Read lango 2 Temoteo 3 Bible Online

2 Temoteo 3 - lango bible

2 Temoteo 3

¹Cite ber iniaŋ man ni, i kare me agikki, piny bino bedo arac i kare mogo.

²Pien jo bino maro ka komgi kengi, kun obedo omar lim, owaka, ocac, oyet jo. Mom obino winyo onywalgi, mom obino miyo pwoccoro, mom obino paro pi Obaŋa.

³Mom obino maro jo wadgi; gin bino kwedde atata, obino bedo ocok dog jo, jo a mitgi mom jukere, jo ager ame dag ginnoro aber,

⁴wegi erupe, jo a tye atata a mom paro piny, jo a yeyea, jo a maro yomyic akaka maro Obaŋa.

⁵Gin bino lubo dini ka i kitegi a nen i oko, kun okwero teko mere. Dup jo-nono adupa.

⁶Pien tye jo mogo i akinagi ame ridde i pacci a jo, te mayo tam a monnogo amimiŋ ame peko me bal obwoo, ame mitgi apapat bedo wayogi tuŋŋi i tuŋŋi,

⁷kun gin mito pwonyere i kare luŋ, cite mom dok otwero niaŋ i kop me ateni.

⁸Jonono rom i Yane kede Yambure a rik opyem i Muca, pien gin daŋ otye a pyem i kop me ateni i kite acellono; ryekogi doŋ oballe oko, iyeegi mom tye kakare.

⁹Cite gin mom obino medde kede kannabor wok, pien miŋogi bino ŋeye oko baŋ Iwak, bala mea jo aryo ca.

¹⁰Cite yin giri ityeko na keda kun ineno pwonnya, kitena kede tam ame aketo i nyima. Ineno iyeena, diyo cunya, marra, kite ame akanyakino kede.

¹¹Ineno kit ame owuna kede, kede can ame aneno; iŋeo gin ame otimere i koma i Antiokia, i Ikonio, kede Licitra, kile awunawuna a rik akanyo; cite Rwot gire olara i ginnoro luŋ aluŋa.

¹²Ateni, jo ducu a mito wopo kite kwo ajo a Iworo Obaŋa, kun obedo i Kricito Yecu, obino wunogi,

¹³kun jo areco kede jo ogoba, obino medde bedo arac ame okato kare, kun obwolo jo, gin daŋ obwologi.

¹⁴Cite yin giri myero imedde i gin ame ipwonyo, kede ame iye ateteni, kun iŋeo jo a rik opwonyi iye.

¹⁵Iŋeo daŋ ni; cakere i tinoni iŋeo coc acil a yam ocoo, ame twero pwonyi i yo me larre pi ye Kricito Yecu.

¹⁶Coc acil luŋ a yam ocoo, ocoo pi teko a Cuny Obaŋa. Konyo me pwony, me nyuto bal, me twenyo kite a jo, me nayo jo i lubo kite atir,

¹⁷me dano Obaŋa bed ame ocwiny, daŋ ame oyikere i yore luŋ, ame romo tiyo ticcoro aber luŋ.