋ aluŋa pi Kricito ame mia teko.

¹⁴Ento wun rik itimo wunu ber me notte keda i peko ame odia.

¹⁵Dok wun jo Pilipi iŋeo wunu aber ni, ka rik aya i Makedonia i ageyi rabo amut aber, mom tye Iwakkoro i akina jo oye Rwot ame onotte keda i yo man me miyo kede gamo mot, kono ka wun keken.

¹⁶Anaka i kare ame atye i Tecalonika icwaya wunu kony a mitte kom tyen aryo twal.

¹⁷Mom ni mano cunya tye i kom mot, ento atamo pi nyayo agoba ame obino kwanniwu.

¹⁸Agamo gin imia wunu ducu, kun dwoŋ ame okato kare. Oromo doŋ aber, pien Epaprodito otyeko miya mot ame icwao wunu. Obedo gin a ŋwece kur, acalo gin ame oŋolli Obaŋa, a en ojolo, a yomoro yie.

¹⁹Obaŋana bino miyowu gin luŋ ame orem i baŋwu, kun kwanyo iyi lonyo mere me kwogo adwoŋ a en tye kede i Kricito Yecu.

²⁰Kwogo bed baŋ Obaŋa Papawa nakanaka. Amen.

²¹Mot wunu jo Obaŋa luŋ i Kricito Yecu. Omegowa a tye karacel keda daŋ omotowu.

²²Jo Obaŋa luŋ omotowu, akato mere jo me ot a Kaicari.

²³Winyo a Rwotwa Yecu Kricito bed kede cunywu.