Read lango 1 Temoteo 6 Bible Online

1 Temoteo 6 - lango bible

1 Temoteo 6

¹Jo luŋ ame obedo opii, myero ter odonegi acalo jo a romo awora i yore luŋ, me ŋattoro kur yet nyiŋ Obaŋa onyo pwonywa.

²Jo ame odonegi doŋ oye Rwot, myero mom okwer worogi, ni pien gin obedo omego, ento myero oti baŋgi aber atek ateka, pien jo ame gin okonyo kede ticgi obedo jo ame oye Rwot dok jo ame gin omaro. Pwony kop magi dok icuk cuny jo iye.

³Ka ŋattoro pwonyo mege apat kun mom lubo kop ateni a Rwotwa Yecu Kricito kede pwony me diniwa,

⁴nwoŋo en odeŋ awaka ento mom ŋeo ginnoro kadi acel. Yie Opoŋ i par areco me pyem kede daa i kom koppogo; aco magi-nono ya iye nyeko, pyem, ayet, par areco a rwenyo gen.

⁵Dok daŋ mio jo a ryekogi oballe, ame mako kop me ateni loogi oko, bedo wowoa nononono, kun otamo ni dini en yore me nwoŋo lonyo.

⁶Lonyo dwoŋ meicel i dini ka ce iyeŋ ka i ginnoro keken ame itye kede.

⁷Pien wan mom okelo ginnoro i lobo, dok daŋ mom otwero tero moro iya i lobo.

⁸Ento ka otye i cem kede ginaruka, magi-nono gire romowa.

⁹Ento jo ame paro pi bedo olonyo mio obitogi ote poto oko, eka ote moko i owic a Catan pi mitgi apol me miŋo ame wunogi, mio obedo acalo jo omwonyere i nam, te miyo orwenyo odoco.

¹⁰Pien maro lim, en acakki me gin luŋ areco; man en okelli jo apol ya oko iyi iyee, eka ote miyo lwak can apol ata corre i komgi.

¹¹Ento yin dano Obaŋa, leŋŋi maginogo yo, ento ket cuny i kite atir, i lworo Obaŋa, i iyee, i mar, i diyo cuny, i mwolo.

¹²Rom romo aber i Iweny, romo me iyee, mak atek kwo a perakino nakanaka, ame rik olwoŋi iye i kare ame ituco iyeeni aber i wan ocaden apol ata.

¹³Aciki i nyim Obaŋa ame mio kwo baŋ jo luŋ, kede i nyim Yecu Kricito, ame otuco iyee mere aber i kare ame mio cadennere i nyim Pontio Pilato,

¹⁴gwok cik ame omii, aboŋo roccoro i komi onyo kopporo ame ojuki iye, ituno ka Rwotwa Yecu Kricito bino nen.

¹⁵Obaŋa ame opwoo, Won Twer acel kene, Abaka obakki, Rwot a rwode, bino nyuto man ka kare ikome oromo.

¹⁶En Obaŋa acel kene a mom to, ame bedo i lero moro a mom nokere, anaka cene ŋattoro mom ru onene, mom daŋ twero nen gire. Woro kede twer a mom gik obed baŋe. Amen.

¹⁷Cik olonyo me kare man owek wakere, kadi keto gengi i kom lonyo ame mom genne, ento i kom Obaŋa ame miowa jami luŋ abup me yomoro cunywa.

¹⁸Myero gin oti tic abeco, obed olonyo i timo jo ber, i poko jami, kede i miyo mot i yomcuny.

¹⁹Mano nwoŋo gin okano mono aber pirgi kengi pi kare me i nyim, me gin mak kwo ame en kwo ikome.

²⁰Ama Temoteo, gwok gin a rik ojalo i ciŋi. Gwokere i ceko kop a mom me woro Obaŋa, kede i pyemmogo a ya i gin ame olwono gobagoba ni “ŋec”:

²¹pien jo mogo ame kobo ni otye kede kodi ŋeccono ocobo iye piny nono i kop a mako iyee. Winyo Obaŋa bed kedi.