Read lango 1 Temoteo 4 Bible Online

1 Temoteo 4 - lango bible

1 Temoteo 4

¹Cuny Acil kobo kannaler ni waŋŋoro anyim, jo mogo bino bolo iyeegi oko, ote cako lubo jogi ame ogoba kede pwony a cen areco.

²Pwony-nyi ya i baŋ wegi edwali ame tam me yigi a nyuttigi balgi odil oko acalo gin owaŋo i nyonyo alyet.

³Gin juko jo ni kur nyom, dok daŋ ociko jo ni kwer cemmogo; aco Obaŋa rik oketo me jo a ye dok ŋeo kop ateni, gam kede pwoc.

⁴Pien jami luŋ ame Obaŋa oketo beco, mom tye moro a myero kwer iye, ka ce ogamo kede pwoc;

⁵pien kop Obaŋa kede kwac lonyogi bedo acil.

⁶Ka iketo pwony magi i nyim omegowa, ibino bedo atic a Kricito Yecu aber, ame opito i kop me iyee kede pwony abeco ame ibedo lubo.

⁷Kwer oko kop me icina me miŋo a mom me lworo Obaŋa. Pwonyere i kwo me lworo Obaŋa.

⁸Pwonyere me ryeyo ler kom konnyere tye, cite nok; ento lworo Obaŋa konyo i yore luŋ, pien twero kelliwa winyo i kare man kede i kwo a bino anyim acalo Obaŋa ociko.

⁹Kop man kop ateni, myero jo luŋ ye.

¹⁰Man en omio wan ololle dok ocukere, pien wan oketo genwa i kom Obaŋa akwo, ame en Alar jo luŋ, akato mere jo a tye kede iyee.

¹¹Cik kop man, dok ipwony i jo.

¹²Kur imi ŋattoro cai ni pien yin itidi, ento mi anen aber baŋ jo oye, i koppi, i kitti, i mar, i iyee kede bedo acil a mom ijebere i ginnoro arac.

¹³Mi kare meri i kwano coc a yam ocoo i nyim lwak, i cuko cuny jo, kede i pwony, ituno ka an abino.

¹⁴Kur iwek mot me cuny ame itye kede to nono, a rik omii pi kop odwarpiny i kare ame odoŋe keto ciŋgi i wii.

¹⁵Nyut kop magi i tic, ketto cunyi iye, me jo luŋ nen kit ame itye ka wot kede anyim.

¹⁶Gwokere keni, dok igwok pwonnyi daŋ; kanyakino iye, pien ka itimo amanno, yin ikomi ibino larre karacel kede jo a winyi daŋ.