Read lango 1 Jo Tecalonika 1 Bible Online

1 Jo Tecalonika 1 - lango bible

1 Jo Tecalonika 1

¹Waraga man oya i baŋ Paulo gin i Silvano, kede Temoteo. Baŋ Iwak jo oye Kricito ame bedo i Tecalonika ame tye i Obaŋa Papo kede Rwotwa Yecu Kricito. Winyo kede kuc obed baŋwu.

²Wan opwoo Obaŋa didik pirwu luŋ kun otuco nyiŋwu i kwacwa me kare luŋ,

³kun opoo i kite ame iketo wunu kede iyeewu i tic i nyim Obaŋa Papawa, kede kite ame icanne wunu pi mar, karacel kede kite ame idio wunu kede cunywu pi genwu i Rwotwa Yecu Kricito.

⁴Omegowa ame Obaŋa maro, wan oŋeo ni Obaŋa doŋ oyerowu oko,

⁵pien amut aber ame orabo baŋwu, rik mom obino baŋwu i kop keken ento kede teko daŋ, kede i Cuny Acil, kun onwoŋo odonyo atut i cunywu. Wun iŋeo wunu aber kite ame wan obedo kede baŋwu pi konyowu.

⁶Wun daŋ rik icako wunu potto kitewa kede mea Rwot, pien igamo wunu koppere i dye awunawuna adwoŋ a kun ilelo wunu i yomcuny ame Cuny Acil mio.

⁷Man omio idoko wunu anen baŋ jo luŋ oye Yecu ame tye i Makedonia kede Akaya.

⁸Pien imio wunu kop a Rwot owinyere, mom ka i Makedonia kede Akaya keken, ento kop i kom iyeewu i kom Obaŋa doŋ olal i kabedo luŋ, ame wan mom dok oromo kobo ginnoro iye.

⁹Pien gin ikomgi onyao kop i komwa, kite a rik ijolowa wunu kede, naka kite ilokere wunu kede baŋ Obaŋa, kun iweko wunu cal jogi pi woro Obaŋa akwo, dok me ateni,

¹⁰dok ikuro wunu Wode ame bino dwogo i polo, a rik en ocero iya i akina jo oto, en Yecu ame olarowa i akemo Obaŋa ame bino tuno.