Read lango Yocwa 5 Bible Online

Yocwa 5 - lango bible

Yocwa 5

¹Kare ame rwode luŋ me jo Amor rik tye i ŋe Jordan tuŋ to, karacel kede rwode a jo Kanaan luŋ rik tye i dog nam, owinyo ni Rwot omio pii me Jordan odwono pi jo Icrael naka ka gin okato loka, komgi doŋ te onyo koyo oko, mom doŋ ote bedo i tekcunyoro pi lworo jo Icrael.

²I kare-nono Rwot te kobbi Yocwa ni, “Yik pala gweŋ, me dok imed liro jo Icrael tyen me aryo.”

³Yocwa te rabo pala me gweŋ, te liro kede jo Icrael i Gibea-kaaralot.

⁴Gin omio Yocwa dok omedo lirogi ene: pien co luŋ ame onwoŋo oya i Miciri, ame onwoŋo romo lweny, gin luŋ rik oto oko iyo, i tim, kun gin doŋ onwoŋo oya oko i Miciri.

⁵Kadi bed rik jo luŋ ame oya i Miciri rik olirogi, cite jo luŋ mom onywalo i yo i itim, i kare ame gin oya oko i Miciri, mom onwoŋo olirogi.

⁶Pien jo Icrael obedo wowota i tim pi mwakki pyeraŋwen, tuno waŋ ame rok luŋ, co luŋ ame romo lweny, oto oko pi kwero winyo dog Rwot. Rwot rik onwoŋo okwoŋo baŋgi ni mom ebino ye gin neno lobo ame en rik ekwoŋo pire baŋ kwarigi ni ebino miyowa; lobo ame opoŋ i cak kede moo kic dwoŋ iye meicel.

⁷Doŋ itinogi ame en omio me leyo kakargi, en ame Yocwa rik olirogi, pien rik onwoŋo mom ru olirogi, rik mom olirogi iyo.

⁸Kare ame liro rokkono luŋ doŋ otum, gin te bedo i gonygi kannono tuno wan ame jo ocaŋ.

⁹Rwot te kobbi Yocwa ni, “Tin doŋ akwanyo lewic me Miciri oko i komwu.” Mannono te miyo olwoŋo nyiŋ kabedo-nono ni Gilgal naka atot tin.

¹⁰I kare ame jo Icrael pwod tye i Gilgal, gin okwero ecuban me Kato, i nino dwe apar wie aŋwen otyeno, i bar me Jeriko.

¹¹Orwo mere a doŋ otyeko kwero ecuban me Kato, i nino-nono ikoome, gin te cako bilo gin ame ocek i lobo-nono, ogati a tobi mom iye kede kai ame ocelo.

¹²I kare ame gin doŋ ocamo gin ame ocek i lobo-nono, odiko mere ocele manna te gik oko; jo Icrael mom dok te medde nwoŋo manna, i mwaka-nono gin doŋ te camo cam ocek i lobo Kanaan.

¹³Kare ame Yocwa onwoŋo tye ceggi i Jeriko, otiŋo waŋe malo te neno dano moro ame onwoŋo omako pala lweny i ciŋe kun tye ocuŋ i nyime. Yocwa te wot naka atot baŋe, te penye ni, “Yin itye tuŋ baŋwa onyo ca tuŋ baŋ okworwa?”

¹⁴En te dok iye ni, “Pe gire; cite aman abino acalo atel wi mony a Rwot.” Yocwa te ryebere piny, te wore, te penye ni, “Kara Rwotta mito ciko amiro mere niŋo?”

¹⁵Atel-wi mony a Rwot te kobbi Yocwa ni, “Gony amuk i tyeni oko, pien kan i cuŋ iye-nono obedo kan acil.” Yocwa daŋ te timo kittono.