Read lango 1 Jo Tecalonika 2 Bible Online

1 Jo Tecalonika 2 - lango bible

1 Jo Tecalonika 2

¹Omegowa, wun ikomwu iŋeo wunu ni, binowa baŋwu rik mom oke nono.

²Kadi bed wan oneno can dok otimowa tim me lewic i Pilipi acalo iŋeo wunu, kadi pyem obedo dwoŋ, Obaŋawa omiowa tekcuny me rabbiwu amuttere aber kannaler.

³Pien kop ame wan okelo mom oya i tam ogom onyo a mom olony, goba daŋ mom iye.

⁴Ento kite acalo Obaŋa doŋ otyeko pwoyowa, ote miyowa amut aber me araba, wan daŋ doŋ ote rabo amannono, mom pi yomoro cuny dano, ento pi yomoro cuny Obaŋa ame ŋio yiwa.

⁵Wun iŋeo wunu ni, wan rik mom olebo kop abeco nono, mom okano tamwa pi nwoŋo lim, Obaŋa en cadenwa.

⁶Mom daŋ oyenyo kwogo i baŋ dano moro, kadi i baŋwu onyo i baŋ jo ocele; kadi bed onwoŋo otye i twer me keto peko i komwu, pien wan okwena a Kricito.

⁷Ento rik omwol i kinwu acalo toto a gwoko itino mere.

⁸Parowu ocirowa meicel, omio rik mom omito miyowu ka amut aber keken ame oya i baŋ Obaŋa, ento anaka wan i komwa omiye baŋwu, pien omarowu meicel.

⁹Omegowa, itwero wunu po kite ame nwaŋ ocanne kede i tic, i kare ame orabbiwu amut aber ame oya i baŋ Obaŋa, otio dyeceŋ kede dyewor me kur oket peko i kom ŋattoro i akinawu.

¹⁰Wun ocadenwa, kede Obaŋa daŋ ŋeo kite ame wan obedo kede acil dok a kitewa atira, aboŋo kopporo ame oloowa i nyimwu wun jo oye Yecu.

¹¹Dok iŋeo wunu kite ame obako kede dogwa baŋwu, kun otero ŋat acel acel i akinawu, ojiŋo cunywu acalo apap kede itino mere. Dok ocikowu ni,

¹²ilub wunu kite kwo a myero baŋ Obaŋa ame olwoŋowu i loccere kede i kwogo mere.

¹³Man en omio wan opwoo Obaŋa teretere, pien cakere ame igamo wunu kop Obaŋa ame iwinyo wunu i baŋwa, mom ijolo wunu acalo kop a dano, ento acalo kop Obaŋa. Kop Obaŋa gire ateni, tye daŋ ka tic i yiwu wun jo ame oye Yecu.

¹⁴Omegowa, wun daŋ ikoporo wunu kite a Iwak jo oye Obaŋa luŋ a tye i Kricito Yecu, i kabedo luŋ ame tye i Judaya, pien wun daŋ ineno wunu can i baŋ jowu ikome a rom i en a gin oneno i baŋ Ojudaya,

¹⁵ame nwaŋ gin oneko Rwot Yecu kede odwarpiny, ote ryemowa daŋ oko. Gin mom oyomoro cuny Obaŋa, cite opyem i jo luŋ,

¹⁶kun ogeŋowa kop baŋ Orok me gin larre. Mano omio gin omedo poŋo balgi apoŋa. Ento akemo Obaŋa doŋ obino i komgi atwal.

¹⁷Omegowa, ka rik opokowa kedwu pi kare anok, i kom ento mom i cuny, wan otemo meicel kede mit adwoŋ me nwoŋo yo me dok onenne wunu waŋ i waŋ.

¹⁸Rik wan omito bino baŋwu. An Paulo atemo tyen apol, ento Catan ogeŋowa oko.

¹⁹Pien genwa kede yomcunywa kede tok kwogo me nattewa i nyim Rwot Yecu Kricito i dwogo mere, en gin aŋo? Mom wun?

²⁰Pien wun ikelliwa wunu kwogo kede yomcuny.