Read lango 1 Jo Tecalonika 5 Bible Online

1 Jo Tecalonika 5 - lango bible

1 Jo Tecalonika 5

¹Ento kop a mako kare, kede nino, omegowa, mom myero aco pire baŋwu,

²pien wun ikomwu iŋeo wunu aber ni, nino a Rwot bino bino acalo akwo ame bino dyewor.

³Ka jo kobo ni, “Piny okwe, ginnoro arac mom,” to bino tuyogi atua bala rem me nywal ame bino i kom dako ayac, ka larre bino loyogi oko.

⁴Ento wun omegowa, mom itye wunu i piny acol, ame twero miyo nino-nu tuowu atua bala akwo.

⁵Pien wun ducu ibedo wunu jo me ceŋ, jo me dyeceŋ; wan mom jo me dyewor onyo me piny acol.

⁶Pi mano, mom myero inin wunu calo jo ocele, ento bed wunu neno kun igwokere wunu.

⁷Pien jo ame nino, gin nino dyewor, jo a mer koŋo, mer daŋ dyewor,

⁸ento wan jo me dyeceŋ, myero obed ame ogwokere. Oruk wunu iyee kede mar bed nyonyo geŋo korwa, oruku daŋ gen me larre, bed tok nyonyo wiwa me romo.

⁹Pien Obaŋa mom oyerowa me akemo mere pot i komwa, ento me olarre pi Rwotwa Yecu Kricito,

¹⁰ame con oto pirwa, me wek kadi oneno onyo onino, obin obed wunu kwo karacel kede.

¹¹Pi mano, jiŋ wunu cunywu kenwu, ite daŋ konyere wunu i doŋo cunywu, ŋat man kede wadgi, acalo itye wunu ka timo.

¹²Obako dogwa baŋwu omegowa, wor wunu jo ame tye ka tic iyi akinawu ame canne pirwu i Rwot, kun gin pwonyowu.

¹³Ket wunu kwogo adwoŋ i komgi pi tic megi, kun imaro wunugi. Bed wunu i kuc kenwu kenwu.

¹⁴Obako dogwa baŋwu omegowa, juku jo ame balo kare aboŋo tic, jiŋ wunu cuny jo a cunygi toco, kony wunu jo agoro, di cunywu i kom jo ducu.

¹⁵Nen wunu ni ŋattoro i akinawu mom oculo gin arac kede gin arac, ento i kare luŋ tem wunu timo ber i akinawu kenwu kede baŋ jo luŋ.

¹⁶Lel wunu i kare ducu.

¹⁷Kwa wunu Obaŋa aboŋo keŋ.

¹⁸Mi wunu pwoc i jami ducu, pien mano en ame Obaŋa mito i baŋwu i Kricito Yecu.

¹⁹Kur igen wunu Cuny Acil tiyo ticcere i yiwu,

²⁰kur ica wunu kop odwarpiny,

²¹bed wunu iwaŋ abit i jami luŋ; mak wunu atek gin ducu aber,

²²kwer wunu tim luŋ areco.

²³Obaŋa ikome won kuc mi idok wunu jo acil i yore luŋ, ogwok cunywu kede tipowu kede komwu me ibed wunu aboŋo kopporo a loowu i kare me dwogo a Rwotwa Yecu Kricito.

²⁴Ŋat olwoŋowu genne; bino timo man pirwu.

²⁵Omegowa, kwa wunu Obaŋa pirwa.

²⁶Mot wunu omego ducu kede amot me mar.

²⁷Acikowu atek i nyin Rwot, myero ikwan wunu waraga man baŋ omego luŋ.

²⁸Winyo a Rwotwa Yecu Kricito bed kedwu.