Read lango Yocwa 10 Bible Online

Yocwa 10 - lango bible

Yocwa 10

¹I kare ame Adoni-jedek rwot me Jerucalem owinyo kite ame Yocwa omako kede Ai, eka te neko jo luŋ aluŋa, kun timo Ai kite ame otimo kede Jeriko kede rwottere; kede ka dok owinyo kite ame jo ame bedo i Gibeon oyiko kop me bedo i kuc i jo Icrael, kun gin obedo i akinagi,

²lworo omakogi meicel. Pien Gibeon rik boma adit ame rom aroma i boma ame Rwot bedo iye, dok daŋ onwoŋo dwoŋ meicel kato Ai oko, dok co iye luŋ daŋ onwoŋo jo atek.

³Mano te miyo Adoni-jedek rwot me Jerucalem ocwao kwena baŋ Oam rwot me Kebron, Piram rwot me Yarmut, Yapia rwot me Lakic, kede Debir me Eglon kun kobbigi ni,

⁴“Biye ikonya wunu, me olweny i kom jo Gibeon, pien gin oyiko kop me bedo i kuc baŋ Yocwa kede jo Icrael.”

⁵Eka rwode abic me jo Amor, rwot me Jerucalem, rwot me Kebron, rwot me Yarmut, rwot me Lakic kede me Eglon te cokere karacel, ote wot i monygi luŋ, wot guro Gibeon, lweny i kome.

⁶Jo Gibeon te cwayo kwena baŋ Yocwa i gony me Gilgal, kun kobbe ni, “Kur ikwany ciŋi oko i kom omironi, ru bino baŋwa, ilarwa, ikonywa, pien rwode a jo Amor luŋ ame bedo i lobo obedo kidikidi ocokere i komwa.”

⁷Yocwa karacel kede jo me lweny te ya i Gilgal i jo luŋ ame tek i lweny.

⁸Rwot ociko Yocwa ni, “Kur ilworgi, pien atyeko doŋ miyogi oko i ciŋi; mom tye lo moro ame bino cuŋ i nyimi.”

⁹Yocwa te ru bino oko i komgi, kun oya i Gilgal te wot dyewor benebene.

¹⁰Rwot te babaŋogi oko i nyim jo Icrael, gin te nekogi atek i Gibeon, ote ryemogi i yo ame dok malo tutuŋ Bet-koron; gin te nekogi naka i Ajeka kede Makkeda.

¹¹I kare ame gin tye ariŋo oko i nyim jo Icrael, kun oluŋere i luŋ me Bet-koron, Rwot te cocoro twoni gweŋe mogo adoŋodoŋo i komgi ame oya i polo tuno naka i Ajeka twal, gin te to oko. Wel jo ame pee oneko obedo bup meicel kato en ame jo Icrael oneko i pala lweny.

¹²I kare-nono Yocwa te kop i Rwot i nino ame Rwot omio iye jo Amor i ciŋ jo Icrael; en te kop kede kun jo Icrael winyo, ni, “Yin ceŋ koŋ icuŋ i Gebeon, kede yin dwe daŋ cuŋ i luŋ me Aijalon.”

¹³Ceŋ daŋ te cuŋ karacel, dwe daŋ olirakino kakare ituno ka rokwa oculo kwor i kom okworgi. Man mom ocoo i buk a Jacar? Ceŋ obir i dye polo, kun mom poto oyotoyot pi nino ame buco romo acel twal.

¹⁴Mom ru onen nino moro a rom i nino-nono cakere con tuno kede naka i kare man, ame Rwot owinyo iye dwon dano; pien Rwot olwenyo pi Icrael.

¹⁵Yocwa te dwogo karacel i jo Icrael luŋ i gony me Gilgal.

¹⁶Rwode abic te riŋo wot pono i gorogoro kidi me Makkeda.

¹⁷Jo te titti Yocwa ni, “Rwode abiccono onwonogi opono i gorogoro kidi i Makkeda.”

¹⁸Yocwa te dok iye ni, “Lor wunu kiddi adoŋo oko i dog gorogoro, ket wunu jo i ŋete me gwokgi.

¹⁹Cite wun kur ibed wunu kuno, wun ryem wunu okworwu, lweny wunu i jo ame odoŋ cen kur imigi odony i bomagi; pien Rwot Obaŋawu otyeko miyogi i ciŋwu.”

²⁰Kare a doŋ jo Icrael onekogi atek meicel, gin doŋ te tum oko, jo ame obwot i akinagi olaro boma mogo ame ocelo atek.

²¹Jo luŋ te dwogo i kuc baŋ Yocwa i gony i Makkeda; mom tye dano moro ame oŋamo doge i kom dano moro me Icrael.

