Read lango Jo Kolocai 3 Bible Online

Jo Kolocai 3 - lango bible

Jo Kolocai 3

¹Acalo rik doŋ icer wunu karacel i Kricito, ket wunu doŋ cunywu i kom jami a tye malo, kan ame Kricito tye iye i kabedo me kwogo i laŋet Obaŋa tuŋ cem.

²Ket wunu cunywu i kom jami a tye malo i polo ento mom i kom jami me lobo.

³Pien rik ito wunu oko, kwowu aman doŋ okano oko karacel i Kricito baŋ Obaŋa.

⁴Ka Kricito ame en obedo kwowa bino nen, wun daŋ ibino nen wunu i kwogo karacel kede.

⁵Pi mano, nek wunu doŋ oko gigi mogo me lobo a tye i yiwu: coco, caro, mit me kom, agoma yic arac, kede woro me jami; pien woro me jami rom aroma kede woro cal jogi.

⁶Akemo Obaŋa bino pi kodi timmono i kom jo a mom winyo doge.

⁷Kodi tim-mi wun daŋ rik ibeo wunu iye i kare a gin obedo kit kwowu ikome.

⁸Ento aman doŋ bol wunu magi luŋ oko; akemo, kecyic, raccuny, ayet, kede kop me lewic myero kur winyere i dogwu.

⁹Kur ibwolle wunu dok kenwu kenwu, pien doŋ ityeko wunu gonyo oko kwowu me anywalli kede timmere,

¹⁰ite ruko wunu dano anyen ame Acwec tye a roco i ŋec anyen me dwoko i callere.

¹¹Kannono mom dok bedo iye apokapoka i kin jo Grik kede Ojudaya, ŋat oliro kede a mom oliro, amyere moro a mom ŋeo leb, rok odoŋ cen, opii, kede ŋat a loye kene, pien Kricito ojoo gin luŋ, dok daŋ tye i gin luŋ.

¹²Aco wun ibedo wunu jo ame Obaŋa oyero, jo acil ame Obaŋa maro; pi mannono, rukere wunu doŋ i cuny acwer pi can a dano wadwu, kica, mwolo, woro kede diyo cuny.

¹³Di wunu cunywu ŋat acel acel i kom awottere, kun itimo wunu kica i akinawu kenwu i kom balwu. Ka ŋattoro i akinawu tye kede kopporo i kom ŋat ocele, timere kica i kom bal myero bed tye acalo Rwot otimowu kica.

¹⁴Ento akato magu luŋ, ruk wunu mar. Mar keken en atweo jami luŋ, noto karacel ame owok aber.

¹⁵Mi wunu kuc a Kricito ame rik olwoŋowu iye i kom acel, olo cunywu, eka ite bedo wunu jo a mio pwoc i kare luŋ.

¹⁶Kop a Kricito myero bed i yiwu aber odoco ka ipwonyere wunu kenwu kenwu dok ijukere wunu i ryeko luŋ ame Obaŋa omiowu. Dok daŋ ka iwero wunu jabuli, wer me pako Obaŋa kede werrogo ocele me dini, wer wunu baŋ Obaŋa kede pwoc i cunywu.

¹⁷Gin luŋ ame itio wunu i kop onyo i timmogo, ti wunugi luŋ i nyiŋ Rwot Yecu, kun imio wunu pwoc baŋ Obaŋa Papo bea baŋe.

¹⁸Wun mon, miye wunu i te loc a cogwu, pien mano en a myero i akina jo ame tye i Rwotwa.

¹⁹Aco wun co, mar wunu monwu, wek wunu kolo i komgi bedi.

²⁰Wun itino, winy wunu onywalwu i kop luŋ, pien kodi timmono yomoro yi Rwot.

²¹Wun papo, kur iter itinowu kolokolo, naka mio cunygi balle oko.

²²Wun opii, winy wunu odoŋewu me loba man i kop luŋ i cuny acel, mom i tic a yeŋo waŋ, me yomoro ka cuny dano keken, ento i cuny a lworo Rwot.

²³I ticcoro ame itio wunu, ti wunu aber i cunywu luŋ acalo itiyi wunu Rwot, ento mom pi dano.

²⁴Ŋe wunu ni ibino nywako wunu jami ame Rwot oyiko pi jo mere acalo ocarawu. Wun opii a Rwotwa Kricito.

²⁵Pien atim gin arac, obino daŋ cule pi gin arac ame en otimo, pien Rwot mom poko i akina jo.