Read lango Yocwa 14 Bible Online

Yocwa 14 - lango bible

Yocwa 14

¹Magi gin lobo ame jo Icrael onwoŋo i lobo me Kanaan me bedo megi, ame alamdog Eliejer kede Yocwa wot a Nuni, karacel kede odoŋe me doggola a kwarigi me atekere a jo Icrael opoko baŋgi.

²Gin opoko me bedo megi kun okwanyo kede kwir, kite ame Rwot rik ociko kede Muca, pi atekere aboŋwen kede nucu.

³Pien onwoŋo rik Muca otyeko miyo lobo baŋ atekere aryo kede nucu loka Jordan me bedo megi; ento mom omio lobo moro i akinagi me bedo me a jo Levi.

⁴Pien jo a Yucepu rik obedo atekere aryo, jo Manace kede jo Epraim. Jo Levi rik mom opokkigi lobo me bedo megi, cite omiogi ka boma keken me bedogi kede bar me kwayo dokgi kede kit limgi ocele.

⁵Jo Icrael opoko lobo kite ame rik Rwot ociko kede Muca.

⁶Icennere jo Juda te bino baŋ Yocwa i Gilgal. Kaleb wot a Jepunne me a jo Keniji okobbe ni, “Iŋeo kop a rik Rwot okobo baŋ Muca dano Obaŋa i Kadec-barnea i komi kede i koma,

⁷Rik onwoŋo mwakana tye pyeraŋwen i kare ame amiro a Rwot oora me ya i Kadec-barnea me wot roto piny, eka ate dwogo en kop ame rik tye i cunya.

⁸Omegona ame rik owoto kedgi omio koyo oonyere i kom jo; cite an alubo Rwot Obaŋana kede cunya luŋ.

⁹I nino-naca rik Muca te kwoŋ kun kobo ni, ‘Ateteni, lobo ame tyeni onyono bino bedo meri ame ibino nwoŋo me bedo megi atwal karacel kede ikwai, pien ilubo Rwot Obaŋana kede cunyi luŋ.’

¹⁰Aman koŋ doŋ inen, Rwot gire ogwoka pwod atye kwo, kite ame rik okobo, koŋ inen, aman doŋ odoko mwaka pyeraŋwen wie abic cakere i kare ame Rwot okobo kop baŋ Muca, kun Icrael pwod tye awot i tim; aman koŋ doŋ inen, mwakana doŋ oromo pyeraboro wie abic.

¹¹An pwod atek tuno naka tin, ame tekona pwod rom aroma i tekona i kare ame Muca ooranaca pwod daŋ woto kede kwogo.

¹²Aman doŋ mia lobo obedo kidikidi-ni ame Rwot rik okobo pire i nino-naca. Pien rik iwinyo i nino-naca kite ame jo Anak tye kede kuno, kun otye i boma adoŋodoŋo ame ocelo atek. Gwok onyo Rwot bino bedo keda, mio aryemogi oko kite a Rwot okobo.”

¹³Yocwa te lamo winyo, i kom Kaleb wot a Japunne, te miyo Kebron me bedo lobo ame en onwoŋo me bedo mege.

¹⁴Kittono daŋ Kebron te doko lobo ame Kaleb wot a Japunne me a jo Keniji onwoŋo me bedo mege tuno naka atot tin, pien en olubo Rwot Obaŋa me Icrael kede cunye ducu.

¹⁵Nyiŋ Kebron rik onwoŋo Kiriat-arba; Arba-ni rik onwoŋo dano moro adwoŋ meicel i akina jo Anak. Lobo doŋ te kwe, lweny daŋ te bedo pe.