Read lango Jo Eburania 8 Bible Online

Jo Eburania 8 - lango bible

Jo Eburania 8

¹Gin a pire dit i kop ame okobo kan en ene: wan otye kede alamdog adwoŋ acalo man, ame doŋ obedo piny i kabedo me kwogo i laŋet kom a Won Kwogo Adwoŋ i polo.

²En tio ticcere i kabedo acil, i kema me ateni ame Rwot en oguro, mom dano.

³Alamdog acel acel oketo me miyo mot kede gin ame oŋolo me yalo Obaŋa; pi mano Yecu daŋ myero bed i ginnoro ame emio.

⁴Kono en tye i lobo kan, kono mom obedo alamdog kadi acel, pien olamdog tye ame omio mot pi cik a Muca.

⁵Cite kan ame gin tio iye en apor kede tipo keken me kabedo acil a tye i polo; pien ka Muca rik ceggi i guro kema, Obaŋa okwenyoro en ni, “Nen ni itio jami luŋ i kite cal ame onyutti i wi kidi.”

⁶Cite acalo tye-ni, Yecu doŋ onwoŋo tic amalo meicel a kato megi oko, a rom aroma i kite ame cikere ame en oyiko obedo aber atek a kato en ocele ca, pien Obaŋa omoko kun ociko pi miyo jami abeco akato.

⁷Kono rik balloro obedo mom i cikere me agege, kono moro me aryo mere mom dok mitte.

⁸Ento Obaŋa onwoŋo bal i komgi, pien okobo ni, “Kare bino romo, man kop a Rwot, ame abino moko cikerena anyen kede doggola Icrael kede doggola a Juda.

⁹Mom dok abedo bala cikere a rik aketo i kwarigi ca, i nino a rik amakogi i ciŋgi, ate kwanyogi oko i lobo me Miciri; pien gin rik mom olubo cikerena, omio an daŋ mom awekogi ata, man kop a Rwot.

¹⁰Man en cikere ame abino keto wan i doggola Icrael ka kare-nono okato, Rwot okobo: Abino keto cikka luŋ i cunygi, ate coyo i yigi. An abino bedo Obaŋagi gin ote bedo jona,

¹¹Ŋattoro a pwonyo wadgi doŋ bino bedo mom, kadi ŋat a kobbi ominnere ni, ‘Ŋe Rwot’, pien gin luŋ obino ŋeya, geye i kom jo atino i akinagi, ituno i kom jo adoŋo.

¹²Pien abino timogi kica i tim areco megi, mom dok abino poyo balgi.”

¹³Ka okobo pi cikere anyen, en tero cikere me agege ca acalo gin ame kare mere doŋ okato oko. Aco gin ame kare mere doŋ okato, ame oti oko, nwoŋo doŋ ceggi rwenyo.