Read lango Yocwa 3 Bible Online

Yocwa 3 - lango bible

Yocwa 3

¹Yocwa opuk ka ibayi te ya oko i Cittim karacel kede jo Icrael luŋ. Gin obino i Jordan ote buto kuno kun mom ru oŋolo kulo.

²Kare ame nino adek doŋ okato otel a lwak te bebea i gony,

³kun gin cikogi ni, “Ka ineno wunu canduk cikere a Rwot Obaŋawu ame olamdog ame gin jo Levi tye adyelo, ya wunu oko i kabedowu ite lubo wunu yore,

⁴me iŋe wunu yo ame ilubo wunu, pien yam mom ru ibeo wunu kan con. Kadi amanno, myero akinawu kede canduk cikere lagoro.”

⁵Yocwa dok te ciko jo ni, “Lonyere wunu kenwu, pien diki Rwot bino tiyo tic me awura i akinawu.”

⁶Yocwa dok te ciko daŋ olamdog ni, “Tiŋ wunu canduk cikere, me ikat wunu i nyim lwak.” Gin daŋ ote tiŋo canduk cikere, ote telo kede nyim lwak.

⁷Rwot te kobbi Yocwa ni, “Tin abino cako miyi dit i nyim lwak jo Icrael, me gin ŋe ni, kite a rik abedo i Muca, abino bedo kedi daŋ kittono.

⁸Ibino ciko olamdog ame otiŋo canduk cikere ni, ‘Ka ituno wunu i ŋet pii me Jordan, myero koŋi cuŋ wunu i kulo Jordan.’ ”

⁹Yocwa te ciko lwak jo Icrael ni, “Bye wunu kan me ibin iwiny wunu kop a Rwot Obaŋawu.”

¹⁰Yocwa dok te tittigi ni, “Man bino miyo iŋeo wunu ni Obaŋa akwo tye i akinawa, dok daŋ mom bino weko ryemo yo jo Kanaan i nyimwu, kede jo Kitti, jo Kivi, jo Periji kede jo Girgac, jo Amor karacel kede jo Jebuc.

¹¹Nen wunu ba, canduk cikere a Rwot me wi podo luŋ bino telo nyimwu i ŋolo kulo Jordan.

¹²Pi mannono, aman yer wunu jo apar wie aryo i kom atekere apar wie aryo me Icrael, kun iyi atekere acel acel ya iye dano acel.

¹³Doŋ i kare ame tyen olamdog ame otiŋo canduk cikere a Rwot, ame en Rwot me wi podo luŋ, bi no cuŋ i pii me Jordan, pii me Jordan bino cuŋ oko kun mol, eka pii ame onwoŋo amol abino i malo te cokere karacel.”

¹⁴Eka lwak te ya i kemagi me ŋolo kulo Jordan kun olamdog tiŋo canduk cikere telo nyim lwak.

¹⁵Kare ame olamdog otiŋo canduk cikere otuno i kulo Jordan, eka tyengi te lutte i pii i ŋet kulo, pien kulo Jordan onwoŋo poŋ lapakino atata kare luŋ naka i kare ame jo tye akayo kal-gu,

¹⁶pii ame onwoŋo amollo abino i malo te cuŋ oko, te cokere karacel i bim malo kanabor i Adam, ame en boma a tye i ŋet Caretan, kede pii ame onwoŋo amol adok piny tutuŋ Nam me Araba, ame en Nam me kado, ginnoro luŋ te cot oko; jo doŋ te ŋolo i kan otemere i Jeriko.

¹⁷Kare ame jo Icrael luŋ onwoŋo aŋolo kulo kun owoto gigi kan otwo, olamdog ame otiŋo canduk cikere a Rwot onwoŋo ocuŋ kan otwo i dye Jordan, naka ka rok luŋ doŋ oŋolo Jordan.