Read lango Jo Eburania 12 Bible Online

Jo Eburania 12 - lango bible

Jo Eburania 12

¹Doŋ acalo wan otye kede lwak ocaden ecipan ame ogurowa dyere, myero doŋ doŋ obol gigi mogo apek oko ducu, kede bal ame maro lidowa atek, me odyeb wunu ŋwec pyem a tye i nyimwa, kun okanyakino wunu.

²Onen wunu Yecu ame obedo atel wiwa i kom iyee kede ŋat ame ocobo kakare. Pi yomcuny ame oketo i nyime en rik okanyo yataria, kun ocao lewiccere; aman doŋ tye obedo piny i kabedo me kwogo i laŋet kom me loc Obaŋa tuŋ cem.

³Tam wunu i kome, kede kite a en okanyokino i adage arac meicel i baŋ obalo, me kur iol wunu, kur cunywu opoti.

⁴I romowu kede bal, mom ru ilwenyo wunu ituno i onyo remowu.

⁵Onyo wiwu owil oko ce i coc a rik ocoo me cukoro cuny jo, ame kobo kedwu iye acalo itino mere? Ni mano, “Woda, kur ica pwony a Rwot; ka en ogoi, kur cunyi opoti.

⁶Pien Rwot pwonyo jo a en maro, pwodo atin acel acel ame egamo.”

⁷Myero ikanyakino wunu, me pwonywu. Obaŋa tye a tic kedwu acalo itino mere; atinnene ame pappere pe pwonyo?

⁸Ka ce owekowu aboŋo pwonyowu acalo itino ocele luŋ, nyuto ni wun doŋ itino luk, mom itino mere ikome.

⁹Aco wan obedo kede pappiwa me lobo man ame rik opwonyowa, wan daŋ oworogi. Mom doŋ myero omiye wunu akato i te loc a Papa wa me cuny me obed kwo?

¹⁰Pien gin rik opwonyowa pi kare anokkoro keken i kite ame gin oneno ni ber, ento Obaŋa pwonyowa pi konyowa, me wan odok jo acil acalo en.

¹¹Kite pwonyere luŋ, ka pwod otye iye, pe otamo ni me yomcuny ento me kumo, cite icennere adwoggi mere kuc keken baŋ jo ololle atira.

¹²Pi mano, tiŋ wunu badwu ame okwe-nu, rye wunu coŋwu agoro,

¹³mi wunu yo a tyenwu lubo cuŋ atir, me ŋattoro a tyene owil kur dok ŋwal, ento can gire oko.

¹⁴Ket wunu teko me bedo i kuc i jo luŋ, kede bedo jo acil; aboŋo en-nu, mom tye ŋattoro a bino neno Rwot.

¹⁵Nen wunu ni ŋattoro kur onyobere i gamo kica Obaŋa. Nen wununi, ŋattoro mom obedo acalo lwit yat akec ame ka otu kela ayela, dok balo jo apol.

¹⁶Nen wunu ni ŋattoro kur bed atim tim me coco, onyo ŋat a mom lworo Obaŋa bala Ecau, ame rik ocato dittere oko me bedo atin kao kom ka i cam me tyen acel keken.

¹⁷Pien iŋeo wunu ni, icennere, ka en omito ni pappere lamme winyo, rik ote kwere oko, kadi bed omito kede pig waŋe, pien pe obin onwoŋo yo me ŋut i gin a nwaŋ etimo.

¹⁸Pien wun giwu mom ibino wunu i gin ame otwero gudo kome, i mac a rik olyel i wi kidi me Cinai, kede colpiny ame ocido oko icuc, kede yamo ajuru,

¹⁹kede koko apel kede dwon ŋat a kop. Jo owinyo rik obako doggi ni kur dok omed kobbigi kopporo,

²⁰pien gin mom otwero kanyo cik ame omio, ni mano, “Anaka leyi-gu, ka ogudo kidi, myero nap i gweŋ, neko oko,”

²¹Gin onen kaci-naca obedo arac meicel, naka omio Muca owoto dwone ni, “Lworo omaka meicel, omyelo koma.”

²²Cite wun ibino wunu i kidi me Cion, kede i boma Obaŋa akwo, Jerucalem me polo, kede baŋ lwak omalaika ecipan ame ocokere pi woro Obaŋa,

²³kede i cokere itino kao ame ocoo nyingi i polo, kede baŋ Obaŋa, ame en aŋolkop a jo luŋ, kede baŋ tipo jo a kitegi atira, ame doŋ omio doko jo ocwiny odoco,

²⁴kede baŋ Yecu, ayik cikere anyen, kede baŋ remo ame okiro, ame tito pi gin aber a kato en ame remo Abel otito pire.

²⁵Gwokere wunu kur ikweru winyo ŋat a tye akop. Jo ame rik okwero winyo ŋat ame okwenyorogi i wi lobo rik mom obin obwot. Wan kono obino bwot wunu niŋo, ka okwero winyo wunu ŋat ame akwenyorowa i wi polo twal?

²⁶I kare-naca, dwone rik obin oyeŋo lobo; ento aman en ociko ni, “Odoŋ icel, mom abino yeŋo ka lobo keken, cite anaka polo daŋ.”

²⁷Kop man ni, “Odoŋ icel,” nyuto ni, obino kwanyo gin a yeŋere oko, mano ginaketa, eka gin a mom yeŋere te doŋ.

²⁸Pi mano, myero wan opwo wunu Obaŋa, pien wan onwoŋo loc a mom twero yeŋere, daŋ myero owor wunu Obaŋa i yore a twero yomoro cunye, kun daŋ omie wunu kwogo kede lworo,

²⁹pien Obaŋawa en mac ame wano piny.