Read lango 2 Jo Tecalonika 1 Bible Online

2 Jo Tecalonika 1 - lango bible

2 Jo Tecalonika 1

¹Waraga man oya i baŋ Paulo gin i Silvano, kede Temoteo. Baŋ lwak jo oye Kricito ame bedo i Tecalonika ame tye i Obaŋa Papo kede Rwotwa Yecu Kricito.

²Obaŋa Papo kede Rwotwa Yecu Kricito miwu winyo kede kuc.

³Omegowa, wan myero opwo Obaŋa didik pirwu. Ber opwoe wunu pien iyeewu tye adoŋo atek meicel, kede mar a dano acel acel i kom awottere daŋ tye amedde.

⁴Pi mano wan daŋ otye awaka i komwu i kin lwak jo oye Obaŋa i kabedo luŋ, pi diyo cunywu kede pi iyeewu i awuna kede can luŋ ame itye wunu ka kanyo.

⁵Mano en anen a nyuto kite ame Obaŋa ŋolo kede kop kakare, me wek bin kwanwu ni wun jo a myero i loc Obaŋa ame itye wunu ka neno can pire.

⁶Pien baŋ Obaŋawa nen atira ni, myero cul awunawu baŋ jo awunowu,

⁷eka te miyowu weo, wun jo ame owunowu, anaka wan daŋ. Mano en bino timo i kare ame Rwot Yecu bino nen iye a kun aya i polo karacel kede omalaika mere atek i dye mac a lyel.

⁸I kare-nono en bino culo kwor i kom jo ame mom ŋeo Obaŋa kede i kom jo a pyem amut aber i kom Rwotwa Yecu.

⁹Kop ame obino ŋolo i komgi en can me to a mom tum, kun oryemogi oko i nyim Rwot kede i nyim teko me kwogo mere,

¹⁰i nino-nono, i kare ame en bino dwogo kun jo mere mie kwogo, ame owure i akina jo ducu oye en; pien rik iye wunu kop ame wan otito baŋwu.

¹¹En omio wan okwao Obaŋa pirwu nino luŋ, me en mi ibed wunu jo a kwowu rwatte i mittere me lwoŋowu, me Obaŋawa konywu cobo mitwu luŋ abeco kede tic ducu ame itio wunu pi iyee.

¹²Mano bino miyo jo keto kwogo i nyiŋ Rwotwa Yecu Kricito pirwu, dok wun daŋ ibino wunu nwoŋo kwogo pire, pi winyo ame oya i baŋ Obaŋawa kede Rwotwa Yecu Kricito.