Read lango Jo Eburania 11 Bible Online

Jo Eburania 11 - lango bible

Jo Eburania 11

¹Iyee en ame moko gin ame ogeno, en gin a niaŋowa aber ni, jami a mom oneno komgi kara tye gigi.

²Pire omio jo acon, Obaŋa opwoogi.

³Pi iyee wan oniaŋ ni, Obaŋa rik oketo wi podo luŋ kede koppere, ame omio gin ame nen otio i gin a mom nen.

⁴Pi iyee Abel omio mot aŋola me yalo Obaŋa aber akato mea Kain oko, ame omio opwoe ni kite atir, kun Obaŋa obedo cadennere i gamo mottere. En oto, ento pi iyee mere en pwod tye akop.

⁵Pi iyee Enoka rik otero malo me kur bil to. Mom obin onwoŋe, pien Obaŋa otere oko. I kare a mom ru otere, omio caden i kome, ni oyomoro yi Obaŋa.

⁶Aboŋo iyee mom otwero yomoro yie, pien ŋattoro ame mito noko ceggi Obaŋa myero ye ni en tye, dok ni en mio mot baŋ jo a yenye.

⁷Pi iyee Nua daŋ, ka Obaŋa okwenyoro en pi gin a mom ru onen, owinyo doge, eka te payo yee pi laro jo me ode. Iyee mere-ni omio kop oloo lobo eka te nwoŋo kite atir ame bino pi iyee.

⁸Pi iyee Iburaim owinyo dog Obaŋa ka olwoŋe me wot i lobo i oko ame onwoŋo rik obino miye me bed mere. Oya oko i lobo mere kun pe ŋeo kan ame ewoto iye.

⁹Pi iyee en obedo acalo welo i lobo a rik Obaŋa ociko pire, kun bedo i kema gin Icaka kede Yakobo, ame gin daŋ omiogi cikere acellono.

¹⁰Pien en onwoŋo akuro boma ca ame acakki te gedo mere tye atek, en ame Obaŋa obedo ago-callere kede agedo mere.

¹¹Pi iyee anaka Cara onwoŋo teko me yac, kadi bed kare me nywallere doŋ okato. Man otimere pien otamo ni, ŋat ociko-nono genne.

¹²Man omio I kom ico acel a rik rom aroma i ŋat oto, oya iye lwak ikwae apol ata acalo acer me polo, kede acalo kwoyo me dog nam ame kwano loo jo.

¹³Jo-nu duco oto i kom iye, kun mom ru omiogi gin a nwaŋ ociko pire, ento kun oneno anena i kannabor, omoto i kuno, dok daŋ kun otuco ni gin obedo acalo orok onyo wele i wi lobo.

¹⁴Pien jo ame kobo kit enno nyuto kannaler ni otye oyenyo lobo me turgi.

¹⁵Kono rik gin obedo tamo pi lobo a rik gin oya iye ca, kono gin onwoŋo yo me dok cen iye.

¹⁶Ento gin gigi oparo loba aber akato maca oko, en pacogi ame i polo. En omio lewic gire mom mako Obaŋa ka ce olwoŋe ni Obaŋagi, pien en otyeko yikkigi boma.

¹⁷Pi iyee Iburaim, ka rik oteme, mio Icaka acalo mot aŋola me yalo Obaŋa; ŋat ame Obaŋa ocikere baŋe oyikere me miyo wode acel iloŋ acalo gin ame oŋolo me yalo Obaŋa,

¹⁸ame pire rik okobo ni, “Itino Icaka en ame obino cwano ni ikwaeni.”

¹⁹En onwoŋo otamo ni, Obaŋa tye kede twer me cero jo iyi akina jo oto; daŋ otwero kobo ni, Icaka odwogo i ciŋ Iburaim acalo oya i akina jo oto.

²⁰Pi iyee Icaka olamo winyo i kom Yakobo gin kede Ecau pi kare me i nyim.

²¹Pi iyee Yakobo daŋ, ka doŋ mito to, olamo winyo i kom itino a Yucepu acel acel, kun okulo wie i wi abiro me komo mere, me woro Obaŋa.

²²Pi iyee Yucepu, iyi agikki me kwo mere, okobo pi yaa a jo Icrael i Miciri, eka pi kite me yiko cogo kome.

²³Pi iyee, ka rik onywalo Muca, onywallere okane pi dwete adek kun mom olworo cik abaka, pien gin oneno ni atin ca ber atek.

²⁴Pi iyee Muca, ka doŋ odoŋo, mom oye ni lwoŋe ni wot a nyaka a Parao,

²⁵kun oyero neno can karacel i jo Obaŋa akaka bedo i yomcuny me bal ame ri pi kare anokkoro keken.

²⁶Otamo ni ayet ame okanyo pi Kricito obedo lonyo adwoŋ kato lonyo luŋ i Miciri, pien onwoŋo ociko waŋe i kom mot ame i nyim.

²⁷Pi iyee Muca oya oko i Miciri kun mom lworo akemo abaka; okanyo atek, acalo bala eneno Obaŋa a mom nen.

²⁸Pi iyee daŋ en okwero ecuban me Kato, dok okiro remo, me wek anek otino kao kur gudgi.

²⁹Pi iyee jo Icrael oŋolo Nam Arema acalo wi tela otwo; cite jo Miciri omwony oko ka gin daŋ otemo timo amanno.

³⁰Pi iyee omio apama cel me Jeriko orutte piny a doŋ jo Icrael omano pi nino abiro.

³¹Pi iyee Rakab ame alaya mom obin oto karacel i jo a mom obedo owiny, pien onwoŋo rik ojolo orotpiny kede kuc.

³²Kara dok amedde kobo ŋo? Pien kare mom bino romma me tittiwu pi Gideon, Barak, Samcon, Jeputa, Daudi, Camwiri kede odwarpiny-gu,

³³ame gin daŋ pi iyee rik olwenyo kede obakki me lobo apapat, oloogi, otio gin a tye atir, onwoŋo gin a yam Obaŋa ociko pire. Gin otweo dog eŋatogu,

³⁴oneko mac ager oko, obwot i lak pala bat. Gorogi odoko tekkom, gin odoko jo atek i lweny, oryemo mony orok oko.

³⁵Mom onwoŋo jogi a rik oto a doŋ ocer oko. Jo ocele owunogi arac, ote to kun okwero oko ni kur gonygi, me gin ocer i kwo aber akato.

³⁶Jo ocele oŋalogi, opwodogi, otweogi i jagere oketogi i buc.

³⁷Onapogi kede gweŋe, oŋuno yigi aryo kede ocumeno, onekogi i pala lweny. Gin oloŋo piny kun oruko ka pyene rommi, kede me dyegi, kun can ocirogi oko, jo owunogi dok otimogi cucu.

³⁸Kodi jo-nono lobo pe romo bedo kedgi. Gin obedo wowota i tim, kede i wi kiddi, kun obedo i gorogoro kede i bure piny.

³⁹Jo-ni ducu oŋeye aber pi iyeegi, ento gin mom obin onwoŋo gin a rik Obaŋa ociko pire,

⁴⁰pien onwoŋo en oyiko ginnoro aber akato kun otamo pirwa, ni mano, gin pe myero odok jo ocwiny aboŋo wan.