Read lango Jo Eburania 4 Bible Online

Jo Eburania 4 - lango bible

Jo Eburania 4

¹Doŋ ba, cikere me donyo i weo Obaŋa pwod tye, ento myero obed wunu alwor, me ŋattoro i akinawu kur nwoŋere ni opoto oko me tuno iye.

²Wan doŋ owinyo amut aber bala rik gin daŋ; ento kwena a gin owinyo mom okonyogi, pien gin ka owinyo mom orubo kede iyee.

³Wan jo ame oye wan en ame obino donyo i weonono a rik en okobo pire ni, “Acalo rik akwono i akemona, ‘Gin mom bino donyo i weo baŋa,’ ” kadi bed ticcere nwaŋ otum oko geye i acakki piny.

⁴Pien tye kannono kan a rik okobo i kom nino me abiro ni mano, “Obaŋa te weo i nino me abiro i kom ticcere luŋ ame en otio.”

⁵Eka daŋ kan en dok okobo ni, “Gin mom bino donyo i weo baŋa.”

⁶Amanno yo pwod tye twolo me jo mogo dony iye. Jo a rik ogeo rabbigi amut aber mom odonyo, pien gin okwero bedo i winy.

⁷En dok te keto nino ocele ame olwoŋo ni, “Tin,” kun okobo icennere i dog Daudi a doŋ okato runi apol ata, i kop anene wan okobo pire, ni, “Ka iwinyo wunu dwone tin, kur imi cunywu bed anwaŋ.”

⁸Pien ka kono Yocwa rik omiogi weo, kono Obaŋa mom dok okobo icennere pi nino ocele.

⁹Pi mano, weo me cabit pwod tye pi jo Obaŋa;

¹⁰pien ŋat odonyo i weo baŋ Obaŋa nwoŋo doŋ owe oko i ticcere, bala Obaŋa a rik owe oko i mege.

¹¹Doŋ pi man, myero ololle wunu me donyo i weo-nono, me wek ŋattoro kur dok pot oko pi kwero bedo i winy bala gin.

¹²Pien kop Obaŋa en gin akwo, dok tio atek, bit daŋ kato pala bat ame bit ryoryo. En tuco yiwa kero, pello i kan ame tipo kede cuny orwatte iye, onyo kan ame wan nyoo orwatte kede moo miyi cogo, kun poko par kede tam abeco kede areco mere a tye i yi dano.

¹³Mom tye ginnoro ame Obaŋa mom neno; jami luŋ a en oketo oradde oko kannaler i waŋe, en ŋat ame bino ŋiyo kopwa.

¹⁴Doŋ wan otye kede alamdog adwoŋ meicel ame doŋ odonyo i polo, en Yecu, Wot Obaŋa; pi mano myero omok wunu atek i iyee ame wan otuco.

¹⁵Pien alamdog adwoŋ a wan otye kede mom bedo ŋat a mom winyo rem karacel kedwa pi gorowa, pien en daŋ Catan rik obite i yore luŋ bala wan, ento en naka mom otimo balloro.

¹⁶Eyo, wan doŋ myero onoku cok i nyim kom me loc Obaŋa kede tekcuny, kan ame winyo tye iye, me timwa kica, onwoŋ daŋ winyo ame konyowa i-kare a mitte.