²²Kare ame man doŋ otum, Yocwa te ciko jo ni, “Yab wunu doŋ dog gorogoro kidi, me iwot wunu rwode abiccono oko i gorogoro i kelgi wunu baŋa.”

²³Gin daŋ te timo amannono, ote wotto rwode abic ca oko i gorogoro, ote tero baŋ Yocwa; otero rwot me Jerucalem, rwot me Kebron, rwot me Yarmut, rwot me Lakic kede rwot me Eglon.

²⁴Kare ame gin doŋ okelo rwode abiccono baŋ Yocwa, Yocwa te lwoŋo co luŋ me Icrael, te ciko otel wi mony a rik owoto kede ni, “Bye wunu kan, me ibin icib wunu tyenwu i ŋut rwode magi.” Gin daŋ te bino cibo tyengi i ŋutgi.

²⁵Yocwa te kobbigi ni, “Kur ibed wunu alwor, cunywu daŋ kur poti, cuŋ wunu atek kun cunywu nwaŋ, pien Rwot bino timo kittono i kom okworwu luŋ ame ilweny wunu kedgi.”

²⁶Icennere Yocwa dok te cocobogi nekogi oko, te ŋabo komgi i wi yen abic, komgi te ri i wi yen naka otyeno.

²⁷Kare ame ceŋ doŋ mito poto, Yocwa te ciko ni myero kwany komgi oko i kom yen, bol i gorogoro kiddi ame rik gin opono iye; ote coko gweŋe adoŋodoŋo yido i dog gorogoro kidi-nono, ame daŋ pwod tye kuno naka onyoni.

²⁸I nino-nono Yocwa te mayo boma me Makkeda, te neko jo luŋ karacel kede rwottere i pala lweny; ojwero jo luŋ a tye iye ame moro mom obwot. Otimo rwot Makkeda kite a rik otimo kede rwot me Jeriko.

²⁹Yocwa te ya oko i Makkeda karacel kede jo Icrael luŋ, te kato i Libina te wot lweny i jo Libina.

³⁰Rwot dok te miyo jo-nono karacel kede rwodegi i ciŋ jo Icrael, gin te nekogi luŋ i pala lweny, moro mom obwot. Otimo rwot me Libina kite ame rik otimo kede abaka me Jeriko.

³¹Yocwa te dok ya oko i Libna karacel kede jo Icrael luŋ te kato i Lakic; gin te wot guro oko, ote lweny i komgi.

³²Rwot te miyo Lakic i ciŋ jo Icrael; i nino me aryo gin te mayo Lakic oko. Gin te neko jo iye luŋ i pala lweny, kite ame otimo kede i kom Libna.

³³Oram ame obedo rwot me Gejer te bino konyo jo Lakic, Yocwa te neke oko karacel i jo mere luŋ, naka moro mom obwot.

³⁴Yocwa dok te kato karacel i jo Icrael luŋ, oya oko i Lakic ote wot Eglon. Gin oguro ote daŋ lweny i komgi.

³⁵Gin te mako Eglon i ninonono, ote neko jo iye luŋ i pala lweny. I nino-nono ojwero jo luŋ iye, kite ame rik otimo i kom Lakic.

³⁶Yocwa karacel kede jo Icrael luŋ te ya oko Eglon, te wot i Kebron, ote wot lweny i komgi.

³⁷Gin ogamo ote jwero jo luŋ i pala lweny, kede rwottere, boma mere luŋ, kede jo mere, moro mom odoŋ, kite ame otimo kede Eglon, ojwero luŋ, anaka jo ame bedo iye.

³⁸Yocwa te doŋ dwogo cen i Debir karacel i jo Icrael luŋ, te ero lweny kedgi,

³⁹te gamo oko karacel kede abaka mere, kede boma mere luŋ. Gin te neko jo iye luŋ i pala lweny, ote daŋ jwero jo luŋ ame bedo iye, moro mom obwot kite ame rik otimo i kom Kebron, Libna kede obakki mege, en a daŋ otimo i kom Debir kede rwottere.

⁴⁰Yocwa rik te loyo lobo luŋ kittono, lobo obedo kidikidi, kede Negeb, lobo i piny kede lobo otiŋere malo, karacel kede rwodegi luŋ; mom oweko moro odoŋ, ento orweo jami ame iye luŋ aluŋa, kite ame Rwot Obaŋa a jo Icrael onwoŋo ociko.

⁴¹Yocwa oloogi cakere i Kadec-barnea tuno kede naka i Gaja, kede i lobo me Gocen luŋ tuno kede i Gibeon.

⁴²Yocwa omako rwodegi luŋ karacel kede lobogi daŋ, pien Rwot Obaŋa a jo Icrael olwenyo pi jo Icrael.

⁴³Icennere Yocwa te dwogo doŋ i gony ame tye i Gilgal karacel i jo Icrael luŋ.