Read lango 1 Temoteo 1 Bible Online

1 Temoteo 1 - lango bible

1 Temoteo 1

¹Waraga man oya i baŋ Paulo ame akwena a Kricito Yecu pi cik Obaŋa Alarwa kede Yecu Kricito ame genwa ocuŋ i kome.

²Baŋ Temoteo atinna me ateni iyi iyee. Obaŋa Papo kede Kricito Yecu Rwotwa omii winyo, kica kede kuc.

³Acalo rik akwai i kare ame awoto Makedonia, pwod amito idoŋ i Epeco me wek icik jo mogo kur pwony pwonnyoro apat,

⁴dok kur keto cunygi i kop me icina kede nyiŋŋogo ame oryeo abocoboco me kwaro, ame kelo ka tam atata, mom konyo yik Obaŋa ame ocuŋ i kom iyee.

⁵Rik aciki kit man me jo bed kede mar ame dano bedo ka yie cil daŋ ler aboŋo balloro, dok iyee mere daŋ goba mom iye.

⁶Jo mogo ogak iye oko ote donyo i ceko koppogo a konnyere mom.

⁷Gin omito bedo opwony cik, kun mom oniaŋ a kadi kop ame okobo, onyo gin ame okobo kop i kome, ame gin ocuŋ iye atek wok-ki.

⁸Wan oŋeo ni cik ber ka dano otio kede i kite a cik mito,

⁹kun niaŋ ni, cik mom oketo pi jo a kitegi atira, ento pi oturcik kede jo a mom kede winy; pi jo a mom lworo Obaŋa kede obalo, pi jo a mom cil kede jo a mom ŋeo Obaŋa, onek papagi, onek totogi, kede onek jo ocele.

¹⁰Dok pi jo a timo tim me coco, ocod co wadgi, okwal jo me acata, ogoba, jo a kwoŋo nononono, kede en ocele mere luŋ a mom rwatte kede pwony me ateni.

¹¹Mano en pwony ame nwoŋere i amut aber a rik omia me araba, amut aber ame tito pi kwogo Obaŋa ame opwoo.

¹²Apwoo ŋat ame omia teko me tiyo man, en Kricito Yecu Rwotwa, pien en doŋ okwana ibedo agen, eka te keta i ticcere,

¹³kadi bed rik an koŋ ageo yete, wune, kede roko kolo i kome. Ento otima kica, pien rik atimo i towaŋ kede aboŋo iyee,

¹⁴eka winyo a Rwotwa te medde meicel i koma karacel kede iyee kede mar ame tye i Kricito Yecu.

¹⁵Kop man kop ateni, myero jo luŋ oye ni, Kricito Yecu rik obino i lobo pi laro obalo Iyi akina obalo, an me agege;

¹⁶ento otima kica pi kop man, me wek i akina obalo, Yecu Kricito ge nyuto diyo cunyere aber tuŋ baŋa acalo anen baŋ jo ocele ame bino ye en, eka ote nwoŋo kwo a perakino nakanaka.

¹⁷Woro kede kwogo obed nakanaka baŋ Abaka a loo kare luŋ, a mom to, a mom nen, Obaŋa acel kene. Amen.

¹⁸Atina Temoteo, amii cik man ame rwatte kede kop ame rik odwarpiny okobo, me wek ka ilubo kopgi, irom romo aber i mony,

¹⁹a kun imako iyee atek kun yii ler. Pi kwero tam ame i yigi ame nyuttigi balgi, jo ocele iyeegi aballe oko.

²⁰Jo mogo i akinagi Kumenayo kede Alegejanda, rik amio iciŋ Catan wek opwonyere owek yeto Obaŋa.