Read lango Yocwa 2 Bible Online

Yocwa 2 - lango bible

Yocwa 2

¹Yocwa wot a Nuni te oro jo aryo i muŋ wot roto piny kun gin oya i Cittim, ocikogi ni, “Wot irot wunu lobo, cite akato mere Jeriko.” Gin owoto eka ote tuno i ot alaya moro a nyiŋe Rakab, gin te buta kuno.

²Jo te kobbi rwot me Jeriko ni, “Nen ba, jo mogo me Icrael obino kan tin dyewor me roto lobo.”

³Rwot me Jeriko te cwayo kwena baŋ Rakab kun kobo ni, “Kel jo ame obino baŋi, ame odonyo i odi, pien gin obino me roto lobo luŋ.”

⁴Ento dako-naca onwoŋo otero jo aryo-nu te kanogi oko; eka en te dok iye ni, “Ateni, co mogo onwoŋo obino baŋa, cite an onwoŋo mom aŋeo kan ame gin oya iye.

⁵I kare ame onwoŋo doŋ oceggi cego dogcel me boma ame piny doŋ iribiribi, jo-nono te kato oko, mom dok aŋeo kan ame gin owoto iye. Ryem wunu yorgi oyotoyot, ibino wunu makogi oko.”

⁶En onwoŋo oterogi malo i wi ot, te wumogi kede tole nino ame ocano acaŋa malo i iw ot.

⁷Jo-nono te ryemo yorgi iyo a dok tutuŋ Jordan, naka i pi i acecep. I kare ame jo oryemo yorgi okato oko, ote ru cego dogcel oko.

⁸Kare ame gin mom ru obuto, dano-nu te bino baŋgi i wi ot,

⁹te kobo baŋ jo-nono ni, “An aŋeo ni Rwot doŋ omiowu lobo man, dok daŋ lworo doŋ omakowa i komwu, jo luŋ ame tye i lobo-ni komgi doŋ oonyo koyo oko pirwu,

¹⁰Pien wan owinyo kite ame Rwot odwono kede pii me Nam arema i nyimwu, i kare ame iya wunu i lobo Miciri, karacel kede gin ame itimo wunu i kom obakki aryo me a jo Amor ame onwoŋo tye i ŋe Jordan, Cikon kede Og, ame ijwero wunu kom luŋ aluŋa.

¹¹Tekki owinyo, koyo te ru oonyere oko i komwa, ame ŋattoro mom odoŋ kadi acel ame cunye onwoŋo tek. Mano kom otimere pirwu, pien Rwot Obaŋawu en Obaŋa ame tye malo i polo kede piny i lobo.

¹²Aman doŋ ba, kwoŋ wunu baŋa i nyim Rwot ni, kite acalo an atimowu ber, wun daŋ ibino timo wunu ot a pappa ber, kun imio wunu anennoro ame moko kwoŋwu,

¹³me igwok wunu kwo a pappa kede totta kede omegona kede amegona kede jo luŋ ame tye baŋgi, ilarwa wunu kur oto.”

¹⁴Jo-nu te dokke iye ni, “Twara kwowa en arweny akaka megwu! Ka ce mom ikobo wunu kopporo i kopwa-ni, wan obino terowu aber dok i gen i kare ame Rwot bino miyowa lobo man.”

¹⁵En doŋ te cwayogi piny iwaŋ dirica kun cwaogi kede tol; pien ode onwoŋo okubere i cel me boma, en onwoŋo bedo iyi cel.

¹⁶Ocikogi ni, “Koŋ iwot wunu i wi kiddi, me jo a ryemo yorwu kur cop i komwu; pon wunu kuno nino adek, ituno ka jo oryemo yorwu odwogo, eka ite doŋ wot wunu giwu.”

¹⁷Jo-nu te dokke iye ni, “Wan mom obino bedo i balloro i kwoŋ ame imiowa okwoŋo ka ce mom itimo man.

¹⁸Nen ba, i kare ame wan obino bino i lobo man, myero inen ni itweo tol arema i waŋ dirica kan ame icwaowa iye-ni, dok daŋ myero imi jo-ni luŋ bed i ot baŋi: pappi, totti, omegoni, amegoni, kede jo luŋ ame tye i ot a pappi.

¹⁹Ka ce dano moro odonyo oko i odi eka te wot i waŋayo, remo mere obino bedo gire i wie, wan giwa mom obino bedo i balloro; ento ka ciŋ ŋattoro ogudo dano moro ame tye i ot baŋi, remo mere bino bedo i wiwa.

²⁰Ento ka ikobo kopporo i kopwa-ni, wan giwa mom obino bedo i balloro i kwoŋ ame imiowa okwoŋo.”

²¹En te dok iye ni, “Koŋ doŋ bed kite ame ikobo wunu.” Ocikogi, eka gin te wot; en te tweyo tol arema iwaŋ dirica.

²²Gin oya i kuno ote wot i wi kiddi. Gin te bedo kuno nino adek, naka waŋ ame jo oryemo yorgi odok cen, pien jo ame oryemo yorgi onwoŋo obedo yenyogi i yo luŋ, mom ote nwoŋogi.

²³Jo aryo-nu te doŋ dwogo piny i wi kiddi, ote ŋolo kulo, bi no baŋ Yocwa wot a Nuni; gin te titte kop luŋ ame otimere i komgi.

²⁴Gin okobbi Yocwa ni, “Ateni, Rwot otyeko miyo lobo luŋ i ciŋwa, dok daŋ medo kede manno, jo luŋ ame bedo i lobonono cunygi doŋ oto oko pirwa.”