Read lango Jo Kolocai 1 Bible Online

Jo Kolocai 1 - lango bible

Jo Kolocai 1

¹Waraga man oya i baŋ Paulo ame en akwena a Yecu Kricito pi mit Obaŋa, kede i baŋ ominwa Temoteo.

²Baŋ jo Obaŋa kede jo a genne i Kolocai, a tye i Kricito. Obaŋa Papa wa miwu winyo kede kuc.

³Wan opwoo Obaŋa Papa a Rwotwa Yecu Kricito kare luŋ ame okwao pirwu.

⁴Pien wan owinyo pi iyeewu i kom Kricito Yecu kede pi marwu baŋ jo Obaŋa luŋ.

⁵Mannono luŋ obino pi gin igeno wunu ame okano pirwu i polo, a rik iwinyo wunu pire con i kop me ateni, ame en amut aber

⁶ame obino baŋwu. Tye daŋ a nyayo nyige kede doŋo i wi podo luŋ i kite acellono, acalo tye atiye baŋwu, cakere i nino ame iwinyo wunu kede, eka ite niaŋ wunu i kica Obaŋa iyi ateni,

⁷kite a rik Epapira opwonyowu kede, ame en amiro wadwa ame omaro. En akony tic a Kricito pirwa ame genne.

⁸En daŋ ame otittiwa pi mar ame itye wunu kede i Cuny Acil.

⁹Cakere i nino ame owinyo iye pire, wan okwao Obaŋa pirwu a mom okeŋ, kun okwao ni iniaŋ wunu odoco i gin a en mito, kun ibedo wunu i ryeko kede niaŋ ducu ame Cuny Acil mio.

¹⁰En konywu, kwowu obed a myero baŋ Rwot, ame yomoro cunye odoco, kun itio wunu kwone tic luŋ abeco, dok daŋ imedde wunu i ŋeyo Obaŋa.

¹¹Obaŋa jiŋwu kede teko luŋ ame rwatte kede twerrere me kwogo, me ikanyakino dok idi wunu cunywu i yore luŋ i yomcuny.

¹²Mi wunu pwoc baŋ Obaŋa Papo ame omiowa twer me nywako jami ame bedo i lero, ame en bino miyo jo mere acil.

¹³En olakorowa oko iya i te bwoc a piny acol, eka te kobowa i te loc a Wode ame emaro.

¹⁴Lakorowa i bal kede weko balwa ya i baŋe.

¹⁵Kricito obedo cal ame nyuto Obaŋa a mom nen, atin kao me gin Obaŋa oketo luŋ;

¹⁶pien jami luŋ aluŋa rik oketo pi twerrere, gin a tye i polo kede gin a tye i wi lobo, gin a nen kede gin a mom nen, naka wegi kome me loc kede wegi dito, kede oloc, kede wegi twer. Jami ducu rik oketo pi twerrere dok daŋ pire.

¹⁷En ame okwoŋo nyim jami luŋ aluŋa, dok daŋ i en jami ducu onotte karacel.

¹⁸En wic, lwakjo oye en obedo kome. En obedo ageyi, en ogeo ya i akina jo oto, me en tel yo i kin jami luŋ.

¹⁹Pien Obaŋa i kite ame en tye kede i yore luŋ oye bedo i en;

²⁰dok daŋ oye dwoggo jami luŋ baŋe i Kricito, gin ame tye i wi lobo kede gin ame tye i polo, kun okelo kuc pi remo me to mere i kom yataria.

²¹Wun rik ipokere wunu oko kede Obaŋa, rik wun okworrere i tamwu, kun itimo wunu tim areco.

²²Cite aman doŋ pi to a Wode ame rik odoko dano, en odwoggowu oko baŋe, me ekelwu i nyime ame icil wunu, dok daŋ itye wunu aboŋo balloro i komwu, ame kopporo arac mom i komwu.

²³Medde bedo wunu kede iyee, kun icuŋ wunu ikiŋ, dok imoko wunu a mom ileŋere i gen me amut aber ame iwinyo wunu, ame orabo baŋ ginaketa luŋ a tye i te polo, dok daŋ ame an Paulo rik adoko atic pire.

²⁴Aman an gira alelo alela i can ame aneno pirwu, pien pi rem ame an atye akanyo i koma, akonyo me tyeko gin ame orem i can a Kricito pi kome, ame lwak jo oye en.

²⁵Pire an rik adoko atic ame konyo lwak man pi tic ame Obaŋa omia pirwu, me miyo kop Obaŋa ŋeye odoco.

²⁶En muŋ ame okanne pi kare alac baŋ lwagi jo apol ata, ento aman doŋ Obaŋa omio onen oko kannaler baŋ jo mere.

²⁷Obaŋa gire i mittere kene otamo me miyo jo mere ŋeyo kit ame muŋ man pire dit kede iyi akina Orok, dok me kwogo adwoŋ. Muŋŋono ene, ni, Kricito tye yiwu; mano mio ibedo wunu kede gen me nywako kwogo Obaŋa.

²⁸Wan orabo pi Kricito kun okwenyoro jo ducu, dok daŋ opwonyo jo luŋ i ryeko ducu, me okel dano acel acel i nyim Obaŋa ame ocwiny i Kricito.

²⁹Man en gin omio alolle atek, kun akanyakino kede teko mere adwoŋ a tye atic i yia.