Read lango Tito 3 Bible Online

Tito 3 - lango bible

Tito 3

¹Poyo wigi luŋ me miye i te loc a rwode kede wegi twer, me bedo i winy, kede me yikere pi tiyo ticcoro aber luŋ.

²Gin owek kobo kopporo arac i kom ŋattoro, owek da, obed jo okica, onyut woro baŋ jo ducu i kare luŋ.

³Pien wan ikomwa rik koŋ obedo omino, oŋudi, yam orwenyo ata, obedo opii a mitwa kede jami apapat ame yomoro cunywa. Otyeko karewa i raccuny kede nyeko, jo odagowa, dok wan daŋ odagere kenwa kenwa.

⁴Cite i kare ame ber kede mar me kica, Obaŋa Alarwa onen,

⁵en te larowa oko, mom pi ticcoro a wan otio i kite atir, cite pi kica mere gire. Olarowa kede pii me nywalle me aryo kede me doko jo anyen pi Cuny Acil,

⁶a rik en oonyo i komwa abup i Alarwa Yecu Kricito,

⁷me ote kwanowa ni kitewa atir pi kica mere, me onwoŋ kwo a perakino odoco, ame genwa tye iye.

⁸Kop man kop me ateni. Amito icuŋ atek i kom kop magi, me jo a doŋ oye Obaŋa obed i tam me miye me tiyo ticcogo abeco; mannono ber, dok bedo me kony baŋ jo luŋ.

⁹Kwer oko pyemmogo me minomino, kop i kom nyiŋ kwaro, daa kede laro kop i kom cik; magu ducu pe konyo, yore mom.

¹⁰Dano ame kela apoka poka ka doŋ ikwenyoro icel kede dok tyen me aryo, weke oko, mom dok inotte wunu kede,

¹¹kun iŋeo ni, kodi danonono doŋ ogak oko, dok obalo, en doŋ oŋolo kop i kome kene.

¹²Ka abino oro Artema onyo Tukiko baŋi, diye atek me bino baŋa i Nikopoli, pien atyeko moko tamma me bedo kuno i kare me koyo.

¹³Ket teko me konyo Jena aŋe cik, kede Apolo i wotgi; nen ni ginnoro kur rem i baŋgi.

¹⁴Jowa myero pwony miye i tic abeco, me gin obed i yo me konyo jo ame cannoro odio; kur gin obed acalo yen a mom nyak.

¹⁵Jo luŋ a tye baŋa kan omoti. Mot jo a marowa i iyee. Winyo Obaŋa bed kedwu wun luŋ.