Read lango Yocwa 18 Bible Online

Yocwa 18 - lango bible

Yocwa 18

¹Icennere lwak jo Icrael te cokere i Cilo, eka ote guro kema me rwatte kun onwoŋo doŋ oloo lobonono.

²I kare-nono onwoŋo pwod odoŋ atekere abiro i akina jo Icrael ame mom ru onwoŋo lobo ame opokkigi.

³Mannono omio Yocwa okobbi jo Icrael ni, “Kara ibino bedo wirre wunu naka awene me wot gamo lobo ame yam Rwot Obaŋa a kwariwu omiowu?

⁴Mia wunu jo adek iyi atekere acel acel me an aorgi, owot ololoŋo lobo-ni luŋ kun ocoo kop luŋ i kom dul lobo acel acel kite a myero pok kede, eka gm te dwogo kede baŋa.

⁵Gin bino poko lobo-nono i dul abiro, kun Juda medde gire bedo i mege ame tye tutuŋ anyarolum, kede doggola a Yucepu daŋ i megi ame tye tutuŋ anyarodi.

⁶Ibino tito wunu kop i kom lobonono i dul abiro, eka ite kelo wunu kop ame icoo wunu iye-nono baŋa kano An doŋ abino bolo kwir pirwu i nyim Rwot Obaŋawu kan.

⁷Jo Levi mom tye dul lobo moro i akinawa pien gin ame gin onwoŋo me bedo megi en aye bedo olamdog baŋ Rwot; aco Gad kede Reuben kede nucu me atekere a Manace doŋ otyeko nwoŋo lobogi oko me bedo megi loka Jordan i tutuŋ kide, ame Muca amiro a Rwot rik omiogi.”

⁸Jo-naca rik daŋ te cako wotgi; Yocwa te ciko jo-nono ni myero oco kop i kom lobo-nono, kun kobbigi ni, “Wot iloloŋo wunu lobo man, ico wunu kop i kome, eka ite dwogo wunu baŋa. Abino bolo kwir pirwu i Cilo.”

⁹Jo-nono daŋ te wot, ote coyo kop i kom lobo-nono i buk, kun ocoo boma i boma i dul abiro; eka gin doŋ te dwogo baŋ Yocwa i gony ame tye i Cilo.

¹⁰Yocwa te kwanyo kwir pirgi i nyim Rwot i Cilo; Yocwa te poko lobo daŋ baŋ jo Icrael kuno, kun mio atekere acel acel dullere.

¹¹Kwir me atekere a Benjamin te kwanyere kun lubere i doggola i doggola. Lobo ame kwir onwoŋo tye i akina atekere a Juda kede Yucepu.

¹²Waŋ lobogi i tuŋ anyarodi ocakere i Jordan, eka te kato i kor kidi i tutuŋ anyarodi me Jeriko, te kato i lobo ame obedo kidikidi i tuŋ to, kun gik i tim me Bet-awen.

¹³Eka i kuno waŋ lobo te kato i Luj kun beo i tutuŋ anyarolum naka i kor kidi me Luŋ, ame en Betel; eka waŋ lobo te dok kato i Atarot-addar, i wi kidi ame tye tutuŋ anyarolum me Bet-koron Tuŋ piny.

¹⁴Waŋ lobo te dok lokere, mano i tutuŋ to, te wirre dok i tuŋ anyarolum, kun ya i wi kidi riye aria i tutuŋ kide, ame otikere i Bet-koron, te wot gik i Kiriat-baal ame en Kiriat-jearim, ame obedo boma atekere a Juda. Man obedo tuŋ to,

¹⁵Eka i ŋete tutuŋ anyarolum te cakere i agiki me Kiriatjearim; cakere i kuno te dok kato Epron i akon me Neptoak.

¹⁶Cakere dok i kuno waŋ lobo te wot naka i agikki kidi ame otikere i luŋ a woto Kinnom, i agikki me luŋ me Repaim tutuŋ anyarodi; te dok piny i luŋ me Kinnom, tutuŋ anyarolum me kor kidi a jo Jebuc, te dok medde piny naka i En-rogel,

¹⁷Te wirre i kuno dok tutuŋ anyarodi tuno naka i En-cemec; cakere i kuno te wot Gelimot ame tye i nyim tur me Addumim; te dok wot tuno naka i wi kidi a Boan wot a Reuben ocibo.

¹⁸Eka i kuno te dok kato tutuŋ anyarodi kun mano kor kidi me Betaraba, dok kede piny i Araba.

¹⁹Eka te wot kato tutuŋ anyarodi me kor kidi me Bet-kogla. Waŋ lobo te doŋ gik i gul nam ame tye tutuŋ anyarodi me nam me Kado i agikki Jordan tuŋ anyarolum. Man waŋ lobo me tutuŋ anyarolum.

²⁰Waŋ lobo mere me tutuŋ kide obedo Jordan. Man en lobo atekere ame jo Benjamin onwoŋo kun lubere i doggola i doggola, kede waŋ lobogi luŋ i yore i yore.

²¹Boma luŋ ame obedo me atekere a jo Benjamin kun lubere i doggogola i doggola gin ene: Jeriko, Bet-kogla, Emek-kejiji,

²²Bet-araba, Jemaraim, Betel,

²³Avim, Para, Opra,

²⁴Keperammoni, Opni, kede Geba; boma luŋ apar wie aryo kede pacci ame tye i ŋetgi.

²⁵Gibeon, Rama, Beerot,

²⁶Mijpa, Kepira, Moja,

²⁷Rekem, Irpeel, Tarala,

²⁸Cela, Elep, Jebuc, ame en Jerucalem, Gibea kede Kiriat-jearim; boma luŋ apar wie aŋwen kede pacci ame tye i ŋetgi. Magi en lobo ame atekere a jo Benjamin onwoŋo kun lubere i doggola i doggola.