Read lango Jo Eburania 5 Bible Online

Jo Eburania 5 - lango bible

Jo Eburania 5

¹Pien alamdog adwoŋ acel acel oyero i akina a lwak, ote kete me tiyo tic i nyim Obaŋa akakargi, kun mio mot kede gin ame oŋolo pi bal.

²En twero tic i jo kede mwolo i baŋ jo a kwia piny kede jo ogak, pien en ikome daŋ nwoŋo goro ocire oko.

³Pi mano en myero mi mot me aŋola pi ballere en ikome, karacel kede pi bal a lwak.

⁴Dok daŋ mom tye ŋattoro a yerre kene pi dit man, Obaŋa en ame lwoŋe iye, acalo rik olwoŋo Aron.

⁵Amannono daŋ, Kricito rik mom otero kwogo man me bedo alamdog adwoŋ pire kene, ento Obaŋa omie, kun kobo ni, “Yin i Woda, tin doŋ anywali”;

⁶acalo okobo daŋ kan ocele ni, “Yin ibedo alamdog nakanaka, i kite a Melkijadek.”

⁷I kare me kwo mere i lobo man, Yecu rik okelo kwaccere baŋ Obaŋa, en ŋat ame rik twero lare i to, kun bako doge ame olakino i koko kede pig waŋe, Obaŋa daŋ te winye pi mwolo mere baŋe.

⁸Kadi bed en Wot Obaŋa, rik en opwonyere i bedo kede winy pi can a en obeo iye.

⁹Ka doŋ ocwiny, odoko ŋat a kelo larre a mom gik baŋ jo luŋ a winyo doge.

¹⁰Obaŋa te tuce me bedo alamdog adwoŋ i kite a Melkijadek.

¹¹Wan otye kede kop apol a myero okob i kop man, cite tek meicel me niaŋowu, pien niaŋwu doŋ odoko legelege.

¹²Aman doŋ onwoŋo iromo bedo wunu opwony, cite ŋattoro myero doŋ dok nwo pwonyowu i kop me agege me kop Obaŋa. Cak en a doŋ porre pirwu, mom cem atek.

¹³Pien ŋat ame doto cak mom tye i ŋeccoro a dok i kom kite atir, pien nwoŋo pwod atin.

¹⁴Aco cem atek tye pi jo oteggo, ame ryekogi me poko gin aber kede gin arac doŋ ocwiny pi bedo keto i tic.