Read lango Tito 2 Bible Online

Tito 2 - lango bible

Tito 2

¹Ento yin, pwony gin ame rwatte kede kop me ateni.

²Kobbi jo adoŋo ni gin obed jo a gwokere kengi, jo a romo awora, jo a loo tamgi kengi, jo ame iyeegi kede margi tye kakare kun gin ocuŋ iye atek.

³Amannono daŋ kobbi mon adoŋo ni gin myero obed kede woro i kitegi ducu, mom ocok dog jo, mom jo odoko opii a koŋo. Gin myero obed opwony me gin aber,

⁴eka ote pwonyo mon atino imaro coggi kede otinogi,

⁵dok obed mon a loo tamgi kengi, mon acil aboŋo tammoro me caro caro, a gwoko pacogi, mon ame okica kun oworo coggi, me jo ocele kur yet kop Obaŋa.

⁶Amannono daŋ, cuk cuny awobe me gin gwokere kengi.

⁷Yin ikomi inyutte acalo anen me tic aber i yore luŋ. Pwonnyi bed apek aboŋo ginnoro arac iye,

⁸kun ikobo kop ateni a mom otwero nwoŋo roccoro iye, me wek lewic mak ŋattoro a mito pyem kedwa, pien ginnoro arac mom nen a myero ekob i komwa.

⁹Kob opii ni owor odoŋegi, oyom cunygi i yore luŋ. Kur gin obed opyem,

¹⁰kadi ceyo gigi mogo, cite myero gin onyut ni gin jo a genne aber meicel, me wek i gin ducu, gin omi pwony Obaŋa Alarwa onen amwonya.

¹¹Pien winyo Obaŋa doŋ onen pi laro jo luŋ.

¹²Winyo mere-nono pwonyowa me kwero kite a jo a mom lworo Obaŋa, karacel i mit ducu me lobo man, dok pwonyowa me gwokere i kwowa i lobo man, me obed ame kitewa atir, kun olworo Obaŋa,

¹³kun okuro winyo ame genwa ocuŋ iye, en me neno Yecu Kricito, Obaŋawa adit kede Alarwa, ka odwogo kede kwogo.

¹⁴En rik omiye kene pirwa me lakorowa oko i bal luŋ, kede me lonyowa obed jo mere ikome, ame tye kede mit me tiyo tic abeco.

¹⁵Kobbigi kop magi; cuk cunygi dok ijukgi kede twerri luŋ. Kur imi dano moro bwoni.