Read lango Yocwa 11 Bible Online

Yocwa 11 - lango bible

Yocwa 11

¹Kare ame Jabin rwot me Kacor owinyo, ocwao kwena baŋ Yabab rwot me Madon, kede baŋ rwot me Cimron, kede rwot me Akcap,

²kede rwode luŋ i lobo obedo kidikidi ame onwoŋo tye tutuŋ anyarodi, kede i Araba tuŋ anyarolum kede Kinerot, i lobo i piny, kede i Naptor-dor tuŋ to,

³kede baŋ Kanaan ame onwoŋo tye tuŋ kide, kede tuŋ to, jo Amor, jo Kitti, kede jo Periji, karacel kede jo Jebuc ame bedo i lobo obedo kidikidi, kede jo Kivi ame tye i Kermon i lobo me Micpa.

⁴Gin te bino i monygi luŋ, twon monnyoro adwoŋ meicel, ame pol calo kwoyo me dog nam, kun otye aguragura kede gadigadi lweny apol ata.

⁵Obakki luŋ te cokere karacel, ote bino guro gonygi i ŋet pii me Merom me gin olweny i jo Icrael.

⁶Rwot ociko Yocwa ni, “Kur ilworgi, pien diki i kodi cawa-ni abino miyogi luŋ baŋ jo Icrael kun doŋ onekogi oko; ibino wunu ŋoŋolo odoŋe aguraguragi, dok ibino wunu waŋo gadigadi oko i mac.”

⁷Yocwa karacel kede jo mere luŋ me lweny te ru bino oko i komgi i ŋet pii me Meron eka ote poto oko i komgi.

⁸Rwot te miyogi i ciŋ jo Icrael ame te nekogi, te daŋ ryemogi tuno naka i Cidon Adwoŋ kede i Micerepotmaim, dok tuŋ kide tuno naka i luŋ me Micpa; te neko jo luŋ, moro mom obwot.

⁹Yocwa daŋ te timo kite ame Rwot ocike kede; oŋoŋolo odoŋe aguraguragi te daŋ waŋo gadigadigi oko i mac.

¹⁰I kare-nono Yocwa doŋ te dwogo cen, te gamo Kajor, te neko rwottere oko i pala lweny, pien Kajor rik onwoŋo boma adit, kabedo ame rik loo i lobonono luŋ.

¹¹Gin te neko jo iye luŋ i pala lweny, kun ojwero luŋ aluŋa, ame ŋattoro awe mom odoŋ iye, eka ote waŋo Kajor oko i mac.

¹²Yocwa rik te mayo boma a rwode-nogo luŋ, karacel kede rwodegi te nekogi oko i pala lweny kun jwerogi luŋ aluŋa, kite ame Muca amiro a Rwot onwoŋo rik ociko.

¹³Cite mom owaŋo boma moro ame onwoŋo ogero i wi tur, kono Kajor keken, en ame Yocwa owaŋo.

¹⁴Jami ayaka luŋ me boma-nono ducu, kede lim akwo, jo Icrael otero me bedo megi. Cite co luŋ gin oneko oko i pala lweny, tuno ka otyekogi, moro awe mom oweko odoŋ.

¹⁵Kite a rik Rwot ociko kede amiro mere Muca, Muca daŋ ociko Yocwa kittono, Yocwa te daŋ tiyo. I kom gin luŋ a Rwot rik ociko i Muca, mom tye moro ame Yocwa oweko a mom ocobo.

¹⁶Yocwa rik te mayo lobo-nono luŋ, lobo ame obedo kidikidi, Negeb luŋ, lobo Gocen, lobo a piny,

¹⁷cakere i kidi Kalak ame otiŋere odok tuŋ Ceir tuno kede i Baal-dag i luŋ me Lebanon i te kidi Kermon. Omako rwode luŋ, ococobogi, te nekogi oko,

¹⁸Yocwa obedo lweny i rwode-nono luŋ pi kare alalac.

¹⁹Boma moro oporo kop me kuc i jo Icrael obedo pe, kono ka Kivi keken ame onwoŋo obedo i Gibeon; omakogi luŋ i lweny.

²⁰Pien mano rik obedo tic a Rwot me miyo cunygi bedo nwaŋ ibino lweny i kom jo Icrael, me wek jwergi oko luŋ, kur timgi kica, ento tyekgi oko kite a rik Rwot ociko i Muca.

²¹I kare-nono Yocwa te bino weyo jo Anak oko i lobo obedo kidikidi i Kebron, Debir, Anab, kede lobo Juda luŋ ame obedo kidikidi, kede lobo Icrael luŋ ame obedo kidikidi. Yocwa ojwerogi luŋ, karacel kede bomagi luŋ.

²²Mom tye ŋattoro ame odoŋ i lobo a jo Icrael i kom jo Anak, gin odoŋ ka i Gaja, i Gat kede i Acidod.

²³Yocwa rik te mayo lobo luŋ kittono, kun lubo kop luŋ ame rik Rwot ociko baŋ Muca. Yocwa te miyo jo Icrael te doko megi kite ame opoko kede atekere atekere. Icennere doŋ lobo te kwe, lweny daŋ doŋ te bedo mom.