Read lango 2 Jo Tecalonika 2 Bible Online

2 Jo Tecalonika 2 - lango bible

2 Jo Tecalonika 2

¹Omegowa, kop i kom dwogo a Rwotwa Yecu Kricito kede cokerewa me rwatte kede, obako dogwa baŋwu ni,

²kur iwek tamwu rweny oko iye oyotoyot, cunywu daŋ kur poti, kadi pi kop adwarpinnyoro onyo pi kop ame orabo, onyo waraga moro ame okobo ni oya i baŋwa, ame kobo ni, nino a Rwot doŋ otuno oko.

³Ŋattoro kur bwolwu i yore luŋ, pien nino-nono mom ru abino, tuno waŋ ame jem i kom Obaŋa koŋ obedo tye, dok aturcik daŋ doŋ otyeko nen oko, dano ame bino rwenyo odoco.

⁴En pyem, dok kette kene me bedo malo aloo gin luŋ ame olwoŋo ni Obaŋa, onyo ginnoro ame oworo; dok bedo i kommere i ot Obaŋa kun nyutte kene ni en Obaŋa.

⁵Mom ipo wunu ni, rik atittiwu man i kare ame pwod atye baŋwu?

⁶Daŋ iŋeo wunu gin ame tye ka geŋe i kare-ni, wek onen ka doŋ kare mere oromo.

⁷Pien twer a mom ŋeye ame mio jo turo cik aman tye doŋ atic; cite ŋat a geŋo pwod bino geŋo ituno ka doŋ oryemo oko.

⁸Icennere aturcik bino nen, eka Rwot Yecu te neko oko kede awura doge, tyeko oko, i kare ame en bino dwogo te nen oko kannaler.

⁹Bino aturcik aya i tic Catan kun tye kede kwone tic atek luŋ, anyuttogo kede taŋo mogo me goba.

¹⁰Dok bino bedo kede lwak abwole areco pi jo ame bino rwenyo odoco, pien gin okwero maro kop me ateni ame kono largi.

¹¹Pi mannono Obaŋa bino ketogi i te twer me bwol, me gin oye goba,

¹²wek kop lo jo luŋ a mom ye kop me ateni, ento yigi yom i tim a mom atira.

¹³Omegowa ame Rwot maro, myero wan opwo Obaŋa pirwu nino ducu, pien Obaŋa ogeo yerowu con me larowu pi Cuny Acil ame lonyowu bedo acil, kede pi ye kop me ateni.

¹⁴Olwoŋowu i man kede amut aber a wan orabo me mi inwoŋ wunu kwogo a Rwotwa Yecu Kricito.

¹⁵Pi mano omegowa, cuŋ wunu atek, mak wunu kite a wan opwonyowu kede, i kop onyo i waraga.

¹⁶Rwot Yecu Kricito ikome kede Obaŋa Papawa ame marowa dok kweo cunywa odoco kede gen aber ame obino pi kica,

¹⁷okwe cunywu, omokwu atek i tic kede i kop luŋ abeco.