Read lango 2 Temoteo 2 Bible Online

2 Temoteo 2 - lango bible

2 Temoteo 2

¹Atinna, yin doŋ bed atek ba, pi winyo ame omiowa i Kricito Yecu.

²Gin ame iwinyo i baŋa i nyim ocaden apol, yin daŋ ikob baŋ jo a genne a romo pwonyo i jo ocele.

³Kany gin arac ame otimo i komi, bala jo ocele daŋ tye akanyo, acalo bala acirikale a Yecu Kricito aber.

⁴Mom tye acirikale moro a tye i dog tic ame dok mio tic i oko bodo wie, pien tammere mito yomo cuny ŋat ocoe i mony.

⁵Apyem i tuko mom twero loyo tuko ka mom owapo icwil me tukonono.

⁶Apur ame ololle i poto en ame myero ge camo gin ame ocek iye.

⁷Tam gin ame akobo, pien Rwot bino miyi iniaŋ i kop-pi luŋ.

⁸Po i kom Yecu Kricito, ame ocer iyi akina a jo oto, akwar Daudi, kite a an arabo kede amut aber.

⁹Amut aberrono en gin ame atye akanyo can pire, kun otwea i jegere bala atimo twon balloro! Cite kop Obaŋa gire mom otweo.

¹⁰En gin omio atye akanyakino kare luŋ, pi jo ame oyero, me gin daŋ onwoŋ larre a tye i Kricito Yecu, karacel kede kwogo a mom gik.

¹¹Kop man kop ateni, ni, “Ka wan oto kede, obino daŋ kwo kede;

¹²ka wan okanyakino, obino loc karacel kede; ka wan okwere, en daŋ bino kwerowa;

¹³ka wan jo a mom genne, en gire genne nakanaka, pien mom twero kwerre kene.”

¹⁴Poyo wigi i kop man, dok icikgi i nyim Rwot, ni gin owek pyem i kom nyiŋ kop apapat, pien mom konyo ginnoro, cite lunyo ka balo jo a winyo abala.

¹⁵Diye atek me miye keni baŋ Obaŋa acalo ŋat ame opwoo, atic a mom i ginnoro a lewic myero make iye, ame tero kop me ateni i yo atira.

¹⁶Kwer oko ceko kop a mom me woro Obaŋa, pien kodi koppono medo rwenyo jo arwenya i lworo Obaŋa,

¹⁷dok daŋ kopgi bino tuco yore bala bur a camo kom dano oyotoyot. Kumenayo gin kede Pileto tye i akina a jo-nono.

¹⁸Gin doŋ ogom oko i kop me ateni kun okobo ni cerwa doŋ okato oko con. Gin otye obalo kede iyee ajo mogo.

¹⁹Cite acakki te ot ame Obaŋa ocibo doŋ tye ame ocuŋ atek ikin, ame daŋ i tye coc man i kome ni, “Rwot ŋeo jo mere,” dok ni, “Dano acel acel ame lwono nyiŋ Rwot myero pokere oko i bal.”

²⁰I ottoro adwoŋ, mom bedo iye ka jami me jabu kede ryal keken, cite bedo iye daŋ jami mogo ame otio i yat kede ame otio i lobo; mogo otio kedgi i kare me kwogo keken, ento mogo ololo i kare ducu.

²¹Ka ce ŋattoro olonyere kun oweko kite areco oko, en bino bedo tabo ame otio kede i kare me kwogo, ame bedo acil, ame konyo won ot, ame oyikere pi ticcoro ducu aber.

²²Cac oko agoma yic meri me awobi, eka ite keto tammi i kom kite atir, iyee, mar, kede kuc, karacel i jo luŋ a kok baŋ Rwot kun yigi cil.

²³Pyem me miŋomino ame bino pi kwiapiny kwer daŋ oko; yin iŋeo ni kodi pyemmono kelo daa.

²⁴Amiro a Rwot myero bed ŋat a mom da atata, myero bed ŋat akica baŋ jo luŋ, apwony adiro, ŋat a dio cunye,

²⁵ŋat a tiro jo a pyem kede mwolo, Atot onyo Obaŋa bino miyogi cuny me ŋut, eka gin te niaŋ aber i kom kop me ateni,

²⁶mio ryekogi te dwogo oko, ote bwot iyi owic a Catan, ame rik onwoŋo omakogi, omiogi tiyo gin en a mito.