Read lango Yocwa 7 Bible Online

Yocwa 7 - lango bible

Yocwa 7

¹Ento jo Icrael mom obedo ogen i kom jami a rik doŋ otyeko jalo pi Rwot, pien Akan wot a Karmi, wot a Jabdi, wot a Jera, me atekere a Juda, obin okwanyo jami mogo ame rik doŋ ojalo oko; omio akemo omako Rwot atek i kom jo Icrael.

²Kare ame Yocwa tye i Jeriko ocwao jo me wot Ai, ame ceggi kede Bet-awen, ame tye tuŋ kide me Betel, ocikogi ni, “Wot irot wunu piny.” Jo-nu rik te roto Ai.

³Kare ame gin odwogo baŋ Yocwa, gin okobbe ni, “Myero kur imi jowa luŋ wot kuno, mi ka jo a romo tutumia aryo onyo tutumia adek en ame wot lweny i kom jo Ai. Kur iwek jowa luŋ lolle me wot kuno, pien jo-nono mom pol wok.”

⁴Mannono te miyo jo ame ceggi romo tutumia adek oya i akina lwak te wot kuno, cite gin te wot riŋo oko i nyim jo Ai.

⁵Jo Ai rik te neko jo mogo i akinagi ame ceggi romo pyeradek wie abicel; dok daŋ ote ryemogi cakere i dog cel naka tuno i Cebarim, eka ote nekogi oko i luŋ. Koyo te onnyere atek i cuny jo, kom jo te kwil bala pii.

⁶Yocwa te ye yeco boŋŋi mere oko, te rette piny aryeba cuny i nyim canduk a Rwot, te ri kannono naka otyeno, en karacel kede otel a jo Icrael, kun daŋ oonyo apua i wigi.

⁷Yocwa te kobo ni, “Aman Rwot OBAŊA, piŋo kara ikelo jo man kan i ŋe Jordan, me bino miyowa i ciŋ jo Amor me tyekwa oko? Kono rik giwa oye bedo loka i ŋe Jordan!

⁸Ama Rwot, kara doŋ akob ŋo ba, kun doŋ jo Icrael oloko ŋegi oko baŋ okworgi!

⁹Pien ka jo Kanaan kede jo luŋ ame bedo i lobo man bino winyo, gin bino gurowa, eka ote miyo nyiŋwa rwenyo oko i wi lobo; kara yin doŋ ibino tamo gin aŋo pi twon nyiŋi ame dwoŋ wok-ki?”

¹⁰Rwot te kobbi Yocwa ni, “Ya malo, piŋo kara irette piny aryeba cuny?

¹¹Icrael otimo bal; gin oturo cikka ame acikogi kede, gin okwanyo jami mogo i kom jami ame rik doŋ ojalo oko baŋa. Gin okwalo kwo, okobo kop me goba, eka ote keto jami-nono i akina jamigi.

¹²Pi mannono Icrael mom twero cuŋ kadi acel i nyim okworgi; gin oloko ŋegi baŋ okworgi pien gin doŋ olokere odoko gin ame myero jal me aneka. Mom abino medde bedo kedwu, ka mom ikwanyo wunu gin ame ojalo baŋa oko i akinawu.

¹³Ya doŋ malo imi jo lonyere, ite kobbigi ni, ‘Lonyere wunu kenwu pi diki, pien Rwot Obaŋa me Icrael okobo ni, “Jami ame ojalo baŋa tye i akinawu, wun jo Icrael. Mom itwero cuŋ i nyim okworwu tuno waŋ ame ikwanyo wunu jami ame rik ojalo baŋa oko i akinawu.”

¹⁴Pi mannono, diki odiko obino kelowu ceggi kun ibino wunu atekere atekere; doŋ atekere ame Rwot okwanyo bino bino ceggi kun obino i doggola i doggola; eka doggola a dok Rwot okwanyo te bino ceggi kun obino i ot i ot; ot a dok Rwot okwanyo te bino ceggi kun obino dano acel acel.

¹⁵Ŋat ame Rwot okwanyo ame tye kede jami ame onwoŋo ojalo baŋa, obino waŋo awaŋa kede mac, kun owaŋe karacel kede jami luŋ ame en tye kede, pien en oturo cik a Rwot, dok en otyeko timo tim me lewic iyi Icrael.’ ”

¹⁶Yocwa rik daŋ te dilo ibayi te kelo jo Icrael ceggi kun kelogi atekere atekere; rik ote kwanyo atekere a Juda.

¹⁷Yocwa dok te kelo jo me atekere a Juda, eka ote kwanyo doggola a Jera, ote dok kelo doggola a Jera ceggi, kun okelogi acel acel, eka ote kwanyo Jabdi.

¹⁸Dok ote kela jo me doggola a Jabdi acel acel, ote kwanyo Akan wot a Kamri, wot a Jabdi, wot a Jera ame tye i atekere a Juda.

¹⁹Yocwa te kobbi Akan ni, “Woda, mi kwogo baŋ Obaŋa a jo Icrael, dok daŋ ipake, me ititta amanni gin ame doŋ itio; kur imuŋa.”

²⁰Akan te kobbi Yocwa ni, “Me ateni, an abalo baŋ Rwot Obaŋa a jo Icrael; gin ame rik atimo ene;

²¹i kare ame rik aneno boŋo moro aber ame oya i Cinar kun tye i akina jami ame oyako, kede cekel me ryal mia aryo, kede jabu moro ame pekkere romo cekel pyerabic, ate cako bedo i miti komgi, omio ate kwanyogi oko. Nen ba, tye ayikogi piny i lobo i kemana, ryal daŋ tye i tergi piny kuno.”

²²Yocwa doŋ te cwayo kwena, gin te ŋwec i kema mere; nen ba, gin te nwoŋo tye okano i kema mere, kun ryal tye i tere piny.

²³Gin te kwanyo oko i kema, ote ke lo baŋ Yocwa kede baŋ jo Icrael luŋ, gin te keto piny i nyim Rwot.

²⁴Yocwa kede jo Icrael luŋ te tero Akan wot a Jera kede ryal, kede boŋo kede jabu kede itino awobe kede anyira, kede twoni kane kede rommi, kema mere kede jami mere ducu, ote tero i luŋ me Akor.

²⁵Yocwa te kobo ni, “Piŋo kara ikelo can i komwa? Rwot bino keto can i komi tin.” Jo Icrael luŋ te na napo en kede gweŋe.

²⁶Gin te coko gweŋe apipim yido i kome ame pwod tye naka atot tin. Twon akemo ame rik onwoŋo omako Rwot te kwe oko. Mannono omio ote lwoŋo nyiŋ kabedo-nono ni, “Luŋ me Akor”, naka atot tin.