Read lango Tito 1 Bible Online

Tito 1 - lango bible

Tito 1

¹Waraga man oya i baŋ Paulo, amiro Obaŋa dok daŋ akwena a Yecu Kricito. Rik oora pi nyayo iyee a jo Obaŋa ame eyero, kede niaŋogi i kop me ateni ame rwatte kede kwo me woro Obaŋa,

²me gin obed kede gen me nwoŋo kwo a perakino odoco. Obaŋa ame mom kobo kop goba rik ociko pire iyi ageyi piny,

³eka te nyuto oko kannaler ka kare mere oromo, i koppere ame omia me araba pi cik Obaŋa Alarwa.

⁴Baŋ Tito, atinna me ateni ame onywako kede iyee acel: Obaŋa Papawa kede Alarwa Kricito Yecu omii winyo kede kuc.

⁵Man gin omia aweki i Kurete, me wek iyik gin a yam odoŋ a mom tye kakare, dok iket odoŋe i boma adoŋo ducu, i kite a rik aciki kede ca.

⁶Jo-nono myero bed jo a kopporo arac mom i komgi, jo a mongi tye acel acel. Itinogi bed jo oye Rwot, ame kopporo me caro caro mom owinyere i komgi, a mom oŋudi.

⁷Pien atel jo Obaŋa, acalo en daŋ agwok jami Obaŋa, myero bed ŋat a kopporo arac mom i kome. Myero mom bed ŋat atiŋa onyo a ŋo oyotoyot, onyo amero, onyo akolo, kadi aworo me nwoŋo lim.

⁸Myero en bed agwok wele, amar gin aber, dano a loye kene, ame kite atira, a cunye cil, dok ŋat a gwokere kene.

⁹Dok daŋ myero en mak atek kop Obaŋa me ateni a rik opwonye kede, ame mio en twero cuko cuny jo kede pwony me ateni, dok twero loyo tam a jo a pyem kede.

¹⁰Pien jo ame oŋudi tye pol, jo a kobo kop a tere mom, kede obwol jo, akato mere eryoŋet a jo a mito ni, jo oye Kricito myero koŋ lirre.

¹¹Kodi jo-nono myero mi liŋ oko, pien gin tye abalo jo apol kede jo i udigi luŋ, pi pwonyogi gin a mom porre gin ipwonyo, pi woro me nwoŋo lim.

¹²Lo moro i akinagi ame adwarpinygi ikome rik okobo ni, “Jo Kurete kare luŋ gin ogoba, leyi areco, oworo anyap.”

¹³Cadennono tye ateni; pi mano myero ijukgi kede teko, me gin obed kede iyee me ateni,

¹⁴owek doŋ keto cunygi i kop me icina Ojudaya, kede cik ajo ame kwero kop me ateni.

¹⁵Baŋ jo acil, jami luŋ daŋ cil, cite baŋ jo oballe, kede jo a mom tye kede iyee, mom tye ginnoro acil i baŋgi. Ryekogi ikome kede tam me yigi ame nyuttigi balgi doŋ oballe oko.

¹⁶Gin otuco ni oŋeo Obaŋa, cite gin dok obedo kwere oko kede timgi; gin odoko acalo gin ame okwero, jo a mom kede winy, a mom doŋ romo tiyo ticcoro aber.