Read lango Yocwa 8 Bible Online

Yocwa 8 - lango bible

Yocwa 8

¹Rwot okobbi Yocwa ni, “Kur ilwor, cunyi daŋ kur poti, ya, iwot Ai, ter jo luŋ a romo lweny. Nen ba, atyeko doŋ miyo Rwot me Ai i ciŋi karacel kede jo mere luŋ kede boma mere kede lobo mere.

²Gin ame ibino timo i kom Ai kede rwottere, bino bedo a rom aroma i en ame itimo i kom Jeriko kede rwottere; ento jami mere ame iyako wunu kede limmere akwo ibino tero wunu me bedo megwu. Wot ikan wunu jo mogo imi pon i ŋe boma.”

³Yocwa te ya karacel kede jo luŋ me romo, me wot Ai. Rik te yero jo atek i lweny tutumia pyeradek, te cwayogi wot dyewor.

⁴Ocikogi ni, “Nen ba, wun ibino pono wunu i ŋe boma, myero kur ibed wunu abor meicel i boma. Wun luŋ myero ibed ame iyikere wunu.

⁵Aco an karacel kede jo luŋ ame tye baŋa, wan obino wot aceggi acega i boma. Ka ce gin bino donyo me lweny kedwa bala riki, wan obino ŋwec oko i nyimgi.

⁶Gin bino donyo me ryemowa, pien gin bino kobo ni, ‘Gin dok tye ariŋowa bala riki.’ Wan obino riŋogi kittono,

⁷wun doŋ ite ya wunu i kan ame ipono wunu iye, ite mako wunu boma oko; pien Rwot Obaŋawu bino miyo boma-nono i ciŋwu.

⁸Ka doŋ ityeko mako wunu boma, myero iwaŋ wunu oko, kun itimo wunu kite a Rwot okobo. Nen ba, an doŋ atyeko cikowu.”

⁹Yocwa te cwayogi, eka gin te wot kan amyero gin wot pon iye, gin te wot bedo i akina Betel kede Ai kun obedo tuŋ to me Ai, ento Yocwa te buto i akina lwak i dyeworrono.

¹⁰Yocwa rik te dilo i bal, te ŋiyo jo, te doŋ wot i Ai karacel kede odoŋe a jo Icrael kun en telo nyim jo.

¹¹Jo luŋ a romo lweny a rik tye baŋe owoto; gin rik ote wot a ceggi i boma, ote guro kemagi tuŋ anyarodi me Ai, kun luŋ tye i akinagi kede Ai.

¹²En te kwanyo jo aceggi romo tutumia abic, te miyogi pono i akina Betel kede Ai, i tuŋ to me boma.

¹³Gin rik te ryeyo mony kittono; mony adwoŋŋere rik te bedo i tuŋ anyarodi, eka mony i cennere te bedo tutuŋ to me boma. Ento Yocwa rik te buto i luŋ i dyeworrono.

¹⁴I kare ame rwot me Ai oneno man, en karacel kede jo mere, ame gin jo me boma-nono, gin rik te ru wot oko odiko con i luŋ ame tye tutuŋ Araba me wot lweny i jo Icrael; cite en mom oŋeo ni okwor tye opono i ŋe boma,

¹⁵Yocwa kede jo Icrael te bwologi calo jo ame oloo, ote riŋo kun odok tutuŋ tim.

¹⁶Jo Ai te lwoŋo jo luŋ i boma me ryemogi; pi ryemo Yocwa omio oterogi teŋe kannabor i boma.

¹⁷Lo moro ame ico rik mom te doŋ i Ai kede i Betel, ame mom owoto ryemo jo Icrael, gin oweko bomagi twolo ote ryemo jo Icrael.

¹⁸Rwot te ciko Yocwa ni, “Rye toŋ aliro ame tye i ciŋi-nu tuŋ Ai, pien abino miyo Ai i ciŋi.”

¹⁹Jo ame opono rik te ru ya oyotoyot i kabedogi; oyot ame Yocwa oryeo ciŋe malo, gin te ru donyo i boma, ote mako oko, ote daŋ ru waŋo oko.

²⁰Kare ame jo Ai oneno ŋegi, nen yito me boma doŋ tye aduny malo i polo. Ka riŋo te loyogi oko tuŋŋi kede tuŋŋi, pien jo ame rik oriŋo tuŋ tim olokere oko i kom jo ame rik aryemogi.

²¹Kare ame Yocwa kede jo Icrael doŋ oneno ni jo ame rik opono doŋ omako boma oko, dok daŋ yito me boma daŋ tye aduny malo, gin te lokere dwogo cen neko jo Ai.

²²Jo ocele daŋ te ya i boma bino i komgi, jo Icrael doŋ te gurogi dyere, man tuŋŋi, jo ocele tuŋ ca. Jo Icrael te nekogi ame moro mom obwot, mom daŋ olwi.

²³Cite Rwot me Ai ote mako akwo tero baŋ Yocwa.

²⁴Kare ame jo Icrael doŋ otyeko neko jo luŋ me Ai i dye bar kan ame onwoŋo gin oryemogi iye, kun gin luŋ doŋ otum oko i pala lweny ame moro mom obwot, jo Icrael luŋ te dok i Ai, te wot tyekogi oko i pala lweny.

²⁵Jo luŋ ame onwoŋo bedo i Ai oto i ninonono, co kede mon, welgi rik romo tutumia apar wie aryo.

²⁶Yocwa mom odwoko ciŋe piny ame rik eryeo malo kun toŋ aliro tye iye, naka ka oneko jo luŋ ame bedo i Ai.

²⁷Lim akwo keken kede jami luŋ ame oyako i boma-nono en ame jo Icrael otero me bedo megi kun olubo kop a Rwot ame rik eciko kede Yocwa.

²⁸Yocwa rik daŋ te waŋo Ai kittono, te balo ame te miyo wi odur yido iye atata naka atot tin.

²⁹Rik en te ŋabo rwot me Ai i kom yat naka otyeno; kare ame ceŋ doŋ amito poto, Yocwa te ciko ni kwany kome doŋ oko i kom yat, me bol kan ame odonyo kede i boma. Gin te coko gweŋe apipim yido i kome, ame pwod tye kuno naka atot tin.

³⁰Yocwa te canni Rwot Obaŋa me Icrael keno lam i wi kidi me Ebal,

³¹kite ame Muca amiro a Rwot rik ociko kede jo Icrael, acalo ocoo i buk me cik a Muca ni, “Keno lam ame oyiko i kidi ame mom opao, ame dano moro daŋ mom otiŋo nyonyo moro me tiyo.” Gin te miyo iye mot awaŋa kede mot me kweyo cuny.

³²Dok daŋ i nyim jo Icrael kuno, en rik te medo coyo cik a Muca. I kom kidi kite a rik Muca ocoo kede ikokome.

³³Jo Icrael luŋ, wele ame bedo i akinagi karacel kede anywali me Icrael, odoŋe, otel kede oŋolkopgi ocuŋ tuŋŋi kede tuŋŋi i ŋet canduk i nyim olamdog ame gin jo Levi ame otiŋo canduk me cikere a Rwot, kun nucugi tye i nyim kidi me Gerijim kede nucugi i nyim kidi me Ebal, kite acalo Muca amiro a Rwot rik ogeo ciko ni myero gin lammi jo Icrael winyo.

³⁴Icennere ote kwano kop me cikkono luŋ, kop me gum kede kop me ceno jo, kite ame ocoo kede i buk me cik.

³⁵Mom tye kopporo ame Muca rik ociko a mom Yocwa okwano i nyim cokere a jo Icrael luŋ, karacel kede mon kede itino kede orok ame bedo i akinagi.