Read lango Jo Eburania 10 Bible Online

Jo Eburania 10 - lango bible

Jo Eburania 10

¹Cik gire tye iye tipo keken me jami abeco me kare me i nyim, mom calgi ikokome. Pire daŋ jo bedo kela mot aŋola a kitegi acel nakanaka, mwaka i mwaka. En pe tye i twerroro atwal me loko jo a bino baŋ Obaŋa doko aber odoco.

²Kono tye amanno, kono miyo mot aŋola mom doŋ ogik oko? Kono jo a rik oworo Obaŋa balgi olwokere oko meicel, kono mom dok omedde ŋeyo i cunygi ni gin obalo.

³Ento mot aŋola magi bedo poyo wi jo i balgi mwaka i mwaka,

⁴pien remo twoni kede dyegi gire pe twero kwanyo bal.

⁵Pi kop man, i kare ame Kricito bino i lobo, en okobo ni, “Yin giri rik mom imito gin oŋolo kede mot ame omio, ento iketo koma-ni,

⁶Yii mom obedo yom i gin oŋolo owaŋo alutu, kadi i gin ame oŋolo pi bal.

⁷Ate kobo ni, ‘An ene, doŋ abino, me cobo mitti, yin Obaŋa’, acalo yam ocoo i koma i buk adola.”

⁸Me agege en okobo ni, “Yin mom imito gin oŋolo, kadi mot ame omio onyo gin oŋolo owaŋo alutu, onyo gin ame oŋolo pi bal, yii daŋ mom yom iye,” ame gin jami ame omio pi cik.

⁹Eka te kobo ni, “An ene, doŋ abino me cobo mitti.” Oweo me agege oko me wek ekel me aryo mere.

¹⁰Doŋ pi mitterenono, wan doŋ olonyowa doko acil pi Yecu Kricito imiyo kome aka mot tyen acel ame oromo meicel.

¹¹Alamdog acel acel cuŋ i dog ticcere kun mio kit mot aŋola acel-Iu kare i kare a mom tye i twerroro atwal me kwanyo bal.

¹²Ento Kricito rik omio gin acel gire ame oŋolo pi bal, pi kare luŋ, eka te bedo piny i kabedo me kwogo i laŋet Obaŋa tuŋ cem.

¹³Ya i kare ca en tye a kuro ituno ka obino miyo okworrerre doko aten tyene,

¹⁴pien mot aŋola mere acellono omio jo ame en olonyogi bedo acil odoko jo ocwiny atwal.

¹⁵Cuny Acil daŋ omio cadennere baŋwa, pien ka doŋ okobo ni.

¹⁶“Man en cikere ame abino keto wan i doggola Icrael ka kare-nono okato, man kop a Rwot: Abino keto cikka i cunygi, kede coyogi i tamgi”,

¹⁷te medo kobo ni, “Mom dok abino poyo balgi kede timgi areco.”

¹⁸Kan a weko bal nwoŋere iye, mot aŋola me lamo bal mom dok mitte iye.

¹⁹Omegona, otye wunu doŋ i yo me donyo i kabedo acil kede tekcuny pi remo a Yecu.

²⁰En oyabbiwa yo anyen, yo akwo me donyo i ŋe boŋo icika, yo-nono en kome.

²¹Kite acalo otye doŋ kede twon alamdog adwoŋ ame loo ot Obaŋa,

²²ber doŋ onok wunu Obaŋa ceggi kede cuny me ateni, kun iyee odonyo atut i cunywa, a doŋ yiwa ler pien okwanyo oko i tamwa ŋec me gin areco a yam otimo, dok daŋ ame komwa doŋ olwoko oko i pii acil.

²³Olid wunu atek gen a wan otuco, aboŋo tagere, pien ŋat ocikowa genne.

²⁴Daŋ opar wunu kite a myero otugere wunu kenwa kenwa i mar kede tic abeco,

²⁵kun mom oweko wunu cokere karacel, kite acalo jo mogo oloko odoko kitegi, ento myero ocukoro wunu cunywa kenwa kenwa, akato mere kite acalo ineno wunu Nino-naca doŋ tye a noko ceggi.

²⁶Pien ka wan obalo me akaka a doŋ nwoŋo otyeko limo ŋec i kom kop me ateni, lee moro mom dok odoŋ ame aŋollo pi bal wa.

²⁷Odoŋ kuro ŋolo kop keken kun otye wunu i lworo adwoŋ, kede mac ager ame bino tyeko jo a pyem Obaŋa.

²⁸Ŋat ame obolo cik a Muca oko oneko aneka aboŋo kica moro, ka ce kop oloo i waŋ ocaden aryo onyo adek.

²⁹Kara ŋat ame ocao Wot Obaŋa, dok ame opyedo remo me cikere Obaŋa ame olonye kede bedo acil, dok ame oŋalo Cuny me kica Obaŋa, can arac a rom mene ame itamo wunu ni myero ket i kome?

³⁰Pien wan oŋeo ŋat ame okobo ni, “An ame abino culo kwor, an abino lunyo icen,” dok ni, “Rwot bino ŋolli jo mere kop.”

³¹Me lworo meicel, ipoto i ciŋ Obaŋa akwo.

³²Kakare, koŋ ipoyo wunu kare okato, kite a rik ikanyakino wunu, kun ilwenyo wunu kede lwak can apol, i kare a doŋ acara Obaŋa otyeko menyowu.

³³Kare ocele rik oyetowu dok owunowu i nyim lwak, kare ocele inotte wunu kede jo ame otimogi amannono.

³⁴Pien kica rik omakowu i kom obuc, dok daŋ yiwu obedo yom ata kadi oyako jamiwu, pien wun giwu onwoŋo iŋeo wunu ni itye wunu kede jami ocele abeco akato magu, dok ame bino perakino.

³⁵Doŋ ba, kur iwuc wunu tekcunywu oko, pien bino kelo mot abup me pwoc.

³⁶Kanyakino en gin a mitte meicel i tuŋ baŋwu, me iti wunu gin ame Obaŋa mito, ite nwoŋo wunu gin a rik en ociko pire,

³⁷acalo rik ocoo ni, “Odoŋ kare atitidi moro, eka ŋat a bino ca te bino aboŋo gal.

³⁸Danona a kite atir bino bedo kwo pi iyee; cite ka odok cen, yia mom bino bedo yom i kome.”

³⁹Ento wan giwa mom otye i akina jo a dok cen, eka te rwenyo oko odoco; wan otye i akina jo ame tye kede iyee, eka te gwoko kwogi.