Read lango Yocwa 19 Bible Online

Yocwa 19 - lango bible

Yocwa 19

¹Kwir ame obolo me aryo opoto i kom Cimeon, pi jo a Cimeon kun lubo kite ame doggolagi tye kede. Lobogi ame kwir okwanyo onwoŋo tye iye atekere a Juda.

²Lobo ame kwir okwanyo ame onwoŋo gin obedo i Beer-ceba, Ceba, Molada,

³Kacar-cula, Bala, Ejem,

⁴Eltolad, Betual, Korma;

⁵Jaglag, Bet-markebot, Kacar-cuca,

⁶Bet-leboat, kede Caruken; boma luŋ apar wie adek kede pacci ame tye i ŋetgi;

⁷En-rimmon, Eter kede Acan; boma luŋ aŋwen kede pacci ame tye i ŋetgi:

⁸karacel kede pacci ame oguro boma magi tuno naka i Baalat-beer, Rama, ame tye Negeb. Man en lobo ame atekere a Cimeon rik onwoŋo kun lubo kite ame doggolagi tye kede,

⁹Lobo ame atekere a Cimeon onwoŋo rik obedo dul lobo a Juda; pien me dul a Juda rik onwoŋo dwoŋ meicel pirgi; pi mannono omio jo Cimeon onwoŋo lobo me bedo megi i akina lobogi.

¹⁰Kwir ame obolo me adek obedo me atekere a Jabulon kun lubo kite ame doggolagi tye kede. Wan lobogi rik owoto naka Carid.

¹¹Eka i kuno waŋ lobo te dok tutuŋ to, kun kato kede i Mareal tuno naka i Dabbecet kede i kulo ame tye tutuŋ kide me Jokneam;

¹²Cakere dok i Carid, odok tutuŋ kide ame woto tuŋ kide tuno naka i waŋ lobo me Kicilot-tabor. Eka te ya i kuno te wot Daberat kato kede naka malo i Japia.

¹³Ya i kuno okato tutuŋ kide, tuno kede naka i Gatkeper, kato Et-kajin; te dok kato naka Rimmon, te wirre wot tutuŋ Nea.

¹⁴Eka i kuno, waŋ apokki ame tye tuŋ anyarodi, te dok wirre dwogo cen i Kannaton, te wot gik i luŋ me Iptael,

¹⁵kede i Kattat, Naalal, Cimron, Idala, kede Beterekem; boma luŋ apar wie aryo kede pacci ame tye i ŋetgi.

¹⁶Man en lobo ame atekere a Jabulon onwoŋo kun lubo kite a doggolagi tye kede. Boma magi kede pacci ame tye i ŋetgi.

¹⁷Kwir ame obolo me aŋwen obedo me Icakar, pi atekere Icakar kun lubo kite ame doggolagi tye kede.

¹⁸Lobo mere onwoŋo ogwaro Jejreel, Kecullot, Cunem,

¹⁹Kaparaim, Sion, Anakatat,

²⁰Rabbit, Kicion, Ebej,

²¹Remet, Engannim, Enkadda, Bet-pajej,

²²Waŋ lobo daŋ ogudo Tabor kede Cakajuma, kede Bet-cemec, waŋ lobo mere te gik Jordan; boma luŋ apar wie abicel kede pacci ame tye i ŋetgi.

²³Man en lobo ame atekere Icaka onwoŋo kun lubo kite ame doggolagi tye kede, boma magi kede pacci ame tye i ŋetgi.

²⁴Kwir ame obolo me abic opoto i kom atekere Acer kun lubo kite ame doggolagi tye kede.

²⁵Lobo mere onwoŋo ogwaro Kelkat, Kali, Beten, Akcap,

²⁶Alamelek, Amad, kede Mical. Eka me tutuŋ to te wot gudo Karmel kede Cikor-libnat,

²⁷te dok wirre tutuŋ kide te wot i Bet-dagon te wot gudo daŋ Jabulon kede luŋ me Ipteal ame tye tuŋ malo me Bet-emek kede Negel, Eka te dok medde tutuŋ anyarodi tuno i Kabul,

²⁸Ebron, Rekob, Kammon, Kana, kun woto anaka i Cidon Adwoŋ.

²⁹Waŋ lobo te dok wirre dok Rama kun tuno i boma me Turo ame ocelo atek; waŋ lobo te dok wirre wot Koca, te gik i nam. Makalab, Akjib,

³⁰Umma, Apek kede Rekob; boma luŋ pyeraryo wie aryo kede pacci ame tye i ŋetgi.

³¹Man en boma ame atekere Acer onwoŋo kun lubo kite ame doggolagi tye kede, boma magi kede pacci ame tye i ŋetgi.

³²Kwir ame obolo me abicel opoto i kom atekere a Naputali pi atekere a Naputali kun lubo kite ame doggolagi tye kede.

³³Waŋ lobo mere ocakere i Kelep, kun cakere i kworo me Jaanannim, kede i Adami-nekeb, kede i Jabneel, wot kede anaka i Lak-kum, kun gik i Jordan.

³⁴Waŋ lobo te wirre i kuno dok tutuŋ to, tuno naka Ajnottabor, eka i kuno te wot i Kukkok, kun gudo Jabulon i tutuŋ anyarolum, i tuŋ to me Acer, eka i tuŋ kide te gudo Juda kan ame otuno Jordan.

³⁵Boma ame ocelo atek obedo Jiddim, Jer, Kammat, Rakkat, Kineret,

³⁶Edama, Rama, Kacor,

³⁷Kadec, Ed-rei, Enkajor,

³⁸Yiron, Migdalel, Korem, Betanat kede Bet-cemec; boma luŋ apar wie aboŋwen kede pacci ame tye i ŋetgi.

³⁹Man lobo ame atekere a Naputali onwoŋo kun lubo kite ame doggolagi tye kede, boma kede pacci ame tye i ŋetgi.

⁴⁰Kwir ame obolo me abiro opoto i kom atekere a Dan kun lubo kite ame doggolagi tye kede.

⁴¹Waŋ lobo mere onwoŋo ogwaro Jora, Ectaol, Ir-cemec,

⁴²Car-alabin, Aijalon, Itla,

⁴³Elon, Timna,

⁴⁴Elteke, Gibbeton, Baalat,

⁴⁵Jeud, Bene-berak, Gat-rimmon,

⁴⁶kede Mejarkon kede Rakkon karacel kede lobo ame tye i nyim Yopa.

⁴⁷Kare ame amao lobo a jo Dan oko, gin owoto anyim, ote wot lweny i kom Lecem, kare ame gin doŋ omako, gin oneko jo iye i pala lweny, gin te gamo bedo iye. Gin te cako nyiŋ lobo-nono ni Dan, bala nyiŋ kwarogi Dan.

⁴⁸Man en lobo ame atekere a Dan onwoŋo kun lubo kite ame doggolagi tye kede. Boma kede pacci ame tye i ŋetgi.

⁴⁹Ka jo Icrael doŋ otyeko poko lobo i dul apapat me bedo megi; gin daŋ ote pokki Yocwa wot a Nuni mege i akinagi.

⁵⁰Gin olubo cik a Rwot, omie boma ame en okwao, ame en Timnat-cerak ame tye i lobo a jo Epraim ame obedo kidikidi; gin dok ogero boma-nono ote bedo iye.

⁵¹Magi en lobo ame Eleajar alamdog kede Yocwa wot a Nuni karacel kede odoŋe me doggola atekere a jo Icrael opoko i kwir i Cilo i nyim Rwot, i doggola kema me rwatte. Lobo rik ote poko tum kittono.