Read lango Jo Kolocai 4 Bible Online

Jo Kolocai 4 - lango bible

Jo Kolocai 4

¹Wun wegi opii, ti wunu i yo atir a rorom, kun iŋeo wunu ni, wun daŋ itye wunu kede adwoŋwu malo i polo.

²Miye wunu atek i kwayo Obaŋa, kur inin wunu iye; mi wunu pwoc daŋ.

³Kwa wunu pirwa daŋ, me Obaŋa yabbiwa doggola me rabo muŋ i kom Kricito, pien pire, en omio an atye i buc kan,

⁴me arab i kit a myero, ami ŋeye odoco.

⁵Ti wunu i ryeko meicel i nyim jo ame tye oko; caa ame inwoŋo wunu, ti wunu kede aber.

⁶Kopwu myero bed ame kado oromo aber dok amit, me iŋe wunu kite a myero idok wunu kede i peny a ŋat acel acel.

⁷ Ominwa Tukiko ame omaro, ame obedo atic a genne, dok amiro wadwa i Rwot, bino tittiwu kop luŋ i koma.

⁸Acwae baŋwu pi kop man ikome, me miwu iŋe wunu kite ame wan otye kede, dok cuk cunywu.

⁹Acwae gin kede ominwa ocele ame omaro, Onesimo; en daŋ genne, dok en ŋat acel oya i baŋwu. Gin bino tittiwu ginnoro ducu ame otimere kan.

¹⁰Abuc wadwa Arisitako omotowu, kede Marako okeo a Baranaba ame atyeko cikowu pire; ka en otuno baŋwu, jole wunu aber,

¹¹dok kede Yecu ame nyiŋe ocele Yucito, daŋ omotowu. Jo-nu adek-k i keken, gin Ojudaya ame tio karacel kedwa kan i loc Obaŋa. Gin okweo cunya meicel.

¹²Epapira amiro a Yecu Kricito ame ŋat acel a daŋ oya i baŋwu, daŋ omotowu. I kwaccere me kare luŋ, en po pirwu atek ateka, me iniaŋ wunu i gin luŋ ame Obaŋa mito aboŋo kala akala.

¹³An cadennere ame amoko ni en atic atek pirwu kede jo a tye Laodikia kede Kerapoli.

¹⁴Dakatal Luka ame omaro kede Dema daŋ omotowu.

¹⁵Cwa wunu amotta baŋ omegowa a tye i Laodikia kede baŋ Nimpa daŋ, naka lwak jo oye Kricito a cokere i ode.

¹⁶Ka waraga man doŋ otyeko kwano oko i akinawu, myero imi wunu kwan daŋ baŋ lwak jo oye Kricito a tye i Laodikia; wun daŋ kwan wunu waraga oya i Laodikia.

¹⁷Kobbi wunu Arakipo ni, myero enen ni ecobo tic a rik omie i Rwot.

¹⁸An Paulo amotowu i ciŋa. Wiwu kur wil i jegerena. Winyo Obaŋa bed kedwu.