Read lango 1 Jo Tecalonika 4 Bible Online

1 Jo Tecalonika 4 - lango bible

1 Jo Tecalonika 4

¹Me agikki omegowa, okwaowu dok obako dogwa baŋwu i Rwot Yecu ni, imedde wunu anyim nakanaka i kite kwo ame imako wunu i baŋwa, ame yomoro cuny Obaŋa, ame itye wunu ka lubo-ni.

²Pien wun iŋeo wunu cik ame rik omiowu pi Rwot Yecu.

³Gin ame Obaŋa mito en ene, ni idok wunu jo acil: iwek wunu kite me coco,

⁴ŋat acel acel myero ŋe bedo kede cege[1] kene i cuny acil kede me woro.

⁵Kur imi wunu mit me kom bwowu oko bala Orok a mom ŋeo Obaŋa.

⁶Ŋattoro kur bal baŋ ominnere onyo bwole i kop man; pien Rwot culo kwor i kop magi ducu acalo wan rik okobbiwu dok daŋ okwenyorowu.

⁷Obaŋa mom olwoŋowa pi jebere i bal, ento me bedo jo acil.

⁸Kite-nono ŋat ame kwero cik man, mom okwero dano ento okwero Obaŋa ame omiowu Cuny Acil.

⁹Kop a mako mar me omego, mom myero coyiwu kopporo iye, pien wun ikomwu Obaŋa otyeko pwonyowu oko me marre kenwu kenwu,

¹⁰daŋ doŋ imaro wunu omego luŋ me Makedonia ducu. Ento abako doga omegowa, medde wunu iye nakanaka,

¹¹dok ket wunu cunywu i bedo mot. Ŋat man opar pi ticcere, kun daŋ tio kede ciŋe acalo nwaŋ ocikowu,

¹²me jo ame mom ŋeo Yecu pwo kitewu dok ginnoro kur rem i baŋwu.

¹³Omegowa, wan mom omito ibed ame ikwia wunu kop i kom jo a doŋ oto, mio ibino wunu bedo i cwercuny bala jo ocele a mom i gen.

¹⁴Wan oye Yecu oto, eka te cer. Jo ame oto kun oye Yecu daŋ amannono, Obaŋa bino kelogi karacel i Yecu.

¹⁵Okobbiwu kop a Rwot okobo ni, wan jo akwo ame odoŋ naka i nino me dwogo a Rwot, mom obino telo nyim jo a doŋ oto.

¹⁶Rwot ikome bino yitto piny kun ya i wi polo kede lwoŋo me twer, ame dwon amalaika adittere bino winyere, gwara Obaŋa bino kok. Jo ame yam oto i Kricito gin en a bino kwoŋo cer,

¹⁷icennere wan jo akwo, ame odoŋ, obino gwarowa karacel kedgi i pol, wek orwatte i Rwot i dye yamo; wan doŋ ote bino bedo baŋ Rwot nakanaka.

¹⁸Kwe wunu cunywu kenwu kenwu nakanaka i kop man.