Read lango 1 Temoteo 3 Bible Online

1 Temoteo 3 - lango bible

1 Temoteo 3

¹Kop man kop ateni: ka ce dano mito tic me bedo atel jo Obaŋa, nwoŋo en omito tic aber.

²Doŋ ba, atel jo Obaŋa myero bed aboŋo kopporo ame ojuke iye, won dako acel, a gwokere kene, a ryek, dano ame jo woro, agwok wele, apwony aber,

³a mom amero, a mom akolo, ento mwol, a mom ada atata, dok mom amar lim.

⁴Myero en bed ŋat ame loo ode aber kun gwoko itino mere bedo i winy baŋ odite, dok daŋ oworo i yore luŋ;

⁵pien ka ce dano mom twero loyo ode en ikome, twero gwoko lwak jo oye Obaŋa niŋo?

⁶Myero mom bed dano a pwod olokere nyen onyo mio den awaka, eka te poto oko, kop te loye bala a rik oloo Catan.

⁷Medo i mano, myero en bed dano ame jo i oko pwoo, me en kur kel ayet i kome a mie poto i owic a Catan.

⁸Amannono, okony tic i kin jo Obaŋa, myero daŋ bed jo a romo awora, jo a mom doggi aryo, a mom okak koŋo naka i obyel kweri, mom oworo me nwoŋo lim,

⁹myero daŋ obed jo ame niaŋ aber i muŋ me iyeewa, kun cunygi ler.

¹⁰Myero koŋ ge temogi; ka ce onwoŋo ni kopporo arac mom i komgi, eka doŋ ote miyogi bedo okony tic.

¹¹Mon daŋ amannono, myero bed mon a romo awora, a mom ocok dog jo, a gwokere kengi dok daŋ ogen i jami luŋ.

¹²Okony tic myero bed wegi mon acel acel, myero daŋ oloo itinogi kede udigi luŋ aber;

¹³pien okony tic ame tio tic abeco nwoŋo dito pirgi kengi, dok odoko jo ame twero kobo kop i tek cuny i kom iyee a tye i Kricito Yecu.

¹⁴Atye i gen me bino baŋi oyot, ento acoo pwony man baŋi me wek,

¹⁵ka ce agal, iŋe kite a dano myero bed kede i ot Obaŋa, ame en lwak jo oye Obaŋa akwo, ame en pagi kede acakki tere atek, me ateni.

¹⁶Muŋ me dini a wan otuco, pire dit meicel; Rik en onyutte i kom, okwane ni kite atir pi Cuny Acil, omalaika te nene, orabo pire baŋ Orok, oye en i wi podo luŋ; ote tere malo i kwogo.