Read lango Jo Eburania 2 Bible Online

Jo Eburania 2 - lango bible

Jo Eburania 2

¹En omio wan myero oketu cunywa meicel i gin a rik owinyo wunu, me kur dok ogak oko iye.

²Kwena a rik omalaika okelo yam omoko atek. Ka ŋattoro okalo wi cikkoro onyo okwero winyo, omie can iye ame oporo bal ame obalo.

³Kara wan dok obino bwot iŋo ka mom oketo cunywa i larre man a pire dwoŋ wok-ki? Larre man Rwot en ame okwoŋo tuco pire, eka jo a rik owinyo i baŋe ote moko baŋwa.

⁴Obaŋa daŋ omedo cadennere baŋgi kun tio anyuttogo kede taŋo kede tic atek adoŋo apapat, dok kun poko mottogo me Cuny Acil pi mittere kene.

⁵Pien Obaŋa mom oketo lobo a mito bino a wan okobo pire-ni i te loc omalaika.

⁶Tye kannoro ame otuco kannaler ni, “Dano gin aŋo, omio ipo pire? Onyo atin a dano, omio iparo pire?

⁷Ikete piny i te omalaika pi kare anonok, imie kwogo kede woro acalo abaka,

⁸iketo jami luŋ piny i te loccere, i te tyene.” Doŋ ka oketo jami luŋ i te loccere, mom doŋ oweko ginnoro a en mom loo.

⁹Ento wan oneno Yecu ame rik okete piny i te omalaika pi kare anonok, ento aman doŋ amie kwogo kede woro acalo abaka pi rem me to ame okanyo, me wek pi kica Obaŋa en bil to pi jo luŋ aluŋa.

¹⁰Jami luŋ tye pi Obaŋa, dok en ame oketogi. Doŋ ka rik en omito kelo itino apol i kwogo mere, gin a en otimo obedo amyero meicel, me miyo atel wigi me larre odoko ŋat ocwiny pi kanyo can.

¹¹Ŋat ame olonyogi bedo acil, kede jo ame olonyogi-ni, gin luŋ oya i kom ŋat acel; man en gin omio lewic mom mako Yecu me lwonogi ni omego mere,

¹²kun okobo ni, “Abino rabo nyiŋi baŋ omegona, abino paki kede wer i dye lwak ocokere.”

¹³Dok ni, “Abino keto genna i kome.” Kede dok ni, “An ene kede itino ame Obaŋa doŋ omia.”

¹⁴Kite acalo itino dikdik onotte i kom kede remo, en daŋ amannono onywako komgi kede remogi, me wek pi to mere enyot oko ŋat ame tye kede twer i kom to, mano en Catan,

¹⁵egony jo a yam obedo i twec me opii pi kare me kwogi luŋ pi lworo to.

¹⁶Doŋ onen aber ni, gin a en otimo mom otiko omalaika, ento otiko ikwae Iburaim.

¹⁷Mano en omio en myero odok ame erom aroma kede omego mere i yore luŋ, me ebed alamdog adwoŋ ame akica dok agen i tic Obaŋa, me ekwany bal a jo mere oko.

¹⁸Pien en kene rik okanyo can dok obite, en omio en twero konyo jo ame obitogi.