Read lango Yocwa 6 Bible Online

Yocwa 6 - lango bible

Yocwa 6

¹I kare-nono onwoŋo rik ocego Jeriko atek meicel, anaka oko mere, me ŋattoro kur donyo oko dok dano daŋ kur dony i yie.

²Rwot te kobbi Yocwa ni, “Nen, doŋ amio Jeriko oko ciŋi, karacel kede rwottere kede jo luŋ atek i lweny.

³Jo luŋ ame romo lweny bino dorre mano boma man tyen acel; ibino bedo timo wunu kittono pi nino abicel.

⁴Olamdog abiro bino mako apel abiro me tuŋ rommi kun owoto kede i nyim canduk. I nino me abiro mere ibino dorre imanno wunu boma man tyen abiro kun olamdog kuto apel.

⁵Kare ame gin okuto tuŋ romo kun ri nakanaka, oyot ka iwinyo wunu opel kun kok kittono, lwak luŋ bino putte i woo kun owo i twon dwonnogo aloŋo; cel me Jeriko bino ŋoye piny luŋ, jo luŋ bino wot iye kun ŋat acel acel tiko nyime atir.”

⁶Yocwa wot a Nuni te lwoŋo olamdog, te kobbigi ni, “Tiŋ wunu canduk cikere, olamdog abiro mak apel abiro me tuŋ nyogi rommi owot kede i nyim canduk cikere a Rwot.”

⁷Dok te kobbi lwak ni, “Dorre wunu iwot wunu anyim, iwot iman wunu boma kun jo ame omako jami lweny telo nyim canduk a Rwot.”

⁸Olamdog abiro te mako apel abiro me tuŋ nyogi rommi telo kede nyim Rwot kun okuto owoto kede anyim, karacel kede canduk cikere a Rwot ame alubo yorgi, kite a rik Yocwa ociko kede lwak.

⁹Jo ame omako jami lweny onwoŋo otelo nyim olamdog ame tye akuto apel eka jo ame odoŋ cen te lubo ŋe canduk kun apel kok nakanaka.

¹⁰Ento Yocwa dok te ciko lwak ni, “Mom ibino wo wunu, dwonwu daŋ mom myero winyere kadi acel, dok daŋ mom ibino wunu kop kadi acel, tuno i nino ame abino cikowu iye ni doŋ iwo wunu, en amio ite doŋ wo wunu.”

¹¹En doŋ te miyo canduk a Rwot cako mano boma, kun mano tyen acel keken, eka gin gigi te dok i gonygi buto iye.

¹²Yocwa dok te dilo i bayi, olamdog te tiŋo canduk a Rwot.

¹³Olamdog abiro te mako apel abiro me tuŋ rommi telo kede nyim canduk a Rwot kun okuto apel nakanaka owoto kede anyim; jo ame omako jami lweny onwoŋo otelo nyimgi, eka jo ame odoŋ cen te lubo canduk a Rwot, kun apel kok nakanaka.

¹⁴I nino me aryo daŋ gin te dorre mano boma tyen acel keken, gin gigi te dok i gonygi. Gin te bedo mano boma kittono pi nino abicel.

¹⁵I nino me abiro mere gin te dilo con atek ame piny pwod awalakino; gin te bedo dorre mano boma i kite acellaca tyen abiro. I nino-nono keken en ame gin omano iye boma tyen abiro.

¹⁶Tyen me abiro mere, i kare ame olamdog doŋ okuto apel. Yocwa te kobbi jo ni, “Wo wunu doŋ, pien Rwot doŋ omiowa boma oko.

¹⁷Boma kede jami luŋ a tye iye obino jalo luŋ baŋ Rwot me aneka. Rakab ame alaya keken, kede jo luŋ a tye i ot baŋe, en ame bino bedo kwo; pien en a rik okano jo ame ocwao me roto piny.

¹⁸Ento wun myero igwokere wunu i kom jami ame doŋ otyeko jalo me aneka, kur dok ikwany wunu ginnoro i kom jami ame doŋ ijalo wunu oko me aneka pi Obaŋa, naka mio gony a jo Icrael doko me aneka luŋ, te kela ayela i komwu.

¹⁹Ento ryal, kede jabu kede jami luŋ me mola kede me nyonyo, gin luŋ gi-a Rwot acil gin luŋ obino tero i ka kano lim a Rwot.”

²⁰Jo doŋ te wo, opel te kok. Tekki jo winyo apel okok, jo luŋ te putte i woo kun owo i twon dwonnogo aloŋo, eka cel te ŋoye piny luŋ, jo luŋ te donyo i boma kun ŋat acel acel tiko nyime atir, gin te gamo boma-nono oko,

²¹Gin te neko jami luŋ ame tye i boma anaka co kede mon, itino kede odoŋe, dok kede rommi kede kana, gin luŋ ote tyekogi oko i pala lweny.

²²Yocwa te kobbi jo aryo a rik oroto lobo ni, “Wot wunu naka i ot alaya ca, iwot ikel wunu dako-nono oko, kede jo luŋ ame tye baŋe.”

²³Awobe aryo a rik oroto piny te daŋ wot kittono i ot alaya, ote donyo iye, kelo Rakab kede pappere, kede tottere, kede omego mere kede jami mere luŋ a rik tye baŋe; gin okelo wati mere luŋ ote ketogi oko i ŋe gony a jo Icrael.

²⁴Eka ote waŋo boma-nono oko i mac, karacel kede jami luŋ ame tye iye; ryal, jabu, kede jami me mola kede nyonyo keken en ame gin oketo i ka kano lim me ot a Rwot.

²⁵Yocwa te gwoko kwo a Rakab ame alaya, kede jo me ot a pappere kede jo luŋ a rik tye baŋe. Dako-nono gire te bedo iyi Icrael naka atot tin, pien en okano orot piny ame rik Yocwa ocwao me roto Jeriko.

²⁶Yocwa rik te miyogi kwoŋ i karenaca kun okobo ni, “Dano moro ame bino ya te dok gero boma man me Jeriko, myero cen oko i nyim Rwot. “Bino cano acakki tere kun nwoŋo wode me kao koŋ oto, aco dog cellere en bino guro nwoŋo cogo mere koŋ oto.”

²⁷Rwot rik obedo i Yocwa kittono, nyiŋe orwo i lobo nono luŋ.