Read lango Yocwa 1 Bible Online

Yocwa 1 - lango bible

Yocwa 1

¹I ŋe to a Muca ame obedo amiro a Rwot, Rwot okobbi Yocwa wot a Nuni, amiro a Muca ni,

²“Amirona Muca doŋ oto oko; pi mannono yin aman doŋ ya iwot Jordan-ni, yin karacel kede jo man luŋ, me idony wunu i lobo ame an amiyogi, gin jo Icrael.

³Kabedo acel acel ame tyenwu bino nyono nwoŋo doŋ atyeko miyowu oko kite a rik aciko kede baŋ Muca,

⁴Cakere i tim kede i Lebanon kan, tuno naka i twoŋ kulo adwoŋ me kulo Efurate, lobo a jo Kitti luŋ naka dok kede i Nam Adwoŋ ame tye tutuŋ to, mano luŋ bino bedo lobowu.

⁵Mom gire tye ŋattoro kadi acel ame bino cuŋ i nyimi pi kare me kwo meri luŋ. Abino bedo kedi arom aroma i kite a rik abedo kede Muca; mom abino boli, dok mom abino weki ata.

⁶Cuŋ atek ame cunyi nwaŋ pien yin ibino miyo jo man leo lobo ame rik akwoŋo pire baŋ kwarigi ni abino miyogi.

⁷Yin myero ka icuŋ atek ame cunyi nwaŋ meicel, kun daŋ igwokere i cobo cik luŋ kite a rik amirona Muca ociki iye; kur igak iye oko i te dok i ciŋi tuŋ cem onyo tuŋ cam, me wek nyimi bed a myero i jami luŋ i kabedo luŋ ame iwoto iye.

⁸Buk cik-ki koppere mom bino rwenyo i dogi, ento bino bedo i cunyi dyeceŋ kede dyewor, me wek igwokere icobo kop luŋ kite ame ocoo kede i yie. Mannono bino miyo yori bedo aber, eka nyimi te bedo a myero i jami luŋ.

⁹Mom aciki? Yin cuŋ atek ame cunyi nwaŋ. Kur ibed alwor, cunyi daŋ kur poti, pien Rwot Obaŋani tye kedi i kabedo luŋ ame ibino wot iye.”

¹⁰Yocwa te ciko otel a lwak ni,

¹¹“Bebea wunu i dye gony, icik wunu jo ni, ‘Yik wunu pekewu me dwoko lao iyo, pien odoŋ i nino adek keken ibino wunu ŋolo Jordan, me iwot i gam wunu lobo ame Rwot Obaŋawu omiowu me bedo megwu.’ ”

¹²Yocwa te kobo baŋ jo a Reuben, jo a Gad kede nucu atekere a Manace, ni mano,

¹³“Poyo wunu kop ame rik Muca amiro a Rwot ocikowu kede ni, ‘Rwot Obaŋawu bino miyowu ka weo, dok bino miyowu lobo man.’

¹⁴Monwu, itinowu kede limwu luŋ bino doŋ i lobo ame Muca rik omiowu i ŋe Jordan, ento co luŋ i akinawu ame tek i romo bino kato loka kun omako jami lweny otelo kede nyim omegowu, me wot konyogi;

¹⁵naka waŋ ame Rwot omio weo baŋ omegowu, bala wun, dok gin daŋ ogamo lobo ame Rwot Obaŋawu amiyogi. Wun ite doŋ dwogo wunu i lobo ame omiowu, ite bedo wunu iye, en lobo ame Muca amiro a Rwot omiowu i ŋe Jordan tuŋ kide.

¹⁶Gin te dokki Yocwa ni, ‘Ginnoro luŋ ame icikowa iye, wan obino tiyo; dok kannoro luŋ ame ibino cwalowa iye, wan obino wot.

¹⁷Kite a rik owinyo kede Muca i kopporo luŋ, obino daŋ winyo megi kittono; Rwot Obaŋani en a myero ka bed kedi, kite a rik obedo i Muca.’

¹⁸Ŋattoro keken ame bino jem i gin iciko eka mom te winyo koppi, i ginnoro luŋ ame icike iye, dano-nono obino neko aneka. Yin myero ka icuŋ atek ame cunyi nwaŋ.”