Read lango Pilemon 1 Bible Online

Pilemon 1 - lango bible

Pilemon 1

¹Waraga man oya i baŋ Paulo, ame abuc a Kricito Yecu, kede baŋ ominwa Temoteo. Baŋ Pilemon atic wadwa ame amaro,

²gin kede aminwa Apia, kede Arakipo acirikale wadwa, kede jo oye Kricito a cokere i odi:

³Obaŋa Papawa kede Rwotwa Yecu Kricito omiwu winyo kede kuc.

⁴Apwoo Obaŋana didik ka atuco nyiŋi i kwacca,

⁵pien abedo winyo pi mar meri kede iyeeni ame ibedo kede i kom Rwotwa Yecu kede jo Obaŋa luŋ.

⁶Man omio akwao ni, kite notte ame onotte kedi i kom iyee odok atek a romo niaŋowa atut i kom gin aber luŋ a wan otye kede i Kricito.

⁷Pien mar meri okella lelo adwoŋ dok okweo yia, omina, pien idwoggo cuny jo Obaŋa.

⁸Pi mannono, kadi bed atye i tekcuny i Kricito ame romo miyo aciki acika itiyo ginnoro a mitte,

⁹cite pi mar meri-ni aneno ni ber akwai akwaa, an Paulo ame acuŋ akaka Kricito Yecu, ame aman daŋ adoko abuc pire.

¹⁰Akwai pi atinna Onesimo, ame adoko pappere kan i buc.

¹¹I kare okato konnyere koŋ obedo mom baŋi, cite aman konnyere doŋ dwoŋ baŋi kede baŋa.

¹²En enno doŋ adwoggo en baŋi-nu, ame en doŋ odoko acalo dul koma ikokome.

¹³Onwoŋo amito ni kono agwoke baŋa kan, me mia kony akakari a kun pwod atye i buc pi rabo amut aber;

¹⁴cite mom amito timo ginnoro aboŋo winyo gin a yin iparo, me ka itimma ber, mom obed pi ruyi arua, ento pi yerri yin ikomi.

¹⁵Gwok onyo man en gin omio rik en opokere kedi pi kare anok, me wek ite game doŋ atwal,

¹⁶mom dok acalo opii, cite akato opii oko, acalo ominwa ame omaro. Pollere wok en pire tekka, cite i tuŋ baŋi pire doŋ tekki meicel, acalo akonnyi kede ominni i Rwotwa.

¹⁷Doŋ ba, ka iŋeo ni an abedo awotti, game i kite a kono igama kede.

¹⁸Ka ce rik otimmi rac, onyo tye i banyani moro, kwan magi-nono i wia.

¹⁹An Paulo acoo man i ciŋa an ikoma, abino culli oko. Kun mom dok akobo ni, yin daŋ giri itye i banyana, en kwoni ikome.

²⁰Ee ta, ominna, amito konnyoro i baŋi i Rwotwa. Dwoggo cunya i Kricito.

²¹Atye i gen atek i komi ni ibino woro doga, omio atye acoyi kop man kun aŋeo ni ibino timo akato ame an akobo.

²²Karacel i mano, yikka icika moro me welo, pien atye i gen ni kwacwu bino miyo omia baŋwu.

²³Epapira abuc wadwa i Kricito Yecu omoti,

²⁴anaka Marako, Aricitako, Dema kede Luka otic wadwa.

²⁵Winyo a Rwotwa Yecu Kricito bed kede cunywu.