Read lango Yocwa 24 Bible Online

Yocwa 24 - lango bible

Yocwa 24

¹Yocwa rik dok te coko atekere luŋ me Icrael i Cekem, eka te cwano odoŋe, odoŋe a loo lwak, oŋolkop kede odoŋe tic a jo Icrael; gin luŋ ote bino cuŋ i nyim Obaŋa.

²Yocwa te kobbi jo luŋ ni, “Rwot Obaŋa me Icrael okobo ni, ‘Kwariwu kare acon rik obedo loka kulo Efurate. Tera pappa Iburaim kede Nakor gin obedo tic baŋ obaŋe mogo ocele.

³An ate kwanyo kwarowu Iburaim i loka Kulo, eka ate tele beo kede i lobo Kanaan luŋ, ate daŋ miyo ikwae nya apol. Rik amie Ica ka;

⁴eka ate miyo baŋ Icaka, Yakobo kede Ecau, Ecau rik ate miyo lobo Ceir ame obedo kidikidi me bedo mege, cite Yakobo kede ikwae te wot i Miciri.

⁵Rik ate cwayo Muca kede Aron i Miciri, ate ŋolo kop i kom Miciri kede gin luŋ ame rik atimo i akinagi kuno; icennere ate kwanyowu oko i kuno.

⁶Rik ate kwanyo kwariwu oko i Miciri, eka ite bino wunu naka i nam; jo Miciri te ryemo kwariwu i gadigadi me romo karacel kede wegi aguragura, tuno naka i Nam Arema.

⁷Kare ame gin okok baŋ Rwot, Rwot omio colpiny obedo tye i akinawu kede jo Miciri, eka te miyo pii nam dwono i komgi, te mwonyogi oko. Waŋwu daŋ oneno gin ame atimo i Miciri, eka ite bedo wunu i tim pi kare alac.

⁸Rik dok ate kelowu i lobo a jo Amor, ame rik tye i ŋe Jordan tuŋ ocele gin rik te lweny kedwu, cite an rik ate miyogi i ciŋwu, omio ite gamo wunu lobogi oko bedo megwu, ate daŋ lwerogi oko i nyimwu,

⁹Balak wot a Jipor abaka me Moab te dok tinere lweny i kom jo Icrael, en te cwayo kwena lwoŋo Balaam wot a Beor me bin cenwu oko,

¹⁰cite an gira mom ate winyo Balaam; omio en te lunyo lammiwu winyo, ate larowu oko i ciŋe.

¹¹Wun rik ite ŋolo wunu Jordan bino i Jeriko, jo me Jeriko te lweny i komwu karacel kede jo Amor, jo Periji, jo Kanaan, jo Kitti, jo Girgac, jo Kivi kede jo Jebuc; gin luŋ ate miyogi i ciŋwu.

¹²Rik dok ate cwayo lwak pipino apipim i nyimwu, ame te ryemogi i nyimwu, obakki aryo me a jo Amor; mannono rik mom otimere pi pala lwenywu onyo pi aterowu.

¹³Amiowu lobo ame mom itio wunu ticcoro pire, kede boma luŋ ame mom igero wunu, wun ite bedo wunu kuno; ite camo wunu nyig olok kede me jeituni ame mom gu ipito wunu.’

¹⁴“Pi mannono, aman doŋ lwor wunu Rwot, eka ite tic wunu baŋe i cunywu acil kede gen; cwa wunu teŋe obaŋe mogo ame kwariwu otio baŋgi loka kulo Efurate i Miciri, eka ite tic wunu baŋ Rwot.

¹⁵Aco ka ce mom iye wunu tic baŋ Rwot, yer wunu doŋ tin-ni ŋat ame wun imito wunu tiye, ka obaŋe ame kwariwu otio baŋgi i kare ame gin pwod tye i lobo ame tye loka kulo Efurate onyo obaŋe a jo Amor ame ibedo wunu i lobogi; ento an kede oda, wan obino tic baŋ Rwot.”

¹⁶Eka jo rik te gamo ni, “Kom mom twerre kadi acel wan iweko Rwot, eka ote tiyi obaŋe mogo ocele;

¹⁷pien Rwot Obaŋawa en ame okwanyowa kede kwariwa me ya i lobo Miciri, i ot me opii, ame rik otimo anyuttogo adoŋo ca i nyimwa, kun gwokowa i yo luŋ ame obeo iye, kede i akina jo luŋ ame obeo i kingi.

¹⁸Rwot rik oryemo jo-nono luŋ i nyimwa, ame gin jo Amor ame rik bedo i lobo-nono, pi mannono wan daŋ obino tic baŋ Rwot pien en obedo Obaŋawa.”

¹⁹Ento Yocwa dok te kobbi jo ni, “Wun mom itwero tiyi wunu Rwot; pien en obedo Obaŋa acil; en Obaŋa ame nyek; en mom bino timowu kica i timwu me turo cik onyo i balwu,

²⁰Ka ce iweko wunu Rwot eka ite cako wunu tic baŋ obaŋe ocele, bino miyo en lokere te timowu rac, bino tyekowu oko kadi bed yam koŋ otimowu ber.”

²¹Lwak te kobbi Yocwa ni, “Pe gire, ento wan giwa obino tiyi i Rwot.”

²²Yocwa dok te kobbi lwak ni, “Wun giwu doŋ ibedo wunu cadenwu kenwu ni wun doŋ ityeko yero wunu Rwot, me tic baŋe.” Lwak dok te gamo ni, “Wan ocaden.”

²³Yocwa te kobbigi ni, “Aco doŋ bol wunu oko kit obaŋa luŋ ame orok ame tye i akinawu, eka ite loko cunywu i kom Rwot Obaŋa me Icrael.”

²⁴Lwak te gamo dog Yocwa ni, “Wan obino tiyi Rwot Obaŋawa, dok daŋ obino winyo kopere.”

²⁵Mannono te miyo Yocwa moko cikere i lwak i ninonono, te keto icwil kede cik apol pirgi i Cekem.

²⁶Yocwa te coyo kop magi i buk me cik Obaŋa; eka te kwanyo twon gweŋŋoro adwoŋ, te cibo cuŋ kuno i te kworo ame tye i kabedo acil ame tye pi Rwot.

²⁷Yocwa dok te kobbi lwak ni, “Nen wunu ba, gweŋ man en ame bino bedo caden i komwa, pien en owinyo kop a Rwot luŋ ame en okobo i komwa; pi mannono, en bino bedo caden i komwu me kur ibwol wunu Obaŋawu.”

²⁸Yocwa rik doŋ te ciko lwak, ŋat acel acel te dok i lobo mere ame rik omie.

²⁹A doŋ magi luŋ otum Yocwa wot a Nuni, amiro a Rwot te doŋ to oko kun onwoŋo mwaka me dittere oromo mia acel kede apar.

³⁰Gin rik te yike i lobo mere ame rik omie i Timnat-cerak i lobo me Epraim obedo kidikidi, ame tye tuŋ anyarodi me kidi me Gaac.

³¹Jo Icrael rik otiyi Rwot i kare a Yocwa luŋ, kede i kare odoŋe luŋ a rik lubo Yocwa, oweko pwod kwo dok daŋ oŋeo ginnoro ame Rwot otio pi Icrael.

³²Cogo kom Yucepu ame rik jo Icrael okelo i Miciri ca, obin oyiko i Cekem i dul lobo ame rik Yakobo owilo i baŋ awobe a Kamor ame obedo pappa Cekem, kun oculo iye lim aromo mia acel; lobo-nono rik te doko me ikwae a Yucepu atwal.

³³Eleajar wot a Aron daŋ te to oko, ote yiko kome i Gibea, ame obedo boma a wode Finekaci, ame rik opokke i lobo me Epraim obedo kidikidi.