Read lango Yocwa 22 Bible Online

Yocwa 22 - lango bible

Yocwa 22

¹Yocwa ocwano jo Reuben, jo Gad, kede nucu me atekere a Manace,

²okobbigi ni, “Ityeko wunu doŋ gwoko kop luŋ ame Muca amiro a Rwot rik ocikowu kede, dok daŋ iwinyo wunu koppa luŋ i kom kop luŋ ame acikowu iye.

³Pi kare magi luŋ mom iweko wunu omegowu, naka tuno i kare-ni, ento ibedo gwokere wunu meicel i lubo gin ame Rwot Obaŋawu ociko.

⁴Aman doŋ Rwot Obaŋawu omio weo baŋ omegowu kite ame rik ociko kede; pi mannono, myero doŋ ilokere idok wunu pacowu i lobo ame obedo megwu ame rik Muca amiro a Rwot omiowu loka i ŋe Jordan.

⁵Cite myero igwokere wunu atek ilubo kop luŋ ame ociko kede cik ame Muca amiro a Rwot ocikowu kede, ni myero imar wunu Obaŋawu dok imok wunu i kome kun itio wunu baŋe i cunywu luŋ kede tipowu luŋ.”

⁶Yocwa olammigi gum, te cwayogi wot; gin te wot i paccigi.

⁷I kare-nono onwoŋo Muca doŋ otyeko miyo lobo i i Bacan baŋ nucu atekere a Manace; ento nucu mere ocele, Yocwa en a doŋ omio lobo i ŋet omegogi ame tye tuŋ to me Jordan. Kare ame Yocwa ocwaogi me wot i paccigi, olammigi gum,

⁸kun kobbigi ni, “Dok wunu i pacciwu kede lim abup, kede dok ecipan, karacel kede ryal, jabu, mola, nyonyo, kede ruk apipim; pokki wunu omegowu lim ame iyako wunu i baŋ okworwu.”

⁹Jo Reuben, jo Gad kede nucu me atekere a Manace te dok i paccigi; gin te pokere oko i baŋ jo Icrael i Cilo ame onwoŋo tye i lobo me Kanaan, kun gin owoto i lobo me Gilead ame obedo lobogi i komgi, ame obedo megi pi cik a Rwot ame emio Muca okobo.

¹⁰Kare ame gin otuno i lobo ame ceggi kede Jordan, ame tye i lobo Kanaan, jo Reuben, kede jo Gad, kede nucu me atekere a Manace te cano keno lam a ceggi i ŋet Jordan, keno lam ame dwoŋ meicel.

¹¹Kare ame jo Icrael owinyo pire, gin okobo ni, “Koŋ inen wunu, jo Reuben kede jo Gad karacel kede nucu me atekere a Manace doŋ ocano keno lam i waŋ lobo me Kanaan, i lobo ame tye i ŋet Jordan ame dok tutuŋ baŋ jo Icrael.”

¹²Ka jo Icrael owinyo, lwak jo Icrael luŋ ocokere karacel i Cilo me wot lweny i komgi.

¹³Jo Icrael te koŋ cwalo Finekaci wot Eleajar alamdog baŋ jo Reuben, jo Gad kede nucu atekere a Manace i lobo Gilead,

¹⁴karacel kede rwode apar ame oya i atekere acel acel dano acel kun dano acel ya i atekere acel me Icrael, gin lunnono ŋat acel acel onwoŋo obedo adwon ame loo doggola a kwarigi ame onwoŋo tye i akina atekere Icrael.

¹⁵Gin te bino baŋ jo Reuben, jo Gad kede nucu atekere a Manace i Gilead, eka gin te kobbigi ni,

¹⁶“Lwak a Rwot luŋ okobo ni, ‘Man kara kodi gin aŋo ame itimo wunu me turo cikerewu kede Obaŋa a jo Icrael-li, me lokere wunu tin, dok oko i lubo Rwot, eka ite lunyo cano wunu ke no lamwu kenwu me jem i kom Rwot?

¹⁷Bal ame otimo i Poer mom doŋ oromowa ame daŋ mom ru olonyere iye naka tin, dok ame daŋ omio too edeke opoto i akina lwak a Rwot?

¹⁸Piŋo kara wun tin dok ilokere wunu oko i lubo Rwot? Nen ba, ka ce wun tin ijem wunu i kom Rwot, diki akemo bino mako Rwot i kom lwak luŋ me Icrael.

¹⁹Doŋ ba, amanni ka ce lobowu mom cil, kat wunu loka ca i lobo a Rwot kan ame kema me rwatte ocuŋ iye, me wek iwotinwon wunu lobowu i akina wa; myero mom ka ijem wunu i kom Rwot onyo kur imiwa wunu odok jo ojem pi cano keno lam pirwu kenwu, ame pat dok i keno lam a Rwot Obaŋawa.

²⁰Akan wot a Jera mom rik okwero bedo agen i kom gin ame ojalo baŋ Rwot, eka te miyo akemo a Rwot poto i kom lwak me Icrael? Mom en keken obin oto pi ballere.’ ”

²¹Jo Reuben, jo Gad kede nucu atekere a Manace te dok iye baŋ odoŋe a loo doggola a kwari a jo Icrael ni

²²“Won Twer, Obaŋa Rwot! Won Twer, Obaŋa Rwot! En [ŋeo; en mio jo Icrael daŋ ŋeo: Ka ce] onwoŋo wan ojem onyo oturo cikerewa kede Rwot, myero doŋ kur wekwa tin,

²³pi cano keno lam me lokere oko teŋe kun oweko lubo Rwot; onyo ka ce wan onwoŋo otimo kittono kun oyalo: i mot awaŋa, onyo mot moko kwon onyo mot me kweyo cuny, Rwot ikome myero ocul.

²⁴Pe gire, wan otimo pien onwoŋo otye i lworo i kare me anyim ikwaewu twero penyo ikwaewa ni, ‘Gin aŋo ame ilaro wunu i baŋ Rwot, ame Obaŋa a jo Icrael?

²⁵Pien Rwot omio Jordan obedo waŋ lobo ame poko kinwa kede wun, wun jo Reuben, kede jo Gad; wun i mom wunu i ginnoro ame opoko pirwu i Rwot.’ Mano bino miyo ikwaewu mio ikwaewa weko woro Rwot oko.

²⁶Mano en omio wan okobo ni, ‘Wek ocaŋ keno lam aman, mom me waŋo mot awaŋa onyo me miyo mot oŋolo’,

²⁷cite me bedo caden i akina wan kede wun, kede dok akina ikwaewa ame bino lubowa, ni wan otio tic a Rwot i nyime kun otio i motwa me awaŋa, kede mot aŋola kede mot kweyo cuny; me wek ikwaewu kur kob baŋ ikwaewa i kare a tye anyim ni, ‘Wun i mom wunu i ginnoro ame opoko pirwu i Rwot.’

²⁸Tamwa rik onwoŋo tye ni, ‘Ka ce obino kobo man baŋwa onyo baŋ ikwaewa i kare ame tye i nyim, wan obino kobo ni, Koŋ inen wunu keno lam ame rom aroma i me a Rwot me kwariwa otio, mom me miyo mot awaŋa, onyo mot oŋolo, ento me bedo caden i akina wan kede wun.’

²⁹Wan kom mom oromo jem i kom Rwot, eka ote lokere tin kwero lubo Rwot pi cano keno lam me mot awaŋa, mot moko kwon, onyo me mot aŋola, ame pat dok i keno lam a Rwot Obaŋawa ame ocuŋ i nyim kema me rwatte.”

³⁰I kare ame Finekaci alamdog karacel kede rwode a lwak, kede odoŋe a loo doggola kwari a jo Icrael, ame onwoŋo tye kede owinyo kop a jo Reuben, jo Gad, kede nucu atekere a Manace, oyomoro cunygi aber.

³¹Finekaci wot Eleajer alamdog te dokki jo Reuben, kede jo Gad, kede jo Manace ni, “Tin doŋ oniaŋ ni Rwot kara tye i akinawa, pien wun kara mom ituro wunu cikerewu i Rwot, aman doŋ ilaro wunu jo Icrael i ciŋ Rwot.”

³²Finekaci wot Eleajer alamdog kede rwode te ya oko i baŋ jo Reuben, jo Gad ame onwoŋo tye i lobo Gilead, gin te dok i lobo me Kanaan baŋ jo Icrael, gin te dwogo kop baŋgi.

³³Kopgi te yomoro cuny jo Icrael; jo Icrael te pwoyo Obaŋa, mom dok ote medde kobo kopporo me lweny i komgi, me babalo lobo ame jo Reuben jo Gad bedo iye.

³⁴Jo Reuben kede jo Gad te cako nyiŋ keno lammono ni, Caden, kun gin kobo ni, “Pien obedo caden i akinawa ni Rwot en Obaŋa.”