Read lango Yocwa 4 Bible Online

Yocwa 4 - lango bible

Yocwa 4

¹Kare ame rokgi-nono luŋ doŋ oŋolo Jordan, Rwot te kobbi Yocwa ni,

²“Yer jo apar wie aryo i akina lwak, kun iyi atekere acel acel ya iye dano acel, myero icikgi ni,

³‘Kwany wunu gweŋe apar wie aryo i dye Jordan kan, i kakan ame tyen olamdog ocuŋ iye ikokome, ye wunu iwot wunu kede loka, wot iket wunu kan ame tin ibino buto wunu iye.’ ”

⁴Yocwa te lwoŋo jo apar wie aryo i kom lwak jo Icrael ame onwoŋo yam en oyero con, dano acel acel i atekere acel acel;

⁵te dok kobbigi ni, “Kat wunu i nyim canduk cikere a Rwot Obaŋawu i dye Jordan. Ŋat acel acel myero tiŋ gweŋ acel i wi gwoke, kun lubo kite ame wel atekere a jo Icrael tye kede,

⁶me wek man bed anen i akinawu. Ka itinowu bino penyowu i kare i nyim ni, ‘Kara gweŋe-nu te koppere ŋo baŋwu?

⁷Wun ibino tittigi ni, pii me Jordan rik obin ocot oko i nyim canduk a Rwot, kare ame wan oŋolo Jordan, pii me Jordan ocot oko. Pi mannono gweŋe-nu bino bedo me poyo wi jo Icrael nakanaka.’ ”

⁸Jo Icrael te daŋ tiyo kite ame Yocwa okobbigi; gin te kwanyo gweŋe apar wie aryo i dye Jordan kite acalo wel atekere a jo Icrael tye kede, kite a Rwot ociko kede Yocwa. Gin oyeo ote wot kede loka kan ame gin obuto iye, eka ote cibogi piny kuno.

⁹Yocwa te cano gweŋe apar wie aryo-nono cuŋ i dye Jordan kakan ame tyen olamdog ame otiŋo canduk cikere onwoŋo ocuŋ iye. Gweŋe-nono tye kuno naka atot tin.

¹⁰Pien olamdog ame rik otiŋo canduk cikere rik ocuŋ i dye Jordan naka ka lwak doŋ ocobo gin ducu ame rik Rwot ociko Yocwa ni kobbigi otim, kun lubo kop luŋ a rik Muca ociko kede Yocwa. Jo te ru kato oko loka.

¹¹Kare ame jo luŋ doŋ okato loka oko, canduk cikere a Rwot kede olamdog te kato doŋ i nyim lwak.

¹²Jo Reuben, jo Gad kede nucu atekere a Manace te kato loka i nyim jo Icrael kun gin omako jami lweny kite a rik Muca ocikogi kede.

¹³Jo onwoŋo ceggi romo tutumia pyeraŋwen ame okato loka i i nyim Rwot kun oyikere i jami lweny me wot lweny i bar me Jeriko.

¹⁴Nino-nono Rwot omio Yocwa dit i nyim jo Icrael luŋ, gin daŋ, ote lwore kite a rik gin olworo kede Muca pi kare luŋ me kwo mere.

¹⁵Rwot dok te kobo baŋ Yocwa ni,

¹⁶“Cik olamdog ame otiŋo canduk cikere me ya oko i Jordan.”

¹⁷Yocwa te ciko olamdog ni, “Biye wunu, iya wunu oko i Jordan.”

¹⁸Olamdog te tiŋo canduk cikere a Rwot te ya oko i Jordan; kare ame tyen olamdog onyono kan otwo, pii me Jordan te dok gire kakare, te poŋ lapakino atata kite a yam con.

¹⁹Jo rik te ya oko i Jordan i nino dwe apar me dwe me agege, gin te bedo koŋ i gonygi i Gilgal, i waŋ apokki me Jeriko i tuŋ kide.

²⁰Yocwa te cano gweŋe apar wie aryo arik okwanyo i Jordan ca i Gilgal.

²¹Eka te kobbi jo Icrael ni, “Ka waŋŋoro ikwaewu bino penyo pappigi ni, ‘Kara gweŋe-nu te koppere no?’

²²Wun ibino wunu miyogi oŋeo ni, ‘Icrael rik obin oŋolo Jordan man ame otwo.’

²³Pien Rwot Obaŋwu rik omio pii me Jordan odwono pirwu naka wun ikato wunu loka, kite a Rwot Obaŋawu rik otimo i kom Nam Arema, ame daŋ obin odwono oko pirwu naka ka wun ikato wunu loka,

²⁴me rok luŋ me wi podo ŋe ni, Rwot ciŋe tek meicel; me gin obed i lworo baŋ Rwot Obaŋawu nakanaka.”