Read lango 1 Temoteo 5 Bible Online

1 Temoteo 5 - lango bible

1 Temoteo 5

¹Kur ijuk adwoŋŋoro, ento cuk cunye acalo pappi; awobe tergi acalo omegoni,

²mon adoŋo acalo toto, kede mon atino acalo amegoni, aboŋo tammoro arac.

³Wor mon ame coggi oto ame odoŋ kengi.

⁴Ka ce dako a cware oto tye kede itino mere onyo ikwae, myero gin koŋ pwony ticgi me dini i otgi gin ikomgi, kun daŋ oculo onywalgi pi konnyogo a rik gin omiogi, pien man Obaŋa pwoo.

⁵Dako ame cware oto ame odoŋ kene aboŋo ŋattoro a konye, keto gennere luŋ i kom Obaŋa dok daŋ bako doge kun kwao Obaŋa dyecen kede dyewor.

⁶Aco dako a cware oto ame yenyo yomcuny me jami abeco keken, doŋ oto oko kadi pwod kwo.

⁷Ket cik man, me gin bed aboŋo kopporo ame ojukogi iye.

⁸Ka ce dano moro mom mio ginnoro me konyo wati mere, akato mere ode en ikome, nwoŋo doŋ okwero iyee mere oko, dok daŋ rac kato ŋat a mom oye.

⁹Pe myero co nyiŋ dako a cware oto ame mwaka me dittere pwod mom ru oromo pyerabicel nono, dok daŋ myero en obed dako a yam obedo i cware acel keken.

¹⁰Myero nen ni ticcere ber, ka ce yam opito otino, ojolo wele, olwoko tyen jo Obaŋa, okonyo jo a yam owunogi, dok daŋ omiye kene i tiyo gin aber i yore luŋ.

¹¹Ento myero mom ico wunu mon a pwod tino a coggi oto; pien mit me komgi twero miyo gin okwero Kricito, ote mito nyomere dok oko;

¹²mio oŋolo kop loogi pi turo cikeregi me agege.

¹³Medo i mano, odoko owackom ame wowota i ot i ot; mom owackom keken, ento odoko daŋ okob kop atata, mon a ridde i gin a mom megi, ote kobo kop ame mom romo akoba.

¹⁴Pi mannono, omio an amito ni mon a pwod tino a coggi oto myero nyomere, nywal otino, lo udigi, me kur omi okworwa kare me kobo ginnoro arac i komwa.

¹⁵Pien mogo doŋ ogak, tye a lubo Catan.

¹⁶Ka ce dako moro ame oye Rwot tye kede wati mere ame gin mon to, myero en omigi kony; me lwak jo oye Obaŋa kur ye peko, okony ka mon ame coggi oto ame akonygi moro mom.

¹⁷Odoŋe ame loo loc aber myero worgi meicel, akato mere jo ame lolle atek i tito kop kede pwony.

¹⁸Pien coc a yam ocoo kobo ni, “Kur itwe dog twon ka adino kal,” dok daŋ ni, “Atic myero culle ocara mere.”

¹⁹Kur iye pido moro i kom adwoŋŋoro, kono ka, ka tye caden aryo onyo adek.

²⁰Aco jo ame peny apenya i balgi, jukgi i nyim jo luŋ, me mi jo ocele bed i lworo.

²¹Aciki i nyim Obaŋa kede Kricito Yecu kede omalaika ame oyero, gwok cik magi kun mom ijeŋere i wat onyo i dyere.

²²Kur daŋ iruye keto ciŋi i kom ŋattoro onyo lutte i bal a ŋat ocele; gwokere ibed giri acil.

²³Ya aman, kur doŋ imat ka pii keken, mat daŋ koŋo aduno pi konyo yii kede too ame maki kare i kare.

²⁴Bal a jo mogo nen oko kannaler, ame cimo oko ni kop bino loyogi, ento bal a jo ocele nen icen.

²⁵Tic aber daŋ nen oko kannaler; kadi mom amannono, mom twero kanne odoco a mom onen.