Read lango Yocwa 9 Bible Online

Yocwa 9 - lango bible

Yocwa 9

¹Kare ame obakki luŋ ame onwoŋo rik tye i ŋe Jordan, lobo ame obedo kidikidi kede lobo ame tye piny i dog Nam Adwoŋ ame otikere kede Lebanon, jo Kitti, jo Amor, jo Kanaan, jo Periji, jo Kivi kede jo Jebuc owinyo,

²gin ocokere karacel kede cuny acel me lweny i kom Yocwa kede jo Icrael.

³Ento jo Gibeon ka owinyo, gin ame Yocwa otimo i kom Jeriko kede Ai,

⁴gin ote ŋolo megi ryeko. Gin oyiko peke me konyogi iyo, ote keto icao ame oti meicel i wi kanegi, kede opoko koŋo a daŋ oti oko, kun oyec dok daŋ okwo akwoa.

⁵Gin te ruko daŋ amuke ame oti i tyengi kun daŋ odadapo, kede boŋŋigi daŋ oti oko; pekegi luŋ onwoŋo otwo dok daŋ opuro atek.

⁶Gin rik te wot baŋ Yocwa i gony ame onwoŋo tye i Gilgal, gin te kobbe karacel kede co ocele me Icrael ni, “Wan obino i lobo abor meicel, aman doŋ cikere wunu kedwa kede cikkogo.”

⁷Ento jo Icrael te kobbi jo Kivi ni, “Aŋar ca ibedo wunu iyi akinawa, kara enno ote ote cikere kedwu niŋo ba?”

⁸Gin te gamo kop a Yocwa ni, “Wan giwa obedo omironi.” Yocwa te penyogi ni, “Kara doŋ ibedo wunu jo mene? Iya wunu ce i tuŋ kwene?”

⁹Gin te dokke ni, “Wan omironi oya i kuŋ abor meicel pi nyin Rwot Obaŋawu, pien wan owinyo pire karacel kede ginnoro luŋ ame en otimo i Miciri,

¹⁰karacel kede ginnoro luŋ ame en otimo i kom obakki aryo me a jo Amor a rik onwoŋo tye i ŋe Jordan. Cikon abaka ame bedo Kecbon, kede Og abaka ame bedo i Bacan ame yam bedo i Aciterot.

¹¹Odoŋe kede jo luŋ ame bedo i lobowa ocikowa ni, ‘Mak wunu peke me iwot wunu iyo, wot irwatte wunu kedgi, kobbigi ni, “Wan omirowu, aman doŋ cikere wunu kedwa kede cikkogo.” ’

¹²Ogatiwa ene; i kare ame okwanyo i udiwa me acamawa iyo, i nino ame wan oya kede i paco, onwoŋo gire pwod lyet; aman koŋ inen, doŋ otwo oko daŋ opuro oko.

¹³Opoko koŋwa-ni daŋ onwoŋo pwod nyen i kare ame opiko koŋwa iye; nen aman doŋ ototoa oko; boŋŋiwa kede amuke me tyenwa daŋ doŋ oyeyeca oko pi wot abor meicel.”

¹⁴Jo te camo pekegi kun mom koŋ openyo Rwot.

¹⁵Yocwa te yiko kop me bedo kedgi i kuc, kun daŋ cikere kedgi, me wekogi bedo; otel a lwak te kwoŋ baŋgi.

¹⁶Kare ame nino pwod okato adek keken, a gin doŋ ocikere kedgi oko, jo Icrael te winyo ni gin tye cok kedgi dok daŋ obedo i akinagi.

¹⁷Jo Icrael te cako wot ote tuno i bomagi i nino me adekkere. Bomagi onwoŋo Gibeon, Kepira, Beerot kede Kiriat-yearim,

¹⁸Cite jo Icrael mom te nekogi pien otel a lwak onwoŋo okwoŋo baŋgi i nyiŋ Rwot Obaŋa me Icrael; man omio lwak oŋuŋura i kom otelgi.

¹⁹Otel luŋ te kobbi lwak luŋ ni, “Wan otyeko kwoŋ baŋgi i nyin Rwot Obaŋa me Icrael, doŋ pi man no myero kur igudgi wunu.

²⁰Gin ame obino timo i komgi ene, wan obino wekogi obedo kwo, me akemo kur pot i komwa pi kwoŋ ame wan okwoŋo baŋgi.”

²¹Odoŋe ocikogi ni, “Wek wunugi obed kwo.” Mano te miyo gin doko obar yen kede otwom pii a lwak luŋ, kite ame otel obedo kobo kede i komgi.

²²Yocwa olwoŋogi te kobbigi ni, Piŋo kara ibwola wunu ni, “Wan otye kannabor meicel kedwu,” kun ibedo wunu i akinawa?

²³Pi mannono doŋ ocenowu oko, jo ocele i akinawu bino bedo obar yen, kede otwom pii pi ot Obaŋa.

²⁴Gin te dokki Yocwa ni, “Pien onwoŋo otitti omironi atira kite ame Rwot Obaŋawu ociko kede amiro mere Muca me miyowu lobo-ni luŋ, kede rwenyo jo luŋ ame bedo i lobo ame tye i nyimwu. Mannono okelliwa lworo meicel i komwa kede i kom kwowa, en omio ote timo kittono.

²⁵Aman doŋ ba, wan giwa otye i ciŋi; yin doŋ tim kite ame ineno ni ber dok daŋ oporre me atima i komwa.”

²⁶Gin ame en doŋ te timo ene, en olarogi i ciŋ jo Icrael; gin mom te nekogi.

²⁷Cite i nino-nono en te miyogi doko omwod yen kede otwom pi i a lwak kede me keno lam a Rwot, tuno naka atot tin, i kabedo ame en oyero.