Read lango Yocwa 13 Bible Online

Yocwa 13 - lango bible

Yocwa 13

¹I kare ame Yocwa doŋ oti, ame mwaka me dittere doŋ bup, Rwot okobbe ni, “Nen ba, yin doŋ iti, dok mwaka me ditti doŋ bup, ento lobo ame myero bed megwu pwod odoŋ abup.

²Lobo ame pwod odoŋ ene: lobo me Priciti luŋ kede me a jo Gecur luŋ,

³cakere i kulo me Cikor ame tye tuŋ kide me Miciri, dok kede tuŋ anyarodi, tuno naka i waŋ lobo me Ekron; magi luŋ okwano baŋ jo Kanaan. Rwode a jo Piriciti tye abic, me Gaja, Acidod, Acikelon, Gat, kede Ekron; kede lobo a jo Ayi.

⁴Aco i tuŋ anyarolum tye lobo a jo Kanaan luŋ, kede Meara ame obedo me ajo Cidon tuno kede naka i Apek, kato i waŋ lobo a jo Amor,

⁵kede lobo a jo Gebal, kede Lebanon luŋ i tuŋ kide, cakere i Baal-gad ame tye i te kidi me Keromon, i dog yo ame woto Kamat;

⁶jo luŋ ame bedo i lobo ame obedo kidikidi, cakere i Lebanon wot kede i Micrepot-maim; mano Cidon luŋ. An ikoma abino ryemogi i nyim jo Icrael; ento yin pok lobo baŋ jo Icrael obed megi gin oleo, kite ame aciki kede.

⁷Pi mannono, aman yin doŋ myero ipok lobo man baŋ atekere aboŋwen, kede baŋ nucu me atekere a Manace, obed megi.”

⁸Jo Reuben kede jo Gad karacel kede nucu me atekere a Manace ocele otyeko nwoŋo lobo ame gin bino leyo me bedo megi ame rik Muca omiogi loka Jordan tuŋ kide, kite a rik Muca amiro a Rwot omiogi:

⁹cakere i Areor ame tye i dog luŋ me Amon, kede boma ame tye i dye luŋŋono, karacel kede lobo luŋ me Medeba, ame otiŋere, opette, tuno naka i Dijon;

¹⁰kede boma a Cikon abaka a jo Amor, ame en obedo abaka me Kecbon, tuno i waŋ lobo a jo Ammon;

¹¹kede Gilead, kede lobo a jo Gecur kede jo Maaka, kede kidi Kermon luŋ, kede Bacan luŋ tuno kede i Caleka;

¹²kede lobo abaka Og luŋ ame loo lobo Bacan kun bedo i Aciterot kede Edrei; en kene ame rik odoŋ i akina jo Repa. Muca onwoŋo oloo magi, te daŋ mayo lobogi oko.

¹³Cite jo Icrael rik mom oryemo jo Gecur kede jo Maaka. Jo Gecur kede jo Maaka pwod bedo i akina jo Icrael naka atot tin.

¹⁴Atekere a jo Levi keken en ame Muca rik mom omio dul lobo moro me bedo megi; gin ame obedo megi, obedo mot ame owaŋo i mac baŋ Rwot Obaŋa me Icrael, kite ame rik okobbe kede.

¹⁵Muca rik omio lobo me alea baŋ jo Reuben kun lubo doggolagi.

¹⁶Lobogi rik ocakere i Areor ame tye i dog luŋ me Amon, kede boma ame tye i dye luŋ nono kede lobo luŋ i ŋet Medeba, ame otiŋere, opette;

¹⁷karacel kede Kecbon kede boma mere ducu ame tye i lobo otiŋere, opette; Dibon, Bamot-baal, Bet-baal-meon,

¹⁸Yakac, Kedemot, Mapaat,

¹⁹Kiriataim, Cibma kede Yeret-cakar i wi kidi me luŋ nono,

²⁰kede Bet-peor, kor kidi me Piciga, kede Bet-yecimot,

²¹gin boma luŋ me lobo ame otiŋere, opette, kede lobo a Cikon abaka me Amor luŋ ame rik obedo abaka me Kecbon, ame Muca oloo karacel kede otel me Midian, Evi, Rekem, Cur, Kur, kede Repa, ame gin obedo rwode a jo Cikon ame bedo i lobo-nono.

²²Balaam wot a Beor ame obedo emuroko, jo Icrael oneko oko i pala lweny i akina jo ocele luŋ ame oneko.

²³Waŋ lobo a jo Reuben obedo Jordan, mano en onwoŋo waŋ lobogi. Man lobo ame jo Reuben ogamo me bedo megi karacel i bomagi kede paccigi kun lubere i doggolagi.

²⁴Muca rik omio lobo baŋ jo me atekere a jo Gad me bedo megi, kun lubere i doggolagi.

²⁵Lobogi rik obedo Yajer, kede boma ducu me lobo Gilead, karacel kede nucu lobo a jo Ammon, tuno i Areor, ame tye tuŋ kide me Rabba,

²⁶kede cakere i Kecbon tuno i Ramat-micpe kede Betonim, kede dok cakere i Makanaim tuno kede i lobo Debir,

²⁷kede Bet-aram, Bet-nimra, Cukot kede Japon, ame tye i luŋ a en dul lobo odoŋ luŋ ame Cikon abaka me Kecbon rik loo, kun waŋ lobo mere obedo Jordan, tuno i agikki nam me Kineret i tuŋ pinnyere, ame tye loka Jordan tuŋ kide.

²⁸Man en lobo ame jo Gad onwoŋo me bedo megi, karacel i bomagi, kede paccigi, kun lubere i doggolagi.

²⁹Muca rik dok te miyo lobo baŋ nucu atekere a jo Manace me bedo megi; opoko baŋ nucu atekere a jo Manace kun lubere i doggolagi.

³⁰Lobogi ocakere i Makanaim kun mako Bacan luŋ, kede kan ame Og abaka me Bacan rik loo luŋ, kede boma luŋ me Jair ame tye i Bacan, boma pyerabicel,

³¹karacel kede nucu me lobo Gilead, kede Aciterot kede Edrei, ame gin boma ame tye i Bacan i kan ame rik Og loo; magi rik opoko baŋ jo a Makir wot a Manace pi nucu a jo Makir, kun lubere i doggolagi.

³²Magi gin lobo ame Muca opoko i bar me Moab, loka Jordan tuŋ kide me Jeriko.

³³Ento atekere a jo Levi, Muca mom opokigi lobo moro me bedo megi; Rwot Obaŋa me Icrael en gin ame gin rik onwoŋo me bedo megi, kite a rik okobbigi.