Read lango Yocwa 23 Bible Online

Yocwa 23 - lango bible

Yocwa 23

¹Kare ame doŋ kare okato alalac ame Rwot doŋ otyeko miyo jo Icrael we oko i kom okworgi luŋ ame omanogi, kun Yocwa doŋ otyeko ti oko, mwaka mere doŋ bup.

²Yocwa olwoŋo jo Icrael luŋ, odoŋegi, odoŋe a loo lwak, oŋolkopgi kede odoŋe tic, eka te kobbigi ni, “An doŋ ati oko, dok mwakana daŋ doŋ bup.

³Wun doŋ ityeko neno wunu gin ducu ame Rwot Obaŋawu otimo i kom rok magi luŋ, pien Rwot Obaŋawu olwenyo pirwu.

⁴Nen doŋ atyeko poko rok odoŋ-ŋi oko kede kwir baŋ atekerewu me bedo megwu, karacel kede rok ocele ame doŋ atyekogi oko, cakere i Jordan tuno kede naka i Nam Adwoŋ tuŋ to,

⁵Rwot Obaŋawu bino corogi oko cen i nyimwu, eka te ryemogi oko i waŋwu, wun ibino gamo wunu lobogi, kite a rik Rwot Obaŋawu ocikere kede baŋwu.

⁶Pi mannono, myero icuŋ wunu atek meicel me gwoko kede tiyo ginnoro luŋ ame ocoo i buk me cik a Muca, kun mom ilokere wunu iye teŋe i ciŋ tuŋ cem onyo tuŋ cam,

⁷me kur irubere wunu oko i rokkogo ame odoŋ i akinawu kan-ni; kur daŋ ilwoŋ wunu nyiŋ obaŋegi, onyo kwon i nyiŋgi, onyo tic baŋgi, kadi ryebere piny i nyimgi.

⁸Cite myero imok wunu i kom Rwot Obaŋawu kite ame ibedo wunu timo tuno naka tin.

⁹Pien Rwot Obaŋawu oryemo rok adoŋo atek oko i nyimwu, aco wun mom tye ŋattoro ocuŋ i nyimwu tuno naka tin.

¹⁰Dano acel i akinawu ryemo jo tutumia, pien Rwot Obaŋawu en a lwenyo pirwu, kite ame en rik ociko.

¹¹Pi mannono myero igwokere wunu kenwu, mar wunu Rwot Obaŋawu.

¹²Pien ka ce idok wunu cen, eka ite ribere wunu i rok magi ame oweko odoŋ i akinawu, ite nyomere wunu kedgi kun inyomo wunu anyiragi, gin daŋ nyomo anyirawu,

¹³myero iŋe wunu ateni ni Rwot Obaŋa mom bino medde ryemo rok magi i nyimwu; ento gin bino doko kumma kede owic me cikowu me goyowu i laŋetwu, kede okuto me cobo wanwu, ituno ka otyekowu oko i lobo man aber-ri ame rik Rwot Obaŋawu omiowu.

¹⁴“Nen ba, an doŋ aceggi wot kan ame lobo luŋ woto iye, wun giwu doŋ iŋeo wunu i cunywu kede i tipowu ni mom tye koporo acel i akina gin abeco ame Rwot Obaŋawu ociko i komwu ame oweko a mom ocobere; gin luŋ ocobere gire oko pirwu, mom tye moro acel i akinagi ame mom ocobere.

¹⁵Doŋ kite acalo Rwot Obaŋa ocobo gin abeco luŋ ame en okobo i komwu, Rwot daŋ bino kelo gin areco luŋ i komwu tuno waŋ ame otyekowu oko iweŋ i lobo man aber ame Rwot Obaŋawu omiowu.

¹⁶Ka ce ibino turo wunu cikere a Rwot ame en ocikowu kede, eka ite wot wunu tic baŋ obane mogo ocele kun iryebere wunu piny iworogi wunu, mano bino miyo Rwot yie waŋ i komwu, eka ite ru to wunu oko i lobo man aber ame en omiowu.”