Read lango 1 Jo Tecalonika 3 Bible Online

1 Jo Tecalonika 3 - lango bible

1 Jo Tecalonika 3

¹A doŋ oneno ni mom oromo diyo cunywa, omiye me doŋ oko cen kenwa i Atene,

²eka ote oro baŋwu Temoteo, en ominwa kede atic Obaŋa i rabo amut aber a Kricito, me ojiŋwu atek dok odi cunywu i kom iyee mewu;

³me dano moro kur yeŋere i can magu. Wun ikomwu iŋeo wunu ni, cannogo myero pot i komwa.

⁴Pien i kare ame wan otye kedwu otittiwu con ni olwaŋnoro obino neno can, ame daŋ doŋ otimere acalo iŋeo wunu.

⁵A doŋ aneno ni mom aromo diyo cunya, aoro dano wek aniaŋ i kom iyeewu, pi Iworo ni onyo ca ŋit Abit jo obitowu oko te miyo ticwa ke nono.

⁶Ento amanni Temoteo doŋ odwogo baŋwa kun oya i baŋwu. En odwoggiwa kop amit i kom iyee kede marwu, dok daŋ ni ipo wunu pirwa didik, kun iparo wunu nenowa acalo wan daŋ oparo nenowu.

⁷Omegowa, mano en omio cunywa doŋ okwe i komwu pi iyeewu, i can kede i awunawuna ame owunowa kede luŋ;

⁸pien aman wan obedo kwo ka icuŋ wunu atek i Rwot.

⁹Kara kit pwoc aŋo a porrewa miyo baŋ Obaŋa pirwu, i yomcuny luŋ ame olelo kede pirwu i nyim Obaŋa?

¹⁰Iwor kede iceŋ wan okwao Obaŋa atek meicel pi neno waŋwu, me omed gin a pwod orem i kom iyee wu.

¹¹Obaŋa Papawa ikome, kede Rwotwa Yecu Kricito, myero miwa onwoŋ yo me bino baŋwu.

¹²Dok Rwot miwu imedde wunu atek meicel i marre, ŋat acel acel baŋ awottere kede baŋ jo luŋ, i kite a wan omarowu kede,

¹³wek en jiŋ cunywu ibed wunu jo acil aboŋo kopporo a loowu i nyim Obaŋa Papawa, i kare me dwogo a Rwotwa Yecu kede jo mere ducu acil.