Read lango Jo Eburania 6 Bible Online

Jo Eburania 6 - lango bible

Jo Eburania 6

¹Pi mano, koŋ oweku kop me agege i kom Kricito, ote medde wunu anyim i pwony a jo oteggo, kun mom dok obedo nwoyo cibo acakki tere, ame en ŋut i kom tic ducu a rik kwo mom iye, kede moko iyeewa i kom Obaŋa,

²kede dok pwonyere i kom kop magi: kite batija apapat, keto ciŋ i wi jo, cer a jo oto, kede kop ame oŋolo atwal.

³Wan obino medde anyim giwa, ka Obaŋa oye.

⁴Jo ame doŋ otyeko tuno i lero tyen acel, ame obilo mot ame oya i polo, kun obedo i akina jo olimo Cuny Acil,

⁵ame daŋ otyeko bilo kop Obaŋa kit a mit kede, dok ogiporo tic atek adoŋo me kare ame bibino, ka jo-nono doŋ ogak oko, mom dok otwero rocogi dok anyen me gin oŋut.

⁶Ka gin doŋ ogak oko, gin tye aguro Wot Obaŋa i kom yataria pirgi kengi, kun okelo lewic i kome i nyim lwak.

⁷Pien Obaŋa mio winyo i kom lobo ame mato kot ame cwe i kome kare i kare, eka te ceko ginapita ame konyo jo ame opuro pirgi.

⁸Ento ka ce onyao okuto kede ocokocok, konnyere nwoŋo mom, kuro ka ceŋ Obaŋa, agikkere en mac ame obino wano kede oko.

⁹Ento wun ba, owotena, kadi bed wan okobo aman, ogeno ni itye wunu aber a kato jo-nono i kom kop a dok i Iarre.

¹⁰Pien Obaŋa gire pe wany; wie mom bino wil i tic a rik itio wunu, akadi mar ame inyuto wunu pire i konyo jo Obaŋa, ame pwod itye wunu ka konyogi daŋ.

¹¹Gin a wan omito atek i tuŋ baŋwu en ene ni, ŋat acel acel i akinawu bino keto cunye naka i agikki, me wek gin ame iketo genwu iye cobere kakare.

¹²Kur idok wunu owackom, ento potto wunu jo ame pi iyeegi kede diyo cunygi otye ka nwoŋo gin a rik Obaŋa ociko pire.

¹³I kare ame Obaŋa cikere baŋ Iburaim, kite acalo mom dok tye ŋattoro a kate i dit a myero en kwoŋ i nyiŋe, en okwoŋo i nyiŋe kene,

¹⁴kun kobo ni, “Abino miyi winyo dok abino nyayo ikwai bedo apol.”

¹⁵Pi Iburaim idiyo cunye, omio en onwoŋo gin a rik Obaŋa ociko pire.

¹⁶Ka dano moro kwoŋo kwoŋ, en kwoŋo i nyiŋ ŋat adwoŋ a loc, dok ka pyemmoro tye i akina jo, kop ame omoko kede kwoŋ en a tyeko.

¹⁷En gin omio Obaŋa omoko cikere mere kede kwoŋ, pien nwoŋo omito nyuto aber meicel baŋ jo a myero nwoŋ gin ame eciko pire ni, gin ame eyiko mom dok ebino loko.

¹⁸Tye doŋ jami aryo a mom dok lokere, ame Obaŋa mom twero bwolo jo iye. Doŋ pi man, wan jo ame oriŋo olaro baŋe otye i gin ame cukoro cunywa atek me lido gen ame oketo i nyimwa.

¹⁹Wan otye i gen man acalo ajuk mel, ame mio cunywa cuŋ atek a mom owirre. Gennono donyo anaka i kabedo acil i ot Obaŋa, i ŋe boŋo acika,

²⁰kan ame Yecu otelo nyim odonyo iye pirwa, kun doŋ odoko alamdog me nakanaka i kite a Melkijadek